19/09/2020 21:57
728 x 90

Bir sıra sərt karantin qaydalarının qüvvədə saxlanması hansı əsaslara söykənir...

Rüfət Quliyev: “Bu gün karantin rejiminin yumşaldılması insanlarda rahatlıq yaratmamalıdır”

img

Məlum olduğu kimi, ölkəmizdə Nazirlər Kabineti yanında Operativ Qərargah tərəfindən hazırkı sanitar-epidemioloji vəziyyətə uyğun olaraq sərt karantin rejiminin mövcud olduğu şəhər və rayonlarda, eləcə də ölkə üzrə bəzi yumşaldılmaların tətbiqinə qərar verilib. Qərarda karantin rejiminin tələblərinə uyğun müəyyən edilən qaydalar çərçivəsində ölkə üzrə çimərliklərin istifadəsinə icazə verilməsi də əksini tapıb.

Bununla yanaşı, SMS-lə icazə xidməti də ləğv olundu. Ancaq buna baxmayaraq, bəzi şəxslər karantin qydalarına edilən dəyişiklikləri düzgün hesab etmirlər. Onların fikrincə, karantin qaydaları tam şəkildə yumşaldılmalı və əhalinin əvvəlki qaydada sərbəst hərəkət etməsinə imkan verilməlidir. Ancaq həmin şəxslər unudurlar ki, bundan öncəki karantin qaydalarına edilən dəyişikliklərdə virusa yoluxma sayı yüksəlmişdi.

Xatırladaq ki, sərt karantin rejimində ilk yumşaldılma 18 mayda oldu. İri ticarət mərkəzlərinə, kafe və restoranlara qoyulan məhdudiyyət aradan qaldırıldı. Gəlin o tarixlərdəki statistikaya da nəzər yetirək. Mayin 18-i yoluxma sayı 113 idisə, 25 iyunda bu rəqəm 547-yə yüksəldi, yəni dərhal həftəlik yoluxma sayında yüksəliş baş verdi. 11-17 may tarixlərində həftəlik rəqəmlər 755, 1-7 iyun tarixlərindəki həftəlik yoluxma isə 2059 oldu. Rəqəmlərdən də göründüyü kimi, karantin rejimi yumşaldılan kimi yoluxma sayı sürətlə artmağa başlayıb.

Biz uzun müddətdir 226 rəqəmini görmürdük. Belə bir ərəfədə karantin qaydalarını yumşaldıb, yoluxma sayını artırmaq düzgün olmaz.

  • “Preventiv tədbirlər və vətəndaşların mövcud qaydalara əməl etməsi nəticəsində virusa yoluxanların sayında azalmaya nail olundu”

Millət vəkili Rüfət Quliyev qeyd etdi ki, avqustun 5-dən SMS icazə ləğv olundu: “Yeni növ koronavirus (COVID-19) infeksiyasının geniş yayılmasının qarşısının alınması üzrə 21 iyun 2020-ci il tarixindən etibarən tətbiq olunan sərtləşdirilmiş tədbirlər nəticəsində sanitar-epidemioloji vəziyyətdə stabilləşmə müşahidə edilir. Preventiv tədbirlər və vətəndaşların mövcud qaydalara əməl etməsi nəticəsində virusa yoluxanların sayında azalmaya nail olundu. Hazırkı sanitar-epidemioloji vəziyyətə uyğun olaraq, sərt karantin rejiminin mövcud olduğu şəhər və rayonlarda, eləcə də ölkə üzrə bəzi yumşaldılmaların tətbiqinə qərar verildi. Operativ Qərargahın məlumatına görə, 2020-ci il 5 avqust saat 06:00-dan etibarən sərtləşdirilmiş xüsusi karantin zonasına daxil olan şəhər və rayonlarda şəxslərin yaşayış yerini və olduğu yeri SMS icazə, xidməti vəsiqə, icaze.e-gov.az portalı vasitəsilə tərk etmək sistemi ləğv olundu”.

Həmsöhbətimiz onu da əlavə etdi ki, bu gün karantin rejiminin yumşaldılması insanlarda rahatlıq yaratmamalıdır: “Əhalinin sağlamlığının qorunması istiqamətində Prezident İlham Əliyevin qərarlarının və dövlətin həyata keçirdiyi qabaqlayıcı tədbirlərin müsbət nəticəsi olaraq avqust ayının 5-dən Azərbaycanda da karantin rejiminin yumşaldılmasına başlanıb, bəzi sahələrdə çalışan insanların fəaliyyətinə icazə verilib. Bu heç də koronavirus təhlükəsinin bitdiyi, virusun yoxa çıxdığı demək deyil. Karantin rejiminin yumşaldılması laqeydliyə əsas verməməli, heç kim arxayınlaşmamalıdır. Küçəyə çıxan insanlar qoruyucu vasitələrdən kütləvi halda istifadə etməli, sosial məsafəni qorumalıdırlar. Məhdudiyyətlər götürülsə belə, insanlar mənəvi məsuliyyət daşımalıdırlar. Çünki dövlət üzərinə düşəni edib, artıq növbə vətəndaşlarındır. Əhali tərəfindən xüsusi karantin qaydalarına əməl edilməməsi Azərbaycanın hər bir vətəndaşının sağlamlığının qorunması istiqamətində dövlətin həyata keçirdiyi tədbirlərin səmərəliliyini təhlükə altında qoyur. Ona görə də vətəndaşlarımız bir qədər ehtiyatlı və diqqətli olmalıdırlar. Vətəndaşlarımız zəruri olmadığı hallarda insanların çox toplaşdığı yerlərdə olmasınlar. Vətəndaşların belə tez arxayınlaşması hər birimizi narahat etməlidir”.

Millət vəkili hesab edir ki, sərt karantin rejimi ilə bağlı verilmiş son qərar çox düşünülmüş qərardır. Ümumiyyətlə, Operativ Qərargah bu qərarları verməzdən öncə kifayət qədər təhlillər aparılır, bütün hallar nəzərə alınır. Çünki yeni yoluxma hallarının artması risqi çox böyükdür. Aprel ayının 27-dən sonra sərt karantin rejiminin yumşalması ilə yoluxmaların sayı kəskin şəkildə artdı: “Məlumdur ki, inkişaf etmiş ölkələrin səhiyyə sistemi belə koronavirusla mübarizədə acizdir. Lakin Azərbaycanda bu proseslər tənzimləndi. Qısa zaman ərzində 10 modul tipli xəstəxana tikildi, bir çox yeni karantin mərkəzi açıldı. Həmçinin, ölkəmizdə koronavirusla mübarizəyə Rusiya, Türkiyə, Kuba, İtaliya, Çin və digər ölkələrdən mütəxəssislər cəlb edildi. Hər birimizin arzusudur ki, sərt karantin qaydaları ləğv edilsin, tezliklə normal həyata qayıdaq. Çünki insanların aylarla evdə oturması müəyyən stress və depressiyaya səbəb olur. Karantin qaydalarını qəbul edənlər də bunun fərqindədirlər. Ancaq reallıq bundan ibarətdir ki, birdən-birə tam yumşaldılmaya getmək ciddi problemlər yarada bilər. Əgər hazırkı qaydaların effekt verdiyi təsdiqlənsə, yəqin ki, bu məsələlərə yenidən baxılacaq”.

Son olaraq bildirək ki, vətəndaş məsuliyyətinin nəticəsi kimi yoluxma və aktiv xəstə sayı azalsa, daha bir sıra məhdudiyyətlər aradan qaldırılar.

Günel CƏLİLOVA

Son xəbərlər