22/09/2020 09:44
728 x 90

Karantin qaydalarının tədricən və növbə ilə yumşaldılması ən optimal yol sayılır...

Rauf Zeyni: “Dövlətin həyata keçirdiyi məqsədyönlü mübarizə tədbirləri nəticəsində artıq karantin rejiminin mərhələli şəkildə yumşaldılmasına başlanır”

img

Son günlər ölkəmizdə koronavirusa yoluxanların sayının azalması, sağalanların yoluxanları üstələməsi nəticəsində karantin qaydalarında müəyyən yumşaldılma prosesinə başlanır.

Nazirlər Kabineti yanında Operativ Qərargahın yaydığı məlumata görə, 2020-ci il 5 avqust saat 06:00-dan etibarən sərtləşdirilmiş xüsusi karantin zonasına daxil olan şəhər və rayonlarda şəxslərin yaşayış yerini və olduğu yeri SMS icazə, xidməti vəsiqə, icaze.e-gov.az portalı vasitəsilə tərk etmək sistemi ləğv olunur. Bundan başqa, ölkə üzrə çimərliklərin istifadəsinə Ekologiya və Təbii Sərvətlər Nazirliyi, Fövqəladə Hallar Nazirliyi və Bakı Şəhər İcra Hakimiyyəti tərəfindən karantin rejiminin tələbləri əsasında müəyyən edilən qaydalar çərçivəsində icazə verilir.

Qeyd edək ki, 31 avqust saat 00:00-dək Bakı, Cəlilabad, Gəncə, Masallı, Mingəçevir, Sumqayıt, Yevlax şəhərləri və Abşeron, Bərdə, Goranboy, Göygöl, Xaçmaz, Salyan rayonlarında sərtləşdirilmiş xüsusi karantin rejimi tətbiq olunacaq. Toy-nişan mərasimləri, iri ticarət mərkəzlərinin açılması, idman yarışlarının keçirilməsi və sairlə bağlı məhdudiyyətlər isə qüvvədə qalır.

Rayonlara gediş-gəlişin bərpası məsələsinə gəlincə, yalnız ezamiyyə icazəsi olanlar rayonlara gedə və qayıda biləcəklər.

  • ...hazırkı şəraitdə ən uyğun variantdır”

Milli Qeyri-Hökumət Təşkilatları Forumunun prezidenti Rauf  Zeyni bizimlə söhbətində qeyd etdi ki, karantin qaydalarından mərhələli çıxış bizim üçün ən uyğun variantdır. “Pandemiya artıq yekunlaşmaq üzrədir. Dövlətin həyata keçirdiyi məqsədyönlü mübarizə tədbirləri  nəticəsində artıq karantin rejiminin mərhələli şəkildə yumşaldılmasına başlanır. Karantin qaydalarının mərhələli şəkildə yumşaldılması hazırkı şəraitdə ən uyğun variantdır.

Karantin rejimi ilə bağlı müəyyən qadağaların aradan götürülməsi - SMS icazə sisteminin ləğv edilməsi, çimərliklərin müvafiq qaydalara uyğun olaraq açılmasına icazə verilməsi və sair addımlar əhalinin gözlədiyi məsələlərdəndir. Düşünürəm ki, vətəndaşlar bu qərarı yüksək qiymətləndirməli və sui-istifadə hallarına yol verməməlidirlər. Əlbəttə, müəyyən qadağalar qalmaq şərtilə virusun tam olaraq aradan qaldırılması üçün işlər, tədbirlər davam etdirilməlidir. Mən əvvəldən demişdim ki, bundan sonra da biz viruslardan qorunmağı özümüzün həyat tərzimiz kimi qəbul etməliyik. Sabah hökumət elan etsə ki, ölkəmizdə artıq virus yoxdur, bununla belə, biz qapalı yerlərdə maskalardan istifadə etməli, sosial məsafə saxlamalıyıq, sanitar-gigiyena məsələsinə diqqət yetirməliyik. Həyatımızı bundan sonra da belə yaşamalıyıq. Əhali bunu qəbul etməlidir ki, hər zaman özünü qorumalıdır. Əsas toy-yas məclislərində iştirak etmək, rayonlara istirahətə getmək deyil, insanların həmişə öz sağlamlığına ciddi yanaşmasıdır. Dünya təcrübəsinə baxmalıyıq, yaponlar, almanlar və başqa xalqlar özlərini virusdan necə qoruyurlarsa, biz də o cür qorumalıyıq. Bunu gündəlik həyat norması kimi qəbul etməliyik”.

R.Zeyni hesab edir ki, bu istiqamətdə əhalinin maarifləndirilməsi üçün QHT-lərin və medianın üzərinə böyük vəzifələr düşür. Onun sözlərinə görə, pandemiyadan bizə qalan müsbət vərdişlərin hamısını davam etdirməliyik.  

İradə SARIYEVA

Son xəbərlər