Sovet dövrünün bir sıra qaydaları olub ki, yeni nəsil həmin qaydalara qəribə bir hal kimi yanaşır. Belə qaydalardan biri də məşhurların boşanması ilə bağlıdır.
Yaşlı nəslin bir çox nümayəndəsindən eşitmişik ki, Sovet dövründə boşanmaq istəyən insanlar, xüsusən də məşhurlar əvvəlcə bu barədə dövri mətbuatda elan verməli idilər. Hətta deyilənə görə, bəzi məşhurlar, tanınmış şairlər, yazıçılar, müğənnilər, aktyorlar Azərbaycandilli qəzetlərdə bu elanları çap etdirməyə utandıqları üçün əsasən rusdilli nəşrlərə üz tutublar. Məlumatlı şəxslər qeyd edirlər ki, o dövrdə sovet ailəsində boşanma baş verirdisə, bu çox neqativ hal kimi qəbul edilir, boşanmaq istəyən tərəf məhkəmədən əlavə də ictimai qınaqla üzləşirdi.
Sovet dövrü mətbuatında bu kimi elanların kifayət qədər olduğunu deyən məlumatlı şəxslər hesab edirlər ki, bu fakt sosioloqlar tərəfindən ayrıca araşdırılmalıdır.
Faktı dəqiqləşdirmək üçün Sovet dövründə mətbuatla sıx əlaqəsi olan tanınmış alimlərə müraciət etdik.
Əhməd Qəşəmoğlu: “Boşanmaq üçün qəzetə elan verənlərin arasında məşhurların da, qeyri-məşhurların da olduğu yadıma gəlir”
Ədəbiyyatşünas-alim, tənqidçi, professor Teymur Əhmədov “Bakı-Xəbər”ə bildirdi ki, bu faktdır və Sovet dövründə boşanmaq istəyənlər əvvəlcə dövri mətbuat orqanlarına müraciət edirdilər: “Bu mənim çox yaxşı yadıma gəlir. Sovet dövründə boşanmaq istəyənlər bu barədə qəzetlərdə elan verirdilər. Mən aspiranturada oxuyanda Leninqrada (Sankt-Peterburq) ezamiyyətə getmişdim və orada olarkən gündəlik qəzetlərlə də tanış olurdum. Bir dəfə gördüm ki, qəzetin arxa səhifəsi tamamilə boşanma elanlarına həsr olunub. Sovet dövründə Azərbaycanda və digər müttəfiq respublikalarda boşanmaq istəyənlər qəzetlərdə elan verirdilər” - deyə T.Əhmədov qeyd etdi.
Tanınmış sosioloq, professor Əhməd Qəşəmoğlunun sözlərinə görə isə o, bu elanları dumanlı şəkildə xatırlayır: “Sovet dövründə boşanma çox pis qarşılanırdı. Mən özüm o dövrdə idarə rəhbəri olmuşam. Qayda belə idi ki, boşanmaq istəyən işçiləri rəhbərlik çağırıb əvvəlcə söhbət edir və onlardan boşanmanın səbəbini soruşurdu. Sonra onun məsələsi partiya iclasına çıxarılırdı. Boşanmaq istəyən kommunist idisə, onda onun vəziyyəti daha gərgin olurdu. Hətta bu onun xasiyyətnaməsinə də qeyd edilirdi. Amma boşanmaq istəyənlərin mətbuata elan verməsi məsələsini dumanlı xatırlayıram. Sizinlə danışa-danışa dövrün qəzetlərini göz önünə gətirirəm. Yadıma gəlir ki, belə faktlara qəzetlərdə rast gəlinirdi. Boşanmaq üçün qəzetə elan verənlərin arasında məşhurların da, qeyri-məşhurların da olduğu yadıma gəlir. Amma bu məsələ ilə bağlı yaşlı nəsildən mən də çox eşitmişəm ki, belə bir ənənə vardı”.
İradə SARIYEVA
