12/08/2020 21:48
728 x 90

Polis pandemiya şəraitində yaşayış yerini icazəsiz tərk edənlərlə maarifçilik işini gücləndirdi…

Əziz Qəmbərov: “Bu gün polisin maarifləndirmə işini bu şəkildə genişləndirməsinin faydası çox böyük olacaq”

img

Bildiyimiz kimi, evdə müalicə alan koronavirus xəstələri arasında icazəsiz yaşayış yerini tərk edən və ictimaiyyət içinə çıxan şəxslər də var. Halbuki, həmin şəxslərin müalcə prosesi başa çatana və sağlamlıqlarına dair qərar verilənə qədər yaşayış yerini tərk etməsi qanunla qadağan edilir. İndiyə qədər polis tərəfindən bir neçə belə şəxs aşkarlanıb və barələrində cinayət işi qaldırılıb.

Koronavirus (COVID-19) infeksiyasının kütləvi yayılmasının qarşısının alınması məqsədilə paytaxtda polis və Daxili Qoşunların hərbi qulluqçuları tərəfindən fasiləsiz, gücləndirilmiş nəzarət-profilaktik tədbirlər davam etdirilir.

Bakı Şəhər Baş Polis İdarəsindən mətbuata verilən məlumata görə, yaşayış yerini icazəsiz tərk edən şəxslərlə profilaktik söhbətlər aparılır, mövcud sanitar-gigiyenik tələblər izah olunur.

Diqqətə çatdırılır ki, hər bir şəxs tətbiq olunan qaydalara, Nazirlər Kabinetinin qərarı ilə təsdiq edilmiş koronavirusun profilaktikasına dair metodiki göstərişlərə əməl etməlidir.

Polisin bu istiqamətdə maarifçilik işi hansı nəticələr verəcək?

Tanınmış hüquqşünas Əziz Qəmbərov bizimlə söhbətində yaşayış yerini icazəsiz tərk edən şəxslərlə polisin profilaktik söhbətlər aparmasına, onlara mövcud sanitar-gigiyenik tələbləri izah etməsinə müsbət yanaşdığını, bunun daha çox effekt verəcəyini bildirdi. “Ümumiyyətlə, yaşayış yerini icazəsiz tərk edən insanların cərimlənməsi yox, onlarla profilaktik, maarifləndirici söhbətlər aparılması çox effektiv nəticə verəcək. Bu baxımdan DİN əməkdaşlarının vətəndaşlarla maarifləndirici söhbətlər aparması insanları pandemiyanın ciddiliyini dərk etməyə sövq edəcək. Burada məsələ nədir? Karantin qaydalarını pozan insanlara dərhal cərimənin yazılması qaydaları pozanlarda belə bir fikir formalşdırır ki, məqsəd cərimə yazmaqdan (?) ibarətdir. Əslində isə məqsəd cərimə yazmaq deyil, insanları yol verdiyi qanunsuzluğa görə islah etməkdir. Amma bu gün polisin maarifləndirmə işini bu şəkildə genişləndirməsinin faydası çox böyük olacaq. Polis qaydaları pozan vətəndaşı birinci dəfə saxlayanda ona izah edir ki, pandemiya çox təhlükəlidir, özün yoluxarsan, səndən isə ailə üzvlərin, yaxın ətrafın yoluxar, hətta bu, kimlərinsə ölümünə səbəb ola bilər. Bu söhbətdən sonra vətəndaş polisə, dövlətimizin həyata keçirdiyi pandemiya ilə mübarizə siyasətinə dəstək olacaq və həmin insanın özü bir təbliğatçıya çevriləcək” - deyə bildirən Ə.Qəmbərovun sözlərinə görə, polisin apardığı profilaktik maarifləndirmə işinə bütün məsuliyyətli vətəndaşlar da qoşulacaq. “Vətəndaşa polis koronavirusun fəsadlarını izah etdikdən, onları sanitar-gigiyana qaydasına riayət etməsi ilə bağlı təlimatlandırdıqdan sonra o vətəndaş, birmənalı olaraq, pandemiya ilə mübarizənin təbliğatçısına çevriləcək və dövlətin bu işinə dəstək olacaq. Hesab edirəm ki, bu, əhali arasında biganəliyi aradan qaldıracaq. Bir məsələ var ki, onu xüsusi qeyd etməliyəm. Vətəndaşlar polisin həyata keçirdiyi maarifləndirici tədbirlərdən sui-istifadə etməməlidirlər. Polis hansı vətəndaşla saat neçədə maarifləndirici söhbət aparıbsa, o barədə məlumatı kompyuterin yaddaşındakı proqrama yerləşdirməlidir ki, o vətəndaş qaydaları təkrar pozarsa, həmin vaxt ona yazılan cərimənin məbləği daha artıq olmalıdır. Bütövlükdə, vətəndaşlar maarifləndirmə işindən nəticə çıxarmalıdırlar. Maarifləndirmə hər zaman bizim köməyimizə yetən vasitə olacaq və geniş ictimaiyyəti bu təhlükənin qarşısının alınmasında təbliğatçıya çevirəcək” - deyə müsahibimiz vurğuladı.

İradə SARIYEVA  

Son xəbərlər