Həyasızlığın da həddi-hüdudu olmalıdır. Amma ermənilər o dərəcədə həyasızdırlar ki, başqa xalqların mədəniyyətini, mətbəxini mənimsəyərək öz adlarına təqdim etməkdən çəkinmirlər. Əlbəttə, bütün bunlar erməni saxtakarlığına və həyasızlığına beynəlxalq aləmin göz yumması nəticəsində baş verir.
Azərbaycan mətbəxinin ləziz təamlarından olan dolmaya uzun illərdir ermənilər iddia edir və dolmanı dünyaya “erməni xörəyi” kimi təqdim etməyə cəhdlər göstərirlər. Bu azmış kimi, son illər davamlı olaraq müxtəlif ölkələrdə dolma festivalları keçirirlər.
İyulun əvvəllərində isə ermənilər Ukraynanın ən böyük şəhərlərindən biri olan Odessada dolma festivalı keçiriblər. Erməni saytlarının yaydığı məlumata görə, Ukrayna erməni ittifaqı tərəfindən Odessada təşkil olunan festivalda erməniləşdirilmiş dolmanın 17 növü təqdim edilib. Bu, sözün əsl mənasında, böyük həyasızlıqdır və bunun qarşısı alınmalıdır.
Rusiya mətbuatının yazdığına görə, dolmanı “erməni xörəyi” adı ilə UNESCO-ya salmaq istəyən erməniləri bu qurum məyus edib. Belə ki, UNESCO tərəfindən ermənilərə bildirilib ki, dolma erməni xörəyi deyil, ümumiyyətlə, “dolma” sözü erməni dilinə uyğun gəlmir.
Qeyd edək ki, ermənilər dolmaya “tolma” adı verib.
Azərbaycan 2017-ci ildə dolma hazırlama və paylaşma ənənəsinin UNESCO-nun Qeyri-maddi mədəni irs siyahısına daxil olunmasına nail olub. Buna baxmayaraq, yenə də ermənilər öz iddialarından əl çəkmək istəmirlər.
Onu da deyək ki, Azərbaycanda dolmanın 381 növü var.
“Azərbaycanın əlində dolmanın bizə məxsus xörək olması ilə bağlı rəsmi sənəd var”
Məsələyə münasibət bildirən Milli Kulinariya Assosiasiyasının prezidenti, Milli Mətbəx Mərkəzinin rəhbəri Tahir Əmiraslanov “Bakı-Xəbər”ə bildirdi ki, ermənilərin “dolma festivalı” keçirməsinə baxmayaraq, dünya dolmanı Azərbaycan mətbəxinə aid təam olaraq qəbul edir. “UNESCO ermənilərə cavab verməklə dolmanın Azərbaycan mətbəxinin nümunəsi olduğunu təsdiqləyib. Dolma UNESCO-ya Azərbaycan xörəyi kimi daxil edilib.
Bilirsiniz ki, “Azərbaycan mətbəxində dolma: 381 növ” kitabı dünyanın ən yaxşı kulinariya kitabı seçilib. Kulinariya kitablarının beynəlxalq müsabiqəsi “Gourmand World Cookbook Awards” məşhur fransız Kuanto ailəsinin nümayəndələri tərəfindən keçirilir.
Bundan başqa, Azərbaycanın 10 regional dolması patentlə qorunur, 5 dolma çeşidi isə poçt markasında yer alıb. Azərbaycanın əlində dolmanın bizə məxsus xörək olması ilə bağlı rəsmi sənəd var. Bu sənəd Dünya Kulinariya Mərkəzi tərəfindən imzalanıb.
Saxtakarlıq ermənilərin xasiyyətidir. Onlar UNESCO-nun qərarı ilə hələ də razılaşmadıqları üçün belə qondarma festivallar keçirirlər. Mənim üçün çox maraqlıdır ki, ermənilər Odessada dolma festivalı keçirərkən orada yaşayan soydaşlarımız niyə buna etiraz etməyib, nə üçün onlar da belə festivallar təşkil etmirlər. Biz burada iş görürük, onlar da dəstək göstərməli, təbliğat aparmalıdırlar. Üç erməni arvadı bir yerə yığışıb, dolma bişirib festival keçirir, soydaşlarımız buna etiraz etmirlər?
Ermənilər gah Gürcüstanda, gah da başqa ölkələrdə dolma festivalları keçirirlər. Bu gün “Elika” şirkəti Azərbaycan dolmasını (üzərində Azərbaycan dilində yazı var) Ukraynada, Rusiyada satır. Ümumiyyətlə, təbliğat məsələsində problemlər var və bu sahədə media təbliğatı gücləndirməlidir” - deyə T.Əmiraslanov bildirdi.
İradə SARIYEVA
