15/08/2020 20:36
728 x 90

Bakıdan Kürdəmirə yasa gedən qadın 31 nəfəri virusa yoluxdurdu iddiası – Yas mərasimləri hələ də risq mənbəyidir...

Musa Quliyev: “Yas yerlərində kütləviliyi azaltmaq üçün müvafiq addımların atılması lazımdır”

img

İnsanlar elə hesab edirlər ki, doğmasına ehsan süfrəsi açmaq onun qarşısında son borcudur. Kimsə bu borcu yerinə yetirməsə, camaat onu qınayar. Koronavirus pandemiyası ilə əlaqədar ölkəmizdə karantin rejimi davam etsə də, COVID-19-a yoluxanların sayı sürətlə artır. Bu virusa yoluxma sayını artıran əsas amillər sırasında yas mərasimlərinin təşkili xüsusi qeyd edilir.

Tibbi Ərazi Bölmələrini İdarəetmə Birliyinin (TƏBİB) sədri Ramin Bayramlı Nazirlər Kabineti yanında Operativ Qərargahın brifinqlərindən birində bu faktı təsdiq edib. O bildirib ki, aparılan analizlər göstərir ki, yoluxmaların çoxu yas mərasimlərində olur. Onun sözlərinə görə, yaslarda insanların, xüsusilə qadınların bir yerdə toplaşması yoluxanların sayının kütləvi şəkildə artmasına səbəb olur: “Bu bizi narahat edir. Vətəndaşları diqqətli və məsuliyyətli olmağa çağırırıq”.

Bu günlərdə Kürdəmir rayonunun Pirili kəndində koronavirusa yoluxanların sayının 45-ə çatması haqqında məlumat yayıldı. Məlumatda qeyd olunur ki, Bakının Qaradağ rayonundan kəndə yas mərasiminə gələn Güleyşə Hüseyn qızı Əhmədova kənddə koronavirusun geniş yayılmasına səbəb olub. Hazırda 5 evdə infeksiya ocağı aşkarlanıb. Artıq qonşu evlərdə dezinfeksiya işləri aparılıb və yaxma analizləri götürülüb.

Qeyd edək ki, buna bənzər fakt dəfələrlə qeydə alınıb. Virus daşıyıcısı yas mərasimində iştirak edib, nəticədə həmin məclisdə iştirak edənlərin əksəriyyəti koronavirusa yoluxub.

Onu da bildirək ki, yas mərasimlərinin keçirilməsinə qadağa qüvvədə olsa da, buna riayət edən azdır. Maraqlıdır, yas mərasimlərinə necə nəzarət tətbiq edilə bilər?

  • “Yaxşı olar ki, yas çadırlarını kirayə verən şirkətlərə, şəxslərə, mərasim yerlərinin sahiblərinə cərimələr tətbiq olunsun”

Millət vəkili Musa Quliyev bildirdi ki, yas yerlərində koronavirusa yoluxmaların çoxalması ciddi narahatlıq doğurur: “Təəssüflər olsun ki, xəbərdarlıqlara baxmayaraq, vətəndaşlarımız koronavirusla mübarizədə lazımi məsuliyyət nümayiş etdirmirlər. Əsasən rayonlarda, kəndlərdə kütləvi şəkildə yas mərasimlərinin keçirilməsi müşahidə olunur ki, burada da çoxlu sayda yoluxma baş verir. Hesab edirəm ki, bu məsələdə bir neçə istiqamətdə ləngimədən iş aparmaq lazımdır. Birinci növbədə yenə də maarifləndirmə işi davam etməlidir. Digər tərəfdən, Prezidentin söylədiyi üç özünü qoruma tədbirinə hər kəs mütləq əməl etməlidir - sosial məsafənin qorunması, qapalı yerlərdə tibbi maskalardan istifadə olunması və dezinfeksiya məhlulları ilə tez-tez əllərin təmizlənməsi. Bununla yanaşı, yas yerlərinin kütləviliyini azaltmaq üçün də müvafiq addımların atılması lazımdır. Ya Qafqaz Müsəlmanları İdarəsi fətva verməlidir, ya da vətəndaşlara müraciət etməlidir, yaxud da onların tabeliyində olan din xadimlərinin vasitəsilə yas mərasimlərinin keçirilməsinin məhdudlaşdırılması üçün tədbirlər görülməlidir. Eyni zamanda, Dini Qurumlarla İş üzrə Dövlət Komitəsi də öz xətti ilə lazımi məhdudlaşdırıcı tədbirlər görməlidir. Məsələn, 10-15 nəfərdən çox insanın dəfn mərasimində iştirak etməsinə qadağa qoymalıdır. Sonrakı günlərin yas mərasimləri də, yəni üç, yeddi, cümə axşamları təxirə salınmalıdır. Yaxşı olar ki, yas çadırlarını kirayə verən şirkətlərə, şəxslərə, mərasim yerlərinin sahiblərinə cərimələr tətbiq olunsun”.

Son olaraq bildirək ki, yas mərasimi keçirməklə başqasını virusa yoluxdurmaq mümkündür. Bir nəfər virusu olan şəxsin bu mərasimə qatılması ən pis halda 10 nəfəri yoluxdura bilər. Bu səbəbdən də yas mərasimində iştirak edən şəxslər təhlükəsizlik qaydalarına riayət etməlidirlər.

Günel CƏLİLOVA

Son xəbərlər