Pandemiya ilə əlaqədar sosial dəstək tədbirlərindən biri kimi, əlillik müddəti başa çatan əlilliyi olan şəxslərə müavinət verilir. Eyni zamanda, qeyd olunan əlilliyi olan şəxslərdən birinci dərəcə əlilliyi olanlara və sağlamlıq imkanları məhdud uşaqlara qulluq edənlər üçün aylıq təqaüdün verilməsi də nəzərdə tutulub. Bu sosial müdafiə tədbiri, ümumilikdə, 14 min şəxsi əhatə edir. Əlillik müddəti bitmiş, sağlamlıq imkanları məhdud olan 18 yaşınadək uşaqlara ödənişlərin verilməsi ilə bağlı problem yaranıb.
Bununla bağlı redaksiyamıza şikayət edən valideyinlər bildirirlər ki, mart ayından etibarən pandemiyaya görə komissiyalar təşkil olunmur. Müavinətlərin dayandırılması sağlamlıq imkanları məhdud olan uşaqların valideynlərini ciddi çətinliklə üz-üzə qoyub. Bu da pandemiya şəraitində onlarla insanın Əmək və Əhalinin Sosial Müdafiəsi Nazirliyinin rayon şöbələri qarşısında toplaşmasına səbəb olur.
Şikayətçilərin dediyinə görə, həmin şöbələrdən onlara bildirilir ki, sözügedən qərar veriləndə karantin rejimi 5 iyula kimi idi, buna görə də həmin müddətə qədər ödənişlər edilir. Bundan sonra karantinin 2 dəfə uzadıldığı halda ödənişlərin niyə bütöv formada verilmədiyi ilə bağlı suala isə rayon şöbələrində cavab tapılmır.
Məlumat üçün bildirək ki, Prezident İlham Əliyevin tapşırıqlarına uyğun olaraq, Nazirlər Kabinetinin təsdiqlədiyi Tədbirlər Planı əsasında əlillik müddəti başa çatan əlilliyi olan şəxslərə, o cümlədən, sağlamlıq imkanları məhdud 18 yaşınadək uşaqlara müvafiq ödənişlərin verilməsi müddəti uzadılıb.
Qərarın olmasına baxmayaraq, valideynlər həmin aylıq müavinətin yalnız bir hissəsini ala biliblər. Aylıq müavinət 200 manatdırsa, bunun yalnız bir hissəsi - 5 iyuladək olan hissəsi ödənilib, yəni 32 manat.
“Sadəcə, vətəndaşlarımız ödəmələrin adi qaydada həyata keçirilməsini gözləyirdilər, amma karantin rejiminin uzadılması ilə...”
Məsələ ilə bağlı Əmək və Əhalinin Sosial Müdafiəsi Nazirliyinə müraciət etdik. Nazirliyin mətbuat katibi Fazil Talıbov bildirdi ki, sözügedən qərar iyul ayının 5-dək olan müddət üçün verilib: "O vaxta qədər əlillik müddəti bitən, sağlamlıq imkanları məhdud olan uşaqlara verilən ödəmələr uzadılmışdı. Yeni qərar verildikdən sonra əlillik müddəti bitmiş vətəndaşlarımızın ödəmələrinin verilmə müddəti avqust ayının 5-dək uzadılıb. Yəni burada heç bir problem yoxdur, ödəmələr də yaxın zamanlarda həyata keçiriləcək. Burada yubanmadan söhbət getmir. Sadəcə, vətəndaşlarımız ödəmələrin adi qaydada həyata keçirilməsini gözləyirdilər, amma karantin rejiminin uzadılması ilə bağlı qərar bir müddət sonra verildiyinə görə işlər də həmin müddətə uyğun olaraq başlandı”.
Günel CƏLİLOVA
