Bəzi insanların koronavirus pandemiyasına barmaqarası yanaşması, laqeydlik göstərərək maska taxmaması, sosial məsafə saxlamaması və gigiyena qaydalarına əməl etməməsi nəticəsində ölkəmizdə virusa yoluxanların sayı çoxalır. Virusa yoluxan xəstələr arasında daha ağır durumda olanlar da az deyil. Həmin xəstələr müxtəlif xəstəxanaların reanimasiya şöbələrinə yerləşdiriblər.
TƏBİB-in mətbuata verdiyi məlumata görə, Azərbaycanda xəstəxanaların reanimasiya şöbələrində müalicə edilən koronavirus xəstələrinin sayı artıb.
Məlumata görə, hazırda reanimasiyada olan koronavirus xəstələrinin sayı 314 nəfərdir.
Qeyd edilir ki, hazırda ölkədə süni tənəffüs cihazında olan xəstələrin sayı 69 nəfərdir. Son məlumata görə, ölkədə süni tənəffüs cihazında olan xəstələrin sayı 70 nəfər idi.
Xəstəxanaların reanimasiya şöbələrində müalicə edilən koronavirus xəstələrinin sayının artması nə ilə bağlıdır?
“Bir də görürsən ki, evdə müalicə alan xəstə yataq rejimini vaxtından əvvəl tərk edir”
Professor Adil Qeybullanın sözlərinə görə, son zamanlar xəstəxanaların reanimasiya şöbələrində müalicə alan xəstələrin sayının artması müşahidə olunur. “Reanimasiyada yerləşdirilən xəstələr əsasən ağır vəziyyətdə olan adamlardır. Onların da sayı, demək olar ki, günü-gündən artır. Ağırlaşmış formada xəstəxanaya müraciət edən və hazırda reanimasiyaya yerləşdirilən xəstələrin çoxu həkimə məlumat vermədən evdə özünü müalicə edən insanlardır. Onlar həkimə vaxtında müraciət etməyən və həkimin yazdığı resept əsasında müalicə almayan xəstələrdir. Vəziyyətləri ağırlaşan kimi xəstəxanaya müraciət edirlər. Bilirik ki, koronavirusdan həyatını itirən həkimlərimiz də var. Onların da yoluxmasına bu cür xəstələr səbəb olur. Bir də görürsən ki, evdə müalicə alan xəstə yataq rejimini vaxtından əvvəl tərk edir, müalicəsini dayandırır, çölə-bayıra çıxır, hərəkət edir, ağ çiyərlərinə əlavə yük düşür. Ümumiyyətlə, evdə müalicə alan xəstələr həkimlərin tapşırıqlarına əməl etməlidirlər ki, müalicə nəticə versin, ağırlaşmasınlar. Hesab edirəm ki, evdə müalicə alan virusa yoluxmuş xəstələrlə bağlı xüsusi maarifləndirici təlimatlar geniş şəkildə təbliğ olunmalıdır ki, xəstə evdə müalicə dövründə hansı qaydalara əməl etməli olduğunu bilsin. Xəstələrlə bağlı təlimatlar ictimailəşdirilməlidir”.
A.Qeybulla bildirdi ki, həkimlər üçün də ayrıca təlimatlar var, amma bu təlimatlar ictimailəşməməlidir və həkimlərin viruslu xəstələrə müalicəsi üçün yazdıqları reseptlər yayılmamalıdır. “Hər xəstəyə fərdi yanaşılmalıdır. Ona görə də həkimin bir xəstəyə yazdığı resept əsasında başqa bir xəstə dərman almamalıdır. Çünki hər bir xəstənin müalicə üsulu, müalicə prosesində istifadə edilən dərman vasitələri eyni ola bilməz, fərqlidir. Amma bir də görürsən ki, xəstə başqa birisinə yazılan reseptlə dərman alıb qəbul edir, bu da, təbii ki, fayda vermir” - deyə A.Qeybulla qeyd etdi.
İradə SARIYEVA
