“...Bizim təhsilimizin ümumi səviyyəsi təbii ki, qalxmalıdır və təhsilli insan nə qədər çox olarsa, ölkəmizin intellektual potensialı o qədər də çox artacaqdır. Bununla paralel olaraq, bizim təhsil sistemimiz ölkəmizin ümumi iqtisadi və sənaye inkişafı ilə uzlaşmalıdır. Ona görə xüsusilə ali məktəblərə qəbul mərhələsində bütün bu məsələlər dərindən təhlil edilməlidir. Bizə hansı sahə üzrə nə qədər mütəxəssis lazımdır? Humanitar sahədə fəaliyyət göstərəcək nə qədər mütəxəssis lazımdır? Nə qədər texniki peşə sahibləri lazımdır? Ona görə bütün bunları siz mütləq aidiyyəti dövlət qurumları ilə birlikdə həll etməlisiniz. Bizim iqtisadi və sənaye inkişafımız planlı şəkildə həyata keçirilir...”.
Bu fikirləri Prezident İlham Əliyev iyulun 27-də Emin Əmrullayevi Təhsil naziri təyin olunması ilə əlaqədar videoformatda qəbul edərkən deyib. Ölkə başçısı, eyni zamanda,vurğulayıb ki, bizim təhsilimizin əsas istiqamətləri ölkəmizin sənaye və iqtisadi inkişafı ilə tam bağlı olmalıdır.
Prezident “bizim təhsil sistemimiz ölkəmizin ümumi iqtisadi və sənaye inkişafı ilə uzlaşmalıdır” fikrilə nə demək istəyib?
“Azərbaycan təhsili iqtisadiyyatımıza, sənayemizə fayda verəcək dərəcədə inkişaf edərsə, bunun müsbət nəticəsini xalq və dövlət olaraq görəcəyik”
Tanınmış alim, professor Məhərrəm Zülfüqarlı bizimlə söhbətində bildirdi ki, ölkə başçısı çox mühün bir məsələyə toxunub. Prezidentin yeni dövrün çağırışlarını əsas götürərək elm və təhsilimizin iqtisadiyyat və sənayenin inkişafı ilə sıx şəkildə bağlı olaraq inkişaf etdirilməsinin vacib olduğunu vurğuladığını deyən M.Zülfüqarlı hesab edir ki, bu, dövlətimizin gələcəyi üçün çox mühümdür. “Prezident bununla demək istəyir ki, elm və təhsil güclü inkişaf etməli və iqtisadiyyatın, sənayenin tərkib hissəsinə çevrilməlidir. Bilirik ki, bizdə elm və təhsil dövlət büdcəsindən maliyyələşir və amma hələ də təhsilimiz iqtisadiyyata, sənayeyə elə də böyük fayda verməyib. Bu gün təhsilin özü ölkəyə böyük gəlir gətirməlidir. Dünyanın bütün inkişaf etmiş ölkələrində təhsil, iqtisadiyyat və sənaye bir-birinin ayrılmaz tərkib hissəsinə çevrilib. Bizdə də elm və təhsil sahəsindəki yeni ixtiralar, yeni nailiyyətlər iqtisadiyyata, sənayeyə tətbiq edilməlidir. Çünki bununla ölkəmizin sənayesini və iqtisadiyyatını daha güclü şəkildə inkişaf etdirə bilərik. Çox təəssüflər olsun ki, Azərbaycanda çox zaman elm və təhsildə olan yeniliklərin istehsalatda tətbiqini görə bilmirik. Ali məktəb tələbələri müəssisələrə təcrübəyə gedirlər. Gizlin deyil ki, bu da çox zaman formal xarakter daşıyır. Bizdə hələ də Sovet dövründən qalma formalizm var. Ölkə başçısı, həmçinin, demək istəyir ki, artıq formalizmdən əməli işə keçməyin vaxtıdır”.
M.Zülfüqarlının sözlərinə görə, Azərbaycanda təhsilin, elmin inkişafına dövlət külli miqdarda vəsait ayırır, amma bu, indiyə qədər öz bəhrəsini tələb olunan səviyyədə vermir. “Bu gün alimlərin tədqiqatları sənayeyə, iqtisadiyyata tətbiq edilməlidir ki, dövlətin elmə, təhsilə ayırdığı külli miqdarda vəsait dövlət büdcəsinə əlavə gəlirlər gətirsin. Azərbaycan təhsili iqtisadiyyatımıza, sənayemizə fayda verəcək dərəcədə inkişaf edərsə, bunun müsbət nəticəsini xalq və dövlət olaraq görəcəyik” - deyə M.Zülfüqarlı bildirdi.
İradə SARIYEVA
