Pandemiyaya qarşı mübarizəyə qoşulan ölkələrin hamısında yoluxma və ölüm sayı fərqlidir. Ümumdünya Səhiyyə Təşkilatının məlumatına görə, bir çox ölkədə yenidən sərt karantin rejiminin tətbiqinə qayıdılıb. Deməli, həmin ölkələrdə aparılan mübarizə tədbirlərinə ya vaxtında başlanmayıb, ya da qaydalara laqeyd yanaşılıb.
Hazırda ABŞ-ın bir çox ştatında sərt karantin rejimi aradan qaldırılıb, amma maska taxmaq və sosial məsafənin qorunması hələ də vacibdir. Restoranların bir hissəsi açıq havada fəaliyyət göstərsə də, biznes obyeklərinin 50 faizi işləsə də, bəzi ştatlarda yoluxmalar çoxdur deyə, sərt karantin rejimi davam etdirilir.
Azərbaycanda virusa yoluxma pik həddə çatmayıb. İyunun 24-dəki 590 yoluxma ən yüksək hədd olub. Azərbaycan çevik davranaraq karantin rejimi tətbiq etdiyinə görə də son 2 ay əvvələ görə virusa yoluxanların sayı az idi. Ancaq karantin rejimi yumşaldılan kimi virus şiddətlə yayıldı. Hazırda görülən tədbirlərin nəticəsidir ki, gündəlik yoluxma göstəricisi 400-dən enib.
Qeyd edək ki, ötən həftə virusa yoluxanların sayında azalma müşahidə olundu. Belə ki, virusa yoluxanların sayı 320-370 arasında dəyişirdi. Ancaq iyulun 26-də 417 nəfər virusa yoluxdu. Maraqlıdır, artımın qeydə alınması sərt karantin rejiminin uzadılmasına səbəb ola bilərmi? Onu da qeyd edək ki, sərt karantin rejimi avqustun 5-də bitir.
“...xəstələrin 15 faizə qədəri bu xəstəliyi simptomsuz keçirir”
Həkim Uğur Ağamalıyev deyir ki, hazırkı vəziyyətdə qadağaların yumşaldılmasından danışmaq tezdir: "Çünki Azərbaycanda yeni yoluxan xəstələrin sayı hələ də yüksək həddədir. Bundan əlavə, xəstələrin 15 faizə qədəri bu xəstəliyi simptomsuz keçirir. Təəssüf ki, digər ölkələrdə olduğu kimi, bizdə də COVID-19 xəstəliyi ciddiyə alınmır və bəzi insanlar tərəfindən hansısa siyasətin bir parçası kimi düşünülür. Ona görə də cəmiyyətin bu qismi və xəstəliyi simptomsuz keçirən insanlar qadağalar yumşaldılandan sonra da müvafiq qaydalara əməl etməsələr, bu, daha çox yoluxma deməkdir. Bu səbəbdən insanlar yumşalmadan sonra da çox ehtiyatlı olmalı, anlamalıdırlar ki, ölkənin taleyi onlardan asılıdır”.
Son olaraq bildirək ki, sərtləşdirmə rejiminə qayıtmamağın yeganə yolu insanların müvafiq tələblərə əməl etməsidir. Bir dəfə yumşalmaya keçdik, sonra nəticə çıxarmadıq, yoluxma kəskin artdı. Bu səhvi təkrarlamamalıyıq. Bundan nəticə çıxarmasaq, yenidən sərt karantin rejiminə keçmək məcburiyyətində qalacağıq.
Günel CƏLİLOVA
