Hər bir dövlətin əsas funksiyalarından biri əhalinin sosial müdafiəsini təşkil etmək, maddi nemətlərin ədalətli bölgüsünə nail olmaq, daxili siyasətin sosialyönümlüyünü ön planda saxlamaq, vətəndaşların sosial rifah halını yaxşılaşdırmaqdan ibarətdir.
Azərbaycanda da dövlət daim öz vətəndaşına qayğı ilə yanaşır, onun rifahının yüksəldilməsini, sosial problemlərinin həllini prioritet vəzifə kimi görür və bu istiqamətdə məqsədyönlü siyasət həyata keçirir.
Xüsusi ilə də şəhid ailələri və Qarabağ müharibəsi əlilləri, onların ailə üzvləri daim dövlətin diqqət və qayğısı ilə əhatə olunurlar. Bu kateqoriyaya aid olan insanlara mənzil və avtomobillər verilir, güzəşt və müxtəlif kompensasiyalarla təmin edilirlər.
Bu gün əhalinin sosial müdafiəsinin təmin edilməsi Azərbaycan dövlətinin qarşısında duran strateji vəzifələrdən biridir. Yəni sosial siyasət dövlət siyasətinin prioritetidir.
Bunu dəyərləndirərkən Prezident İlham Əliyev qeyd edib ki, sosial siyasət həmişə prioritet olub və bundan sonra da olacaq. Bütün atılan addımlar bir daha onu göstərir ki, Azərbaycan sosial dövlətdir: "Siyasətimizin mərkəzində Azərbaycan vətəndaşı dayanır. Azərbaycan vətəndaşının maraqları bizim üçün hər şeydən üstündür. Azərbaycanda iqtisadi islahatların həyata keçirilməsi insanların daha da yaxşı yaşamaları məqsədi daşıyır”.
Dövlət aztəminatlı ailələrin, şəhid ailələrinin, Qarabağ müharibəsi əlillərinin, məcburi köçkünlərin mənzil-məişət problemlərinin həllində neqativ halların tam aradan qaldırılması istiqamətində ciddi addımlar atır.
Bu günlərdə Prezidenti İlham Əliyevin sərəncamı ilə müharibə əlillərinə 400 avtomobilin təqdim olunacaq.
“Prezidentin sərəncamı ilə əlillərə 400 avtomobil hədiyyə edilib, ümumiyyətlə, bu tendensiya hər il davam edir”
“Sosial Hüquqların” Araşdırılması İctimai Birliyinin sədrinin sədri Mayis Əliyev bildirdi ki, əlilliyin sosial müdafiəsində ən başlıca prinsip ünvanlılığın təmin olunması, sosial ədalətin bərpa olunması və əlillər üçün hər cür şəraitin yaradılmasıdır. Ölkənin qanunlarında əlillərin sosial reabilitasiyası, sosial müdafiəsi haqqında maddələr olmaqla qanunvericiliyin mövcud ümumi bazası əlillərin sosial müdafiəsinə xidmət edir: “Lakin bununla bərabər, bütün cəmiyyətdə istər Qarabağ əlillərinə, istərsə də digər əlillərə qarşı mərhəmət prinsipi oyanmalıdır. Bunun üçün əlillər cəmiyyətlərindən, mətbuatdan da çox şey asılıdır. Əlillər də işlərini düzgün tənzimləməlidirlər. Əlillərin cəmiyyətə reinteqrasiyası, əlilliyin bərpası, əlillərin reabilitasiyası ən aktual məsələlərdir. Biz əslində əlil sözünün işlənməsinin əleyhinəyik. Çox zaman cəmiyyətimiz "fiziki qüsurları olan", "sağlamlığı məhdud olan" kimi ifadələr işlətməklə əlillərə olan münasibətin aliliyini göstərmiş olur. Belə insanlarla yaxından maraqlananda müşahidə edirsən ki, onların hər birində fərqli bacarqılar, vərdişlər var. Onlardakı bu bacarıq və vərdişləri inkişaf etdirmək lazımdır. Dövlətin göstərdiyi qayğı ilə yanaşı, belələrinə mənəvi dəstək olmaq vətəndaşların da borcudur. Fiziki qüsurlu, sağlamlıq imkanı məhdud, amma xüsusi bacarığı olan əlillərin bizim mənəvi dəstəyimizə çox böyük ehtiyacı var. Dövlət və bütövlükdə cəmiyyətin dəstəyi ilə biz onları cəmiyyətə inteqrasiya edə bilərik".
Həmsöhbətimiz onu da əlavə etdi ki, dövlət tərəfindən əlillərə xüsusi qayğı göstərilir. Onların sosial problemlərinin həll olunması istiqamətində hər bir iş görülür: “Prezidentin sərəncamı ilə əlillərə avtomobil hədiyyə edilib. Məlumat üçün bildirək ki, bu tendensiya hər il davam edir”.
Son olaraq bildirək ki, Azərbaycan dünya miqyasında nadir ölkələrdəndir ki, burada ünvanlı sosial yardım proqramı çox geniş miqyas alıb. Dünyada ikinci belə bir dövlət yoxdur ki, şəhid ailələri, müharibə əlilləri və onların ailə üzvlərinə bu qədər qayğı göstərsin.
Günel CƏLİLOVA
