Bakı şəhərinin Yasamal rayonu ərazisində, Həsən bəy Zərdabi və Akim Abbasov küçələrinin kəsişməsində, “Üç Tac” yaşayış kompleksinin yaxınlığında yerləşən kiçik süni su hövzəsinin sahilində son günlər ərzində aparılmış torpaq planlaşdırma işləri ilə bağlı sosial media və mətbuatda məlumatlar yer alır. Qeyd olunur ki, “Üç Tac” adlanan binaların qarşısında yerləşən gölün ərazisi qurudularaq, yerində tikinti aparılacaq. Məlumat üçün bildirək ki, həmin göl "Qanlı göl" adlanır.
Maraqlıdır, göl qurudularsa, bunun ekologiyaya nə kimi ziyanı ola bilər?
İradə İbrahimova: “Aparılan araşdırmadan sonra ərazidə tikinti işi dayandırıldı”
Ekologiya və Təbii Sərvətlər Nazirliyinin mətbuat xidmətinin rəhbəri İradə İbrahimova bizimlə söhbətində qeyd etdi ki, “Tri korona” yaşayış kompleksinin arxasındakı gölün qurudulması və ərazidə tikinti işlərinin aparılması ilə bağlı Nazirliyə şikayət daxil olub:“Əməkdaşlar qeyd olunan ərazidə gölün qurudulması və ərazidə tikinti işlərinin aparılması ilə bağlı daxil olan şikayəti yerindəcə araşdırdı. Nəticə olaraq, ərazidə tikinti işləri dayandırıldı”.
Telman Zeynalov: “Qanlı göl”ün qurudulması qrunt sularının səviyyəsinin aşağı düşməsinə səbəb olacaq”
Ekoloq Telman Zeynalov “Bakı-Xəbər”ə açıqlamasında qeyd etdi ki, Yasamal rayonunda, “Tri korona” yaxınlığındakı gölün qurudulmasının qarşısının alınması düzgün addımdır, çünki gölün qurudulmasının bir çox mənfi təsirləri ola bilər:“İlk növbədə qeyd edim ki, gölün qurudulması qrunt sularının səviyyəsinin aşağı düşməsinə səbəb olacaq. Həmçinin, zəhərli maddglər buxarlanıb ətrafa yayıla bilər. Beləliklə, gölün qurudulması həm iqlimə mənfi təsir edəcəkdi, həm də ekologiyanın korlanmasına”.
Həmsöhbətimiz onu da əlavə etdi ki, göl qurudularsa, həmin ərazidə yaşıllıq azalar.Təbii ki, bu da oksigen çatışmazlığına səbəb olar:“Eyni zamanda, göl qurudularsa, həmin ərazilərdə torpaq sürüşmələrinin miqyası da genişlənir. Torpaq qurudulduğu üçün ərazidəki qrunt suları çəkilir. Odur ki, bir az yağıntı olan kimi torpaq qatı ağır gil üzərindən sürüşüb aşağıya doğru hərəkət edir”.
Xalid Ağaliyev: “Pandemiya və son günlər dövlət sərhədimizdə yaşanan gərginliyin kölgəsində ərazidə rahatlıqla tikinti işlərinə start verildi, ancaq burada hansı işlərin görüləcəyi bəlli deyildi”
Ekspert Xalid Ağaliyevin sözlərinə görə, son illərdə dəfələrlə həmin ərazidə hansısa tikinti işlərinin aparılmasına cəhdlərin olduğu, ancaq insanların etirazları sayəsində gölün qurudulmasının önləndiyi deyilir: “Yadımdadır ki, 5-10 il əvvəl gölün ətrafının parka, istirahət guşəsinə dönüşdürüləcəyi ilə bağlı açıqlamalar oldu, lövhəciklər asıldı. İndi görünən budur ki, pandemiya və son günlər dövlət sərhədimizdə yaşanan görginliyin kölgəsində ərazidə rahatlıqla tikinti işlərinə start verilib. Burada hansı işlərin görüləcəyi bəlli deyil. Sosial mediada yayılan bilgilərə görə, göl qurudulacaq və ya kiçildiləcək, bina tikiləcək. Bundan başqa, ərazidəki otelin genişləndirildiyini deyənlər də var. İctimaiyyətin ərazidə hansı işlərin görülməsinin planlanması barədə bilmək haqqı var”.
Qeyd edək ki, iyulun 19-da Yasamal rayon İcra Hakimiyyəti “Tri Korona” kimi tanınan binaların yaxınlığında heç bir tikinti işləri aparılmadığı haqda xüsusi açıqlama yaymışdı: “Ərazi abadlaşdırılır, tullantılardan təmizlənir. Bəzi media orqanlarında iddia olunduğu kimi heç bir inşaat yoxdur, göl qurudulmur”.
Məsələ ilə bağlı Yasamal rayon İcra Hakimiyyəti ilə əlaqə saxlamağa çalışdıq. Lakin qurumdan telefona cavab verən olmadı.
Mütəxəssislərin dediyindən belə aydın oldu ki, “Tri korona” yaxınlığındakı göl qurudularsa həmin ərazidə oksigen çatışmazlığına səbəb olar.
Günel CƏLİLOVA
