Son bir ayda ölkəmizin rayon və şəhərlərində sərt karantin rejiminin tətbiq edilməsi öz əhəmiyyətini göstərməkdədir. Karantin rejiminin uzadılması nəticəsində bir neçə həftədir ki, artıq sağalmalar yoluxmaları üstələyir. Nazirlər Kabineti yanında Operativ Qərargahın yaydığı sonuncu məlumata görə, ölkə üzrə 517 nəgər virusdan müalicə olunaraq sağalıb, yoluxanların sayı isə 388-dir.
Gördüyünüz kimi bir gündə 129 nəfər virusdan sağalaraq öz ailəsinə dönüb. Ekspertlər hesab edir ki, son günlər sağalanların sayının bu şəkildə artmasına səbəb respublikamızın bir sıra rayon və şəhərlərində tətbiq edilən sərt karantin rejimi ilə bağlıdır. Ekspertlərin fikrincə, karantinin uzadılmasının faydasını biz artıq hiss edirik. Mütəxəssislər qeyd edir ki, virusun kəskin surətdə artığı dövrlərdə əhali arasında aparılan maarifləndirmə işinin də burada rolu az deyil.
“Son həftələrin şənbə və bazar günlərində ictimai nəqliyyatın hərəkətinin dayandırılması, digər məhdudiyyətlərin tətbiq edilməsi, insanların artıq sosial məsafə saxlamaq, maska taxmaq kimi vərdişlərinin formalaşması…”
Həkim-terapevt Leyla Bayramlı “Bakı-Xəbər”ə bildirdi ki, sərt karantin rejiminin uzadılması son həftələrin virusla bağlı statistikasının müsbət istiqamətdə dəyişməsinə səbəb olub. Mütəxəssis hesab edir ki, bu gün həkimlər də, mətbuat da, ictimaiyyət nümayəndələri də əhaliyə çağırışlar edir, onların virusa yoluxmaması üçün dövlətin mövcud təlimatlarını təbliğ edir. “Karantin rejiminin uzadılmasında əsas məqsəd Azərbaycan vətəndaşının sağlamlığının təmin edilməsidir. Son həftələrin şənbə və bazar günlərində ictimai nəqliyyatın hərəkətinin dayandırılması, digər məhdudiyyətlərin tətbiq edilməsi, insanların artıq sosial məsafə saxlamaq, maska taxmaq kimi vərdişlərinin formalaşması, metronun fəaliyyətinin dayandırılması virusun azalmasına müsbət təsir göstərir. Görülən bütün bu tədbirlər nəticəsində görürük ki, virusa yoluxanların sayında ciddi azalma var və sağalanların sayı virusa yoluxanların sayını xeyli dərəcədə üstələyir. Bir məqamı da qeyd edim ki, əvvəlki aylarla müqayisədə son günlər insanların da bir qədər məsuliyyəti artıb. Çünki vətəndaşlar artıq bilirlər ki, karantin müddətinin uzadılmasının onlara heç bir zərəri yoxdur, əksinə faydası, əhəmiyyəti var. Bu baxımdan, əvvəllər koronavirusa laqeyd yanaşanların çox hissəsi ətraflarında, ailələrində bu virusa tutulanların olduğunu gördükdən sonra qayda-qanunlara əməl etməyə başlayıblar. İndi görürsüz ki, ictimai nəqliyyatda maskasız adama təsadüf hallarda rast gəlinir, bütün marketlərə isə maskasız adam buraxılmır. Bu da işimizin xeyrinə olan haldır”.
L.Bayramlının sözlərinə görə, xüsusi karantin müddətinin avqustun 31-nə, sərt karantin rejiminin isə avqustun 5-nə qədər uzadılması müsbət haldır və bu yoluxma dinamikasının kəskin şəkildə azalmasına səbəb olacaq.
Ekspertin fikirlərindən belə qənaətə gəldik ki, karantin rejiminin uzadılmasının ən böyük faydası virusa yoluxanların sayının daha kəskin şəkildə azalması ilə nəticələnəcək və bu baxımdan, xüsusi karantin rejiminin növbəti ayda da qüvvədə qalmasının əhəmiyyəti böyükdür.
İradə SARIYEVA
