Ölkəmizdə COVİD-19 yeni növ koronavirusa yoluxma hallarının sürətlə artması hökuməti zəruri addımlar atmaq məcburiyyəti qarşısında qoydu və sərtləşdirilmiş karantin rejimi daha 2 həftə müddətinə uzadılması fikri yenidən gündəmə gəlib.
Qeyd edək ki, Operativ Qərargahın üzvləri virusun yayılma dinamikası, yoluxma hallarının artmasına imkan yaradan amillər üzrə təhlillər aparmaqla belə bir qərarın qəbul ediləcəyi ehtimalını daha öncədən irəli sürmüşdülər. Aparılan təhlillərin nəticələri və real mənzərə ən incə detallarına kimi şəffaf və ardıcıl bir şəkildə açıqlandığı üçün prinsip etibarilə, sərtləşdirilmiş karantin rejiminin uzadılacağı gözlənilir.
Prezidentin köməkçisi, Nazirlər Kabineti yanında Operativ Qərargahın üzvü Şahmar Mövsümov AzTv-yə açıqlamasında bildirib ki, sərt karantin rejiminin daha iki həftəlik uzadılması nəzərdə tutulur: “Təəssüf hissi ilə deməliyəm ki, Operativ Qərargahda bir çox müzakirələrdən sonra karantin rejiminin uzadılması haqqında və onun uzadılmasının qaçılmaz olduğu haqqında müəyyən qərarlar qəbul edilib. Karantin rejiminin əlavə 2 həftə – 15 gün uzadılması nəzərdə tutulub. Buna məcburuq”.
Adil Qeybulla: “Sərt karantin rejiminin uzadılmasına deyil, yumşaldılmasına ehtiyac var”
Professor, tibbi ekspert Adil Qeybulla hesab edir ki, sərt karantin rejiminin uzadılmasına deyil, yumşaldılmasına ehtiyac var: “Düşünürəm sərt karantin rejiminin uzanmasına ehtiyac yoxdur. Yaxşı olar ki, karantin qaydaları yumşaldılandan sonra vətəndaşların qapalı məkanlarda davranışlarına dair, insanların bir- biri ilə sosial məsafəni necə gözləmələri haqqında Operativ Qərargah təlimatlar hazırlasın. Ən əsas isə ictimai nəqliyyat, metro, satış məntəqələri, ictimai iaişə yerlərində insanların necə davranacağı ilə bağlı təlimatlar hazırlansa, sərtləşməyə ehtiyac qalmaz . Onsuz da böyük bir yoluxma potensialı var. Biz özümüzü niyə aldadırıq? Nə qədər insan evdə müalicə alır, əllərdə reseptlər gəzir. Bax reallıq budur".
Rasif Bağırov: “Karantin rejiminin sərtləşdirilməsi yoluxma dinamikasının aşağı düşməsində ciddi dəyişiklik yaradırsa, yeri gələrsə onun uzadılması, eləcə də əlavə tədbirlərin görülməsi zəruri hal ala bilər”
Həkim ekspert Rasif Bağırov bildirdi ki, koronavirusa yoluxma hallarının artım dinamikasını dayandırmaq və bu sahədə müsbət tendensiyaya, yoluxma hallarının azalmasına nail olmaq məqsədilə karantin qaydalarına birmənalı şəkildə riayət olunmalıdır: “İlkin mərhələdə xəstəlik özünü nisbətən yüngül büruzə verirdisə, bu gün təəssüf olsun ki, xəstəliyin gedişatı kifayət qədər ağır, kəskin və fəsadlaşmış şəkildə davam edir. Qısa zaman kəsiyində quru öskürək, yüksək hərarət, baş ağrıları və digər ağır simptomlar vətəndaşları çətin vəziyyətə salır. Azərbaycanda pandemiyanın ilk başladığı gündən apardığı preventiv tədbirlər, operativ qərargahın yaradılması, qərargah üzvlərinin vəziyyətə uyğun şəkildə qəbul etdiyi qərarlar bu gün ölkə daxilində yoluxma hallarını nisbətən də olsa, nəzarətdə saxlamağa kömək edir.
Karantin rejiminin sərtləşdirilməsi yoluxma dinamikasının aşağı düşməsində ciddi dəyişiklik yaradırsa, yeri gələrsə onun uzadılması, eləcə də əlavə tədbirlərin görülməsi zəruri hal ala bilər”.
Karantin rejiminin uzadılması ilə bağlı söhbətləşdiyimiz mütəxəssislərini fikri fərqli oldu. Ancaq koronavirusun yox olması üçün karantin rejiminin uzadılmasına ehtiyac varsa, buna əməl olunmalıdır.
Günel CƏLİLOVA
