Dünya hələ COVİD 19- təhlükəsindən yaxa qurtarmayıb. Azərbaycanda da sərt karantin rejimi qüvvədədir. Hələ də təbliğat aparılır, maarifləndirici tədbirlər həyata keçirilir. Əhalinin sağlamlığının qorunması istiqamətində bütün dövlət və özəl strukturlar səfərbər olunub.
Ancaq iyulun 14-15-nə keçən gecə Bakı böyük insan selinə şahidlik etdi. Xalq orduya və dövlətə öz dəstəyini bildirmək üçün küçələrə axışdı. Milli həmrəylik, qürur hissini yaşasaq da, COVİD-19 pandemiyasının hələ məhdudlaşdırılmadığı, yoluxma hallarının yüksək olduğu bir vaxtda aksiyaların keçirilməsi, minlərlə insanların bu aksiyalara qoşulması virusun daha geniş yayılmasına və insanların həyatını təhlükə qarşısına qoymasına əlverişli şərait yaratdı.
Həmin gün keçirilən aksiya zamanı təəssüf ki, sosial məsafə gözlənilmədi, maskalardan istifadə olunmadı, insanlar arasında sıx təmaslar adi hala çevrildi. Vətəndaşların kütləvi şəkildə həlak olmuş hərbçilərimizin yaşadığı ünvanlara toplaşması və onların yaxınlarını ziyarət etməsi, dəfn mərasimlərində müşahidə olunan kütləvilik virusun yayım sürətini daha da artırır. Bir müddət sonra bəlkə də biz bu kütləviliyin acı nəticələrini yaşayacağıq.
Cəlal İsayev: “Orduya dəstək yürüşlərində heç kəs karantin qaydalarını gözləmədi, bu da yoluxma hallarının artmasına səbəb olacaq”
Baş infeksionist Cəlal İsayev bildirdi ki, orduya dəstək yürüşlərində heç kəs karantin qaydalarını gözləmədi. Bu da yoluxma hallarının artmasına səbəb ola bilər. Yüzlərlə insan bir yerə toplaşdı və maska taxmadı. Hamısı yaxın məsafədə idi. Aralarında 1-2 nəfər virus daşıyıcı olsa, başqalarına keçirmə ehtimalı yüksəkdir: “İtkimiz ağırdır. Ordumuzun qəhrəman, yüksək çinli zabitləri şəhid olub. Ürək ağrısı ilə bu xəbərləri eşidirik. Amma yaxınları da, dəfndə iştirak edənlər də karantin dövrünü düzgün qiymətləndirməlidir. İnsanlar yenidən toplaşacaqlarsa, maska taxmayacaqlarsa bunun sonu ağır olacaq. Bir müddət sonra bu kütləviliyin acı nəticələrini görəcəyik və yaşayacağıq. Bütün bunlara yol verməmək üçün insanlarımız kütləvi aksiyalarda, ziyarətlərdə, dəfn mərasimlərində iştirakdan çəkinməlidir”.
Həmsöhbətimiz hesab edir ki, yaxın günlər ərzində virusa yoluxma dinamikasında artım müşahidə olunacaq: “Bir tərəfdən ermənilərlə müharibə şəraitindəyik, digər tərəfdən isə COVID-19 pandemiyası ölkədə hökm sürür. Üçüncü bir tərəfdən isə yenidən toplaşma stabilliyin pozulması deməkdir. İnsanların toplaşıb qaydalara əməl etmədən nümayişlər keçirməsi ölkəni təhdid altında qoymaq deməkdir. Gəlin bu işə diqqətli yanaşaq və sabitliyimizi qoruyaq. Bizim iki düşmənimiz var. Onlara qarşı birlikdə mübarizə aparaq”.
Müşfiq Hüseynov: “İyulun 14-də yoluxma halları olubsa, bu həndəsi silsilə ilə bütün şəhərin yoluxması deməkdir”
Həkim-farmakoloq Müşfiq Hüseynov bildirdi ki, son günlərdə koronavirusdan yenicə sağalan xəstələrin sayı yoluxanların sayını üstələmiş, müsbət qrafikə keçmişdik, xəstəxanalar boşalmağa başlamışdı: “Həqiqətən dərd gələndə batmanla gələrmiş. Ölkə olaraq, vətəndaş olaraq, ciyərimiz yandı. Xüsusilə xalqa və əsgərə bu qədər yaxın yüksək rütbəli zabitlərimizin şəhidliyi iki qat ağırdır. Hər kəsi qınamaq mümkün deyil, amma pandemiya nöqteyi nəzərindən baxdığımızda, zamanlama olaraq çox vaxtsız oldu. Yenicə sağalan xəstələrin sayı yoluxanları üstələmiş, mqübət qrafikə keçmişdik. Xəstəxanalar boşalmağa başlamışdı. Təbii ki, yüksək emosional notlarda keçən, təxmin edirəm ki, 200-300 min insanın iştirak etdiyi yürüşdə hansısa sosial məsafə, təhlükəsizlik tədbiri haqqda danışmaq mümkün deyil. Çox az sayda yürüyüş iştirakçısı maska taxmışdı. Polislə aralarında nəinki 2 metrə, bəzən 50 sm məsafə vardı. Əgər dünən yoluxma halları olubsa, bu həndəsi silsilə ilə bütün şəhərin yoluxması deməkdir”.
Sonda bildirək ki, insanlar həmin gün ağılları ilə deyil, hissləri ilə hərəkət etdilər. Təbii olaraq, pandemiya dövründə aksiya etmək, həmrəylik nümayiş etdirmək çox riskli idi. Ağılla düşünmək nöqteyi nəzərindən baxsaq, bu, qaydalara ziddir. Görünür ki, burada hisslər üstünlük təşkil edib. Ancaq unutmaq lazım deyil ki, pandemiya ilə mübarizə zamanında kütləviliyə yol vermək olmaz, sonradan bunun acı nəticələrini görə və yaşaya bilərik.
Günel CƏLİLOVA
