05/08/2020 18:08
728 x 90

“Parlaq Şəhər” MMC aylıq 3 manata görə Hövsan camaatını narazı salır?...

Bakı Şəhər İcra Hakimiyyəti: “Bəzi şəxslərın özlərini icra hakimiyyəti strukturlarının işçiləri kimi təqdim etməyə çalışaraq pullu xidmətlər göstərməyə cəhd etmələri barədə bizə məlumatlar daxil olur”

img

Koronavirus (COVID-19) infeksiyasının ölkə ərazisində yayılmasının, onun törədə biləcəyi fəsadların qarşısının alınması məqsədilə bir sıra tədbirlər həyata keçirilir. Bu tədbirlər nəticəsində ölkə ərazisində karantin və sərt karantin rejiminin tətbiqini, təhsil müəssisələrində tədrisin dayandırılmasını, sərhədlərin bağlanılmasını, kütləvi tədbirlərin qadağan olunmasını, insanların qrup halında bir araya cəmləşməsinin qadağan olunmasını, tibbi maskadan istifadənin vacibliyini və digər amilləri göstərə bilərik.

Bununla yanaşı, Azərbaycanda koronavirus pandemiyasına qarşı mübarizə tədbirləri çərçivəsində şəhər və rayonlarda mütəmadi olaraq dezinfeksiya işləri aparılır. Dezinfeksiya işləri küçə və parklarda, dövlət və özəl qurumların inzibati binalarında, təhsil müəssisələrində aparılır. Bütün bunlar hamısı koronavirusun geniş yayılmasının qarşısının alınmasına yönəlib. Mütəxəssislər koronavirusla mübarizə çərçivəsində dezinfeksiya işlərinin böyük əhəmiyyətə malik olduğunu bildirirlər. Qeyd olunur ki, dezinfeksiyaedici məhlullar yuyulan bütün əraziləri virusdan təmizləyə bilir.

Qeyd etdiyimiz kimi, virusdan qorunmaq üçün şəhərin bütün əraziləri, iş yerləri, yaşayış binaları mütamadi olaraq dezinfeksiya olunur. Ancaq bəzi işbazlar bunu pullu edir. Hətta vətəndaşlardan bunun müqabilində aylıq pul da tələb edirlər. Belə ki, Bakı şəhər Suraxanı rayon Hövsan qəsəbəsində “Parlaq Şəhər” MMC adlı şirkət blokları dərmanlamaq üçün sakinlərdən 3 aylıq (hər aya 1 manat olmaqla) 3 manat pul tələb edir.

Özlərini özəl şirkət kimi təqdim edən 3 şəxs ödənişli dərmanlanma həyata keçirirlər. Şirkətin əməkdaşı Mustafayev Elçin Xanlar oğlu gördükləri işin rəsmi qaydada aparıldığını bildirir. Yəni dezinfeksiya üçün sakinlərdən ödəniş tələb etməyin rəsmi olduğunu bildirdilər.

Ancaq həmin şəxslər unudur ki, Prezident İlham Əliyevin tapşırıq və göstərişlərinə uyğun olaraq, Bakı Şəhər İcra Hakimiyyəti tərəfindən paytaxtda koronavirus (COVID-19) pandemiyasına qarşı mübarizə tədbirləri çərçivəsində şəhərin bütün rayonlarında müvafiq işlər görülür. Və bu istiqamətdə görülən işlər pulsuzdur.

  • “Dövlət balansında olan binalarda, binaların bloklarında, liftlərdə, həyətlərdə və ümumi istifadə yerlərində dezinfeksiya işləri dövlət vəsaiti hesabına aparılır və bunun üçün heç bir vəsait tələb edilə bilməz””

Məsələ ilə bağlı Bakı Şəhər İcra Hakimiyyəti ilə əlaqə saxladıq. Bakı Şəhər İcra Hakimiyyətindən bizə bildirildi ki, son günlərdə paytaxt rayonlarında koronavirus infeksiyasının yayılmasının qarşısının alınması məqsədilə aparılan dezinfeksiya işləri zamanı bəzi şəxslərın özlərini icra hakimiyyəti strukturlarının işçiləri kimi təqdim etməyə çalışaraq pullu xidmətlər göstərməyə cəhd etmələri barədə məlumatlar daxil olur: “Bildiririk ki, dövlət balansında olan binalarda, binaların bloklarında, liftlərdə, həyətlərdə və ümumi istifadə yerlərinində dezinfeksiya işləri dövlət vəsaiti hesabına aparılır və bunun üçün heç bir vəsait tələb edilə bilməz”.

Bakı Şəhər İcra Hakimiyyəti belə hallar mövcud olduğu təqdirdə, hüquq-mühafizə orqanlarına və ya qaynar xəttə müraciət edilməsini xahiş edir.

Qeyd edək ki, koronovirusun yayılmasından istifadə edən işbazlar isə bundan bəhrələnməyə, artıq gəlir əldə etməyə çalışırlar. Bu kimi halların artmaması üçün aidiyyatı qurumlar məsələni diqqətdə saxlayıb, vətəndaşlardan pul tələb edənləri cəzalandırmalıdır.

Günel CƏLİLOVA

Son xəbərlər