10/08/2020 19:10
728 x 90

Azərbaycanda ikinci uğur dalğası – “COVİD”ə yoluxanlarla sağalanların sayı yaxınlaşır...

img

Azərbaycan Respublikası Nazirlər Kabineti yanında Operativ Qərargah koronavirusla bağlı KİV nümayəndələri üçün brifinq keçirib.

“Trend”-in məlumatına görə, brifinqdə Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev, Tibbi Ərazi Bölmələrini İdarəetmə Birliyinin (TƏBİB) şöbə müdiri Yaqut Qarayeva və Səhiyyə Nazirliyinin Aparat rəhbəri Nadir Zeynalov jurnalistləri maraqlandıran suallara cavab verib.

  • Kubadan Azərbaycana həkim heyəti gəlir…

“Dünyada epidemioloji vəziyyət heç də qənaətbəxş deyil. Azərbaycan milli və regional səviyyədə olduğu kimi, qlobal səviyyədə də koronavirus epidemiyasına qarşı ardıcıl səylərini davam etdirir”. Bunu Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib.

H.Hacıyev bildirib ki, Azərbaycan Prezidenti İlham Əliyevin təşəbbüsü ilə BMT-nin xüsusi sessiyası işə başlayır. O qeyd edib ki, BMT tarixində cəmi 30 xüsusi sessiya keçirilib və bu xüsusi sessiya Azərbaycan Prezidenti İlham Əliyevin təşəbbüsü ilə həyata keçirilir.

Onun sözlərinə görə, Azərbaycanın epidemiya ilə mübarizə istiqamətində gördüyü tədbirlər xaricdən olan həmkarları tərəfindən yüksək qiymətləndirilir.

H.Hacıyev bildirib ki, pandemiyaya qarşı mübarizəyə dəstək olmaq üçün Kubadan Azərbaycana həkim heyətinin gəlməsi nəzərdə tutulur. O qeyd edib ki, Kubanın epidemiyaya qarşı zəngin təcrübəsi var, ebola virusu ilə mübarizədə Kubanın təcrübəsi dünyada yüksək qiymətləndirilir.

  • Xarici ölkələrə səfərlərdən çəkinin…

 “Azərbaycan vətəndaşlarına xarici ölkələrə səfərlərdən çəkinməyi tövsiyə edirik. Əgər xüsusi tibbi və digər ehtiyaclar yoxdursa, xarici ölkələrə səfər etmək tövsiyə olunmur” - deyən H.Hacıyev bildirib ki, koronavirusla bağlı epidemioloji vəziyyət hər an dəyişə və ölkələrin qoyduğu sərt karantin qaydaları vətəndaşlarımızı çətin vəziyyətdə qoya bilər:“Belə halda vətəndaşlarımızın ölkəyə geri qayıtmasında çətinliklər yarana bilər. Ona görə də yaxşı olar ki, tibbi və ya digər xüsusi zərurət olmadığı halda vətəndaşlarımız xarici ölkələrə səfərlərdən çəkinsinlər”.

  • Hikmət Hacıyev:“İctimai nəqliyyatdan istifadə edirəm”

“Mən özüm də ictimai nəqliyyatdan istifadə edirəm” - deyən H.Hacıyev bildirib ki, istəsəniz sizə metro kartımı göstərə bilərəm:"Avtobuslarda sıxlıq vizual görünürdü. Nəqliyyat agentliyinə bildirildi ki, avtobusların sayı çoxaldılsın. Metronun fəaliyyəti epidemioloji vəziyyət nəzərə alınaraq bağlanıb. İş saatlarında fərqli vaxtlar tətbiq olunub”.

  • Əfqanstanda xidmət aparan hərbçimiz koronavirusa yoluxdu

H.Hacıyev qeyd edib ki, Azərbaycanın Əfqanstanda sülhməramlı qüvvələr tərkibində xidmət aparan bir hərbçisinin koronavirusa yoluxması qeydə alınıb. H.Hacıyev bildirib ki, həmin hərbçi nəzarətə götürülüb və digər hərbçilər xidmətlərini davam etdirir.

PA rəsmisi, həmçinin, Azərbaycanın xarici ölkələrdəki diplomatik korpuslarında da yoluxmanın qeydə alındığının müşahidə edildiyini deyib.

Onun sözlərinə görə, Azərbaycanın Meksika və Moldovada olan səfirliklərinin əməkdaşları arasında yoluxma halları var. H.Hacıyev bildirib ki, buna baxmayaraq, səfirlikər öz fəaliyyətlərini davam etdirir.

  • Pandemiya dövründə də Azərbaycanda beynəlxalq daşımalar dayanmadı

PA rəsmisi bildirib ki, koronavirus pandemiyası dövründə Azərbaycanda beynəlxalq daşımalar dayanmayıb. H.Hacıyev deyib ki, “Şimal-Cənub”, “Şərq-Qərb” beynəlxalq nəqliyyat dəhlizlərinin aktiv fəaliyyəti təmin olunub.

Onun sözlərinə görə, xaricdən idxal olunan hər hansı məhsulda qıtlıq olmayıb. PA rəsmisi vurğulayıb ki, Qərb sərhəd-keçid məntəqəsində yerli və əcnəbi sürücülər testdən keçirilir: “Pandemiya başlayan dövrdən də şimal istiqamətindən polisin müşayiəti ilə keçid təmin olunur. Bu sahədə hər hansı problem varsa, birgə araşdıraraq həll yollarını tapmalıyıq”.

  • Yaya görə karantinlə bağlı şikayətlər daxil olur

Y.Qarayeva deyib ki, yay vaxtlarına görə karantinlə bağlı şikayətlər daxil olur. Onun sözlərinə görə, əsasən insanlar yay aylarında rayonlara getmək istəyir:"Bildirim ki, bütün epidemiyalarda ən birinci silah həmişə karantin olub. Əgər vəziyyət normallaşarsa, bu barədə hansısa qərar qəbul oluna bilər. Karantinin yumşaldılması vəziyyətin normallaşmasından asılıdır. Vətəndaşlar qaydalara əməl etsələr, bu sahədə nailiyyət əldə edə bilərik".

  • Yoluxma ilə sağalma sayı eyniləşir

Y.Qarayeva bildirib ki, yoluxma ilə sağalma sayı eyniləşir. Onun sözlərinə görə, artıq sabitləşmə müşahidə olunur:"Yoluxanlarla sağalanlar arasında eyniləşmə baş verir. Artıq vətəndaşların qaydalara əməl etməsinə görə biz sabitləşməyə nail olmuşuq. İnsanlar daha ciddi şəkildə qaydalara əməl edir. Vətəndaşlar xəstəliyin ciddiliyinə inanır. Nə qədər qaydalar sərtləşsə də, biz birləşməsək, xəstəliyə qalib gələ bilmərik".

  • Xəstələrin müalicəsi üçün xaricdən mütəxəssislər gətirilib

Y.Qarayeva qeyd edib ki, Azərbaycandakı xəstələrin müalicəsi üçün xaricdən mütəxəssislər cəlb olunub. Onun sözlərinə görə, "Gilan holdinq", "Pasha holdinq", "Azərbaycan Beynəlxalq Bankı" Azərbaycana xaricdən həkimlərin gətirilməsində dəstək göstəriblər.

Y.Qarayeva bildirib ki, iş yerlərinin sayının azaldılması barədə qərar veriləndən sonra metro bağlandı. Onun sözlərinə görə, bu barədə qərar veriləndən sonra vəziyyət araşdırılaraq bu nəticəyə gəlinib:"Əvvəlcə icazələrin sayı azaldılıb, iş yerlərində işçilərin məhdud sayda icazəsi verilib. Bu qərar bir şəxs tərəfindən verilmir. Məsələ araşdırılır, vəziyyət qiymətləndirilir və sonda qərar verilir".

“TƏBİB-ə müxtəlif idarə və təşkilatlardan tez-tez müraciətlər olunur ki, ofislərdə əməkdaşları test edilsin” – deyən Y.Qarayevanın sözlərinə görə, PSR testi əsasən yoluxma simptomu olan şəxslərdə aparılır:"Yoluxma nətcələri də tez-tez dəyişə bilər. Bu, insanlarda rahatlıq yarada bilər ki, test olundusa, daha yoluxma olmayacaq. Vətəndaşlar sadəcə qaydalara və təmizliyə diqqət yetirməlidir".

Y.Qarayeva deyib ki, dializ xəstələrinin sərt karantin şəraitində xəstəxanaya çatdırılmasında problem olmayıb. Onun sözlərinə görə, sərt karantin günlərində ictimai nəqliyyat işləməsə də, Bakı Nəqliyyat Agentliyi bunun üçün xüsusi nəqliyyat vasitəsi ayırıb:"Bu həftə sonu sərt karantin elan olunan ərazilərdə dializ xəstələrinin xəstəxanalara çatdırılması təmin ediləcək. Bu sahədə hansısa problem yaranacağı gözlənilmir. Bu məsələ diqqətdə saxlanır".

  • Yoluxma sayında eyniləşmə, sabitlik…

TƏBİB-in şöbə müdiri qeyd edib ki, hər bir infeksion xəstəlik insandan-insana yoluxur və bunun qarşısını almaq üçün məsafə lazımdır. Onun sözlərinə görə, ailə içərisində yoluxma varsa, kiçik ocaqlar kimi nəzarətdə saxlanılır:"Biz karantini yoluxmanın sayını azaltmaq üçün deyil, yoluxanlarla sağalanlar arasında stabilləşmə üçün etdik. Bu bizə çarpayı sayını nizamlamağa imkan verdi. Hazırda biz yoluxma sayında eyniləşmə, sabitlik əldə etmişik".

  • Sərt karantin rayonlarının bəziləri siyahıdan çıxarıla bilər

Y.Qarayeva bildirib ki, epidemioloji vəziyyətin dəyişməsindən asılı olaraq sərt karantin rejiminin tətbiq edildiyi rayonların bəziləri siyahıdan çıxarıla bilər. Onun sözlərinə görə, vəziyyətdən asılı olaraq bu siyahıya başqa rayonlar da əlavə edilə bilər:"Bu, rayonlardakı vəziyyətdən asılıdır. Karantin elan olunmayan ərazilərdə epdemioloji vəziyyət nəzarət altındadır. Digər rayonlarda da vəziyyət idarəolunan olsa, karantin siyahısından çıxarıla bilər".

  • Bakıdakı COVİD məntəqələrinə gün ərzində nə qədər müraciət daxil olur…

Səhiyyə Nazirliyinin Aparat rəhbəri Nadir Zeynalov isə deyib ki, Bakıda yaradılan COVİD məntəqələrinə gün ərzində 700-800 müraciət edilir. Onun sözlərinə görə, təcili yardım xidmətinin üzərinə düşən yükün azaldılması üçün təqribən 2 həftə əvvəl COVİD xəstələrinin ev şəraitində müalicəsi məsələsinə baxılııb.

Nazirlik rəsmisi əlavə edib ki, hazırda Bakıda 89 poliklinika əsasında 39 COVİD məntəqəsi yaradilib: “Bu məntəqələrə gün ərzində 700-800 müraciət edilir. Əvvəl bu çağırışların əksəriyyəti təcili yardımın üzərinə düşürdü, indi isə bu yük bir qədər azaldılıb. Düşünürəm ki, müəyyən müddətdən sonra təcili yardımla bağlı çağırışlarda gecikmələrlə üzləməyəcəyik”.

  • Bakıda koronavirusdan evdə müalicə olunanların sayı... 

N.Zeynalov bildirib ki, Bakı üzrə ambulator şəraitdə 10 202 koronavirusdan müalicə olunan var. N.Zeynalov qeyd edib ki, bunlar simptomsuz, az simptomlu şəxslərdir:"Bunların arasında uşaqlar da var, yaşlılar da. Həmin şəxslər mütəmadi nəzarətdə saxlanır. Regionlarda evdə izolyasiya tədbirlərinə hələ ki, ehtiyac yoxdur".

  • Səhiyyə nazirinin səhhətində heç bir problem yoxdur

N.Zeynalov Səhiyyə nazirinin səhhətində heç bir problem olmadığını da deyib. Onun sözlərinə görə, nazir hazırda iş başındadır:"Səhiyyə nazuri bir neçə dəfə pandemiya dövründə müsahibə də verib: "Səhiyyə Nazirliyinin nümayəndələri ilə media arasında da görüşlər olur. Nazirlik əməkdaşları da media ilə mütəmadi əlaqə saxlayır".

Son xəbərlər