08/08/2020 10:08
728 x 90

Musiqi məktəbləri Mədəniyyət Nazirliyinin tabeliyindən Təhsil Nazirliyinə - təklif ətrafında qızğın müzakirə başladı…

img

Ölkəmizdə fəaliyyət göstərən musiqi məktəbləri Mədəniyyət Nazirliyinin tabeçiliyindədir. Musiqi profilli bir çox məktəblərdə baş verən qanunsuzluqlarla bağlı kifayət qədər məlumatlar var. Nazirlik tərəfindən kurasiya edən musiqi məktəblərində plastik kartlara qanunsuz pul köçürmələrindən tutmuş qeyri-ixtisas sahiblərinin bura cəlb edilməsinə, peşəkar musiqi müəllimlərinin isə buradan uzaqlaşdırılmasına, şişirdilmiş statların tərtib edilməsinə qədər saysız problemlər var.

Bu gün Bakıda və bölgələrdə mövcud olan musiqi məktəblərində işləyən müəllimlərinin maaşından direktorlar vasitəsilə qanunsuz pul tutulmaları isə ayrıca bir yazının mövzusudur.

Son zamanlar musiqi məktəblərinin Mədəniyyət Nazirliyinin  balansından çıxarılaraq Təhsil Nazirliyinin tabeçiliyinə verilməsi məsələsi aktuallaşıb. Mədəniyyət mütəxəssislərinin bir çoxunun qənaətinə görə, bu məktəblər Mədəniyyət Nazirliyindən alınıb Təhsil Nazirliyinə verilərsə, mövcud problemlərə birdəfəlik son qoyular.

Görək bu barədə təhsil mütəxəssisləri nə düşünür, onların təklifi nədir?

  • Kamran Əsədov: “Aidiyyatı təhsil müəssisələrinin Təhsil Nazirliyinə verilməsi əvəzinə orada ciddi islahatlar aparılmalıdır ki, bu neqativlər tamamilə aradan qaldırılsın”

Tanınmış təhsil eksperti Kamran Əsədov hesab edir ki, musiqi məktəblərini Təhsil Nazirliyinin tabeliyinə verməkdənsə, orada ciddi islahatlar aparılmalıdır. “Hansısa bir məmurun yol verdiyi qanun pozuntusu təhsil müəssisəsinin strukturunun dəyişməsinə əsas verməməlidir. Söhbət ondan gedir ki, xüsusi qabiliyyət tələb edən təhsil müəssisələrində spesifik ixtisaslar tədris edilir. Onsuz da mədəniyyət sahəsinə aid olan təhsil müəssisələrinin ümumi tabeçilik qaydası Təhsil Nazirliyinə, xüsusi tabeçilik qaydası isə Mədəniyyət Nazirliyinə məxsusdur. Qeyd edilən neqativ nüanslar var, amma bundan çıxış yolunu tapmaq lazımdır. Musiqi məktəblərində yalnız musiqi öyrədilir, Azərbaycan dili, Azərbaycan tarixi və digər fənnlər isə ümumi əsaslarla 1-2 saat keçilir, tədris proqramı isə tamamilə musiqi ixtisası ilə bağlıdır. Musiqi məktəblərindəki neqativ halların aradan qaldırılması üçün aidiyyatı dövlət qurumları araşdırmalar aparmalıdır. Musiqi Akademiyasının, İncəsənət Gimnaziyasının, musiqi kolleclərinin və digər aidiyyatı təhsil müəssisələrinin Təhsil Nazirliyinə verilməsi əvəzinə orada ciddi islahatlar aparılmalıdır ki, bu neqativlər tamamilə aradan qaldırılsın”.

  • Məlahət Mürşüdlü: “Musiq məktəblərində mövcud olan neqativ halların, nəzarətsizliyin aradan qaldırılması üçün bu müəssisələrdə də Təhsil Nazirliyinin həyata keçirdiyi islahatlar tətbiq edilməlidir”

Digər tanınmış təhsil mütəxəssisi Məlahət Mürşüdlünün fikrincə də, musiqi, mədəniyyət profilli məktəblər Mədəniyyət Nazirliyinin tabeliyində qalmalıdır, amma bu müəssisələrdə Təhsil Nazirliyinin təhsildə əldə etdiyi uğurlu nəticələr bir mütərəqqi təcrübə kimi tətbiq edilməlidir. “Mən musiqi məktəblərini nəzarətdən kənar qalmış bir sahə kimi qiymətləndirə bilərəm. Ancaq hesab etmirəm ki, vəziyyətdən çıxış yolu musiqi profilli məktəblərin Təhsil Nazirliyinin tabeçiliyinə verilməsidir. Musiq məktəblərində mövcud olan neqativ halların, nəzarətsizliyin aradan qaldırılması üçün bu müəssisələrdə də Təhsil Nazirliyinin həyata keçirdiyi islahatlar tətbiq edilməlidir. Bilirsiz ki, son illər Təhsil Nazirliyi orta ümumtəhsil məktəblərində çox böyük islahatlar həyata keçirib. Əvvəllər bizim məktəblərdə də neqativ hallar var idi. Nazirlik o neqativ hallara birdəfəlik son qoyulması üçün informasiya-texnologiya vasitələrinin köməyi ilə çox gözəl yollar arayıb tapıb. Kadr təminatından tutmuş dərslərə nəzarətə, biliyin yoxlanılmasına, qiymətləndirməyə, dəyərlərləndirməyə, məktəblərin maddi-texniki bazasının təmin edilməsinə və sairə qədər çox mühüm işlər görülüb. Hesab edirəm ki, Təhsil Nazirliyinin həyata keçirdiyi bu islahatları Mədəniyyət Nazirliyi də musiqi məktəblərində gerçəkləşdirməlidir. Əgər Mədəniyyət Nazirliyi Təhsil Nazirliyinin mövcud təcrübəsini musiqi məktəblərində tətbiq edərsə, neqativ halların aradan qaldırılmasına nail ola bilər”.

M.Mürşüdlü hesab edir ki, musiqi məktəbləri xüsusi profilli təhsil müəssisələridir və orada əsasən musiqi tədris edilir. Onun sözlərinə görə, Mədəniyyət Nazirliyi musiqi məktəblərində vəziyyəti düzəltmək istəyirsə, mütləq Təhsil Nazirliyinin qabaqcıl təcrübəsindən istifadə etməlidir.

Mövzu ilə əlaqədar rəyini soruşduğumuz hər iki ekspert musiqi məktəblərində baş verən neqativ halların aradan qalıdırılması üçün çıxış yolunu  bu müəssisələrin Təhsil Nazirliyinin balansına verilməsində deyil, bu müəssisələrdə bu nazirliyin əldə etdiyi qabaqcıl təcrübənin tətbiq edilməsində görürlər.

İradə SARIYEVA

Son xəbərlər