Bakıdan rayonlara koronavirus daşıyanlar çoxalır – Çarə…

Son həftələr SMS icazəsi ilə evdən çıxmağa icazənin verilməsi Bakı sakinlərinin yay günlərini rayonlarda keçirmək arzusu yaradıb. Bunun üçün vətəndaşlar SMS icazə ilə rayonlara gedib karantin günlərini bölgələrdə keçirirlər. Ancaq Bakıdan gedən vətəndaşlar koronavirus daşıyıcısı olursa o getdiyi rayonda ətrafında olan şəxsləri də virusa yoluxdurur.

Onu da qeyd edək ki, son günlər açıqlanan statistik rəqəmlərdə bölgələrdə koronavirusa yoluxma sayı artıb. Virusun bölgələrdə çox yayılmaması üçün çıxış yolu göstərənlər də var. Təklif edilir ki, Türkiyəyə gedənlər kimi rayonlara gedənlər də koronavirus testindən keçsinlər və test nəticəsi neqativ çıxan şəxslər arayışlarını təqdim edərək rahatlıqla bölgələrə daxil ola bilsinlər.

• “Bakıda bu sıxlığı yaratmağın mənası yoxdur, rayonlar Bakının arasında əlaqəni kəsirlər, nəticədə paytaxtda insan sıxlığı yaşanır”

Həkim ekspert Rasif Bağırov bildirdi ki, rayonlarda da kifayət qədər virusa yoluxanlar var: “Bəziləri deyir ki, guya rayonda virus yoxdur. Bunların hamısı yalan-yalan sözlərdir. Nə qədər olmasa, rayonlarla da əlaqəmiz var.Vəziyyətin necə olduğunu bilirik. Rayonlarda Bakının özündən də çoxdur. Məsələn, xəstələr var ki, zəng edib danışırlar, bildirirlər ki, doktor, kəndin hamısının temperaturu yüksəkdir, evdə yatırlar. Heç çoxu təcili yardıma müraciət eləmir, müalicələrini yerli həkimlərin köməyi ilə alırlar. Rayonlarda da kifayət qədər yoluxan şəxslər var. Bakıda bu sıxlığı yaratmağın mənası yoxdur. Rayonla Bakının arasında əlaqəni kəsirlər. Nəticədə Bakıda insan sıxlığı yaşanır. Digər tərəfdən isə effektiv mübarizə apara bilmirlər. Əslində, apara bilməmək üçün kifayət qədər əsas var. Belə ki, onlar həkimlərin ordusunun potensialından istifadə etmirlər. Poliklinika həkimləri bu xəstəliyi sanki təzə-təzə dərk edirlər. Ona görə də mübarizə yarıtmaz bir formada həyata keçirilir. Nəticədə yoluxma sayı artır. Bu, ölkəmiz üçün kifayət qədər böyük rəqəmdir. Rayonlardan Bakının mərkəzinə informasiya çox zəif gəlib çatır. Çünki kəndlərdən demək olar ki, informasiyaları toplayıb Bakıya ötürmək hazırda çətindir. Proses axsayır, normal şəkildə həyata keçirilmir. Buna görə də insanlar elə bilir ki, rayonlarda koronavirus yoxdur və rahat gedib gəzə biləcəklər. Əslində, Bakıdan rayona gedən insan özünü qorumalıdır ki, birdən virusa yoluxar. Amma Bakıdan rayona gedən insanların sayəsində mərkəzdə biraz seyrəklik yaranar, sıxlıq azalar. Bu baxımdan tədbir görülməlidir”.

Həmsöhbətimiz hesab edir ki, Bakıda sıxlığın qarşısını almaq üçün paytaxtdan bölgələrə getmək istəyənlər test olunmalıdır. Testin cavabı negativ olarsa həmin şəxslər rayonlara gedə bilərlər: “Eyni qayda rayondan Bakıya gələnlərə şamil olunmalıdır”.

Danılmaz faktdır ki, Bakıda həddən artıq sıxlıq var. Sıxlıq çox olan yerdə xəstəlik də olur. Bakıda şəraitsiz evdə qalmaqdansa test edilərək həmin şəxslər rayonlara gedə bilərlər.

Günel CƏLİLOVA