10/08/2020 19:34
728 x 90

Bəzi rayonlarda kütləvi yas mərasimləri hələ də davam edir - Polis də öz prinsipial yanaşmasında…

Əziz Qəmbərov: “İctimaiyyətə biganə yanaşan, dövlətin qoyduğu qayda-qanunlara əməl etməyən insanlara qarşı inzibati və hüquqi cəzalar tətbiq edilməklə yanaşı ictimai qınaq olmalıdır”

img

Ölkəmizdə rəsmən yas mərasimlərinin kütləvi keçirilməsi qadağan edilsə də, təəssüf ki, hələ də bəzi vətəndaşlar qanunun tələblərinə əməl etmək istəmir. Bakıda nisbətən mövcud qaydalara riayət edilsə də, bölgələrdə yas mərasimlərinin keçmiş qayda ilə keçirilməsi ənənəsini davam etdirməkdə israrlı olanlara sıx-sıx rast gəlinir.

Yerli polis əməkdaşlarının keçirdiyi əməliyyat tədbirləri nəticəsində qanunun tələblərini pozanlar saxlanılır və barələrində həm inzibati, həm də hüquqi tədbirlər görülür. Belə ki, bu günlərdə Ağsu Rayon İcra Hakimiyyəti və Polis Şöbəsi əməkdaşları tərəfindən birgə keçirilən tədbirlərlə rayonun Ərəbmehtibəy kəndində yerləşən evlərin birində karantin rejimi qaydalarının pozularaq yas mərasimi təşkil edildiyi müəyyən olunub. Polis əməkdaşları tərəfindən həmin yas mərasimi dərhal dayandırılıb və orada olan şəxslər saxlanılaraq Ağsu Rayon Polis Şöbəsinə gətirilib. Ölkədə elan edilən karantin rejimi qaydalarını pozduqları üçün 18 nəfər barəsində İnzibati Xətalar Məcəlləsinin 211-ci maddəsi ilə protokol tərtib edilərək 200 manat məbləğində cərimə olunublar.

Analoji hadisə Masallı rayonun Ərkivan qəsəbəsində də baş verib. Masallı Rayon İcra Hakimiyyətinin və Rayon Polis Şöbəsinin əməkdaşları kütləvi yas mərasimi keçirilən həmin ünvana gəlib və orada karantin rejim qaydalarının pozulduğu aşkar ediblər.

Mərasim dayandırılıb və orada olanlardan 8 nəfər polis şöbəsinə gətirilərək karantin rejiminin qaydalarını və tələblərini pozduqlarına görə onlardan 3 nəfəri Rayon Məhkəməsinin qərarı ilə inzibati qaydada həbs olunub, digərləri barəsində isə protokol tərtib edilərək cərimə olunublar.

Pandemiya şəraitində yas mərasimlərinin kütləvi olaraq keçirilməsinin qadağan edildiyi halda, bəzi vətəndaşların bilərəkdən qaydaları pozması virusun yayılma həlqəsini daha da artırır.

“Bu istiqamətdə maarifləndirmə tədbirlərinin həyata keçirilməsinə ciddi zərurət var”

Tanınmış hüquqşünas, vəkil Əziz Qəmbərov bizimlə söhbətində bildirdi ki, bütün vətəndaşlar dövlətin qoyduğu qayda-qanunlara qeyd-şərtsiz əməl etməlidir. Kütləvi yas mərasimlərinin əsas virus ocağı olduğunu xatırladan Ə.Qəmbərovun sözlərinə görə, yas mərasimlərində çoxlu sayda insanın iştirakı etməsi bir deyil, onlarla, bəzən daha artıq adamın virusa yoluxmasına real təhlükə yaradır. Olduqca aktual bir məsələyə toxunmusunuz. Əslində, mən hüquqşünas və vəkil olaraq sərt cəzalandırılmanın tərəfdarı deyiləm, ancaq buna baxmayaq, qanunları və qaydaları ayaqlayan şəxslərin də cəzasız qalmasının da əleyhinəyəm. Yas mərasimlərinin kütləvi şəkildə keçirilməsini kəskin şəkildə pisləyirəm. Hesab edirəm ki, bu cür hallar bəzi vətəndaşların koronavirus kimi ciddi xəstəliyin acı nəticələrinə biganə və laqeyd yanaşmasından irəli gəlir. Ona görə də, ictimaiyyətə, cəmiyyətə biganə yanaşan, dövlətin qoyduğu qayda-qanunlara əməl etməyən insanlara qarşı inzibati və hüquqi cəzalar tətbiq edilməklə yanaşı ictimai qınaq olmalıdır. Fikrimcə, bu istiqamətdə ciddi maarifləndirmə tədbirlərinin həyata keçirilməsinə ciddi zərurət var. Çünki gördüyümüz kimi inzibati və hüqiqi metodla cəzalandırılmalar bəzən insanlara təsir etmir. Alternativ variant kimi ictimai maarifləndirmə işinin gücləndirilməsinə və ictimai qınağın geniş vüsət almasına ehtiyac duyulur. Görüsüz, ayrı-ayrı vaxtlarda yas mərasimlərini kütləvi pozanlar  200  manat cərimə edilib, amma başqa vətəndaşlar bundan nəticə çıxarmaq istəmir. Heç bu məsələyə görə həbs edilənlərin taleyi də başqalarına dərs olmur. Ancaq çıxış yolu ictimai qınaqda və maarifləndirmə işinin gücləndirilməsindədir. Yəni insanlara mütəxəssislər tərəfindən virusun nə qədər təhlükəli olduğu detallı şəkildə davamlı olaraq izah olunmalıdır. Vətəndaşlar bilməlidir ki, koronavirus böyük bir bəladır və bu təhlükəni adlatmaq üçün kütləvi mərasimlər təşkil etməkdən, ora qatılmaqdan imtina etməlidir”-deyə bildirən Ə.Qəmbərov hesab edir ki, yas mərasimlərini kütləvi təşkil edən və bura çoxlu sayda insan cəlb edən şəxslərə qarşı cəza tədbirləri görülməlidir.

Görüdüyünüz kimi tanınmış hüquqşünas yas mərasimlərində kütləviyin təmin edilməsinin virusun yayılması üçün böyük təhlükə olduğunu, bu mərasimləri təşkil edənlərin cəzalandırılmasını, eyni zamanda da bu halların təkrarlanmaması üçün maarifləndirmə işinin və ictimai qınağın gücləndirilməsini təklif edir.

İradə SARIYEVA 

Son xəbərlər