Sərt karantin rejimi elan edilmiş şəhər və rayonlarda polis əməkdaşları tərəfindən mütəmadi olaraq reydlər keçirilir. Qanunveriliyinə tələbinə uyğun olaraq, reydlər zamanı karantin tələblərini pozan şəxslər inzibati qaydada məsuliyyətə cəlb olunur. Qaydanı pozanların fotoları isə Daxili İşlər Nazirliyi tərəfindən ictimailəşdirilir, sonradan ayrı-ayrı media orqanlarının daxili etik kodeksi əsasında üzlər ya gizlədilir, ya da elə açıq şəkildə yayımlanır.
Həmin şəkillərdə o şəxslərin üzünün belə açıq verilməsi isə bir neçə gündür ki, sosial şəbəkələrdə müzakirə olunur. Bəziləri inzibati məsuliyyətə cəlb edilmiş şəxsin fotosu və videosunun öz icazəsi olmadan yayılmasının düzgün saymır. Hətta bir neçə şəxs sosial şəbəkədə və saytlarda fotoları yayımlanandan sonra etiraz edərək onların silinməsini tələb ediblər
Məlumat üçün bildirək ki, İnzibati Xətalar Məcəlləsinin 51.2-ci maddəsinə əsasən, inzibati xəta haqqında iş üzrə icraat zamanı foto və ya videoçəkiliş, yaxud səsyazma aparılıbsa, barəsində inzibati icraat aparılan şəxsin və zərər çəkmiş şəxsin razılığı olmadan həmin foto və ya video çəkiliş, yaxud səsyazma materialları Kütləvi İnformasiya Vasitələrində yayımlana bilməz.0
Ehsan Zahidov: “Çəkilən fotolar və videolar zamanı saxlanılan şəxslərin heç biri buna etiraz etməyib, əksinə, onlar törətdikləri inzibati xətadan peşman olduqlarını səmimi şəkildə etiraf edirlər”
Məsələ ilə bağlı Daxili İşlər Nazirliyinin mətbuat xidmətinin rəhbəri Ehsan Zahidov bildirdi ki, çəkilən fotolar və videolar zamanı saxlanılan şəxslərin heç biri buna etiraz etməyib: “Əksinə, onlar törətdikləri inzibati xətadan peşman olduqlarını səmimi şəkildə etiraf edirlər. Çəkilişin aparıldığını həmin şəxslər də görür. Bu məsələnin həm də maarifləndirmək baxımından əhəmiyyəti var. Heç kəsin şəkli məcburi qaydada və gizli çəkilmir”.
Musa Quliyev: “Karantin qaydalarına əməl etməyən şəxslərin fotosunun yayılması digər insanlar üçün dərs olmalıdır”
Milət vəkili Musa Quliyev bildirdi ki, karantin qaydalarına pozan şəxslərə qarşı ictimai qınaq olmalıdır. Bu gün tək Azərbaycan deyil, əksər dünya ölkələri də pandemiya ilə mübarizəsini davam etdirir: “Cəmiyyətin hər bir üzvünün karantin qaydalarına intizamlı, məsuliyyətli davranmasını gözləmirik, bu, mümkün də deyil. Lakin, ciddi məsələ ondan ibarətdir ki, qaydaları pozan kiçik bir qrup işi daha təhlükəli vəziyyətə gətirə bilər. Odur ki, hər kəs özünə və ətrafındakı insanlara görə məsuliyyətli olmalıdır ki, biz bu bəlaya qalib gələ bilək. Son iki həftədən pozitiv nəticələr gözləyirəm. Çünki artıq ictimai qınaq önə çıxıb və qoruyucu vasitələrdən istifadə etməyən insanların sayı nəzərəçarpacaq dərəcədə azalıb”.
Millət vəkili hesab edir ki, karantin qaydalarına əməl etməyən şəxslərin fotosunun yayılması digər insanlar üçün dərs olmalıdır.
Sonda bildirək ki, karantin qaydalarını pozan şəxsin cərimələnməsi ilə yanaşı, onun kimliyinin və fotosunun ictimaiyyətə yayımlanması düzgün addımdır. Beləliklə, qanuna əhəmiyyər verməyib, karantin qaydalarını pozan şəxsi hər ks tanımalıdır.
Günel CƏLİLOVA
