Ölkəmizdə mövcud olan karantin qaydalarını yalnız sadə vətəndaşlar pozmur, qaydalara əməl etməyənlər sırasında vəzifəli şəxslər və onların ailə üzvləri də çoxluq təşkil edir. Bu vəzifəli şəxslər öz səlahiyyətlərindən sui-istifadə edərək pandemiyanın tüğyan etdiyi vaxtda istirahət üçün Azərbaycanın müxtəlif bölgələrinə gedir, burada məclislər qururlar.
Bildiyimiz kimi Azərbaycan polisi karantin günlərində icazələri olmadan rayonlara istirahətə gedən şəxslərə qarşı mütamadi olaraq reydlər keçirirlər.
DİN-in Mətbuat Xidmətinin regional qrupundan mətbuata verilən məlumatına görə, belə hallardan biri də Qubada aşkarlanıb. Qusar Rayon Polis Şöbəsinin əməkdaşları tərəfindən rayon ərazisində keçirilən reydlər zamanı Bakı şəhərindən, eləcə də sərtləşdirilmiş karantin rejimi elan olunan digər rayonlardan qaydaları pozaraq qeyri-qanuni yollarla istirahətə gələn şəxslər barəsində tədbirlər görülüb.
Qayda pozan şəxslər arasında çalışdıqları dövlət idarələri və müəssisələri tərəfindən verilmiş xüsusi icazələrdən sui-istifadə edərək ailəsi ilə birlikdə istirahətə gələnlərin də olduğu aşkarlanıb.
“…Məmurlar, vəzifəli şəxslər qanunu pozmamalıdır, əksinə, öz davranışları ilə digər vətəndaşlara nümunə olmalıdırlar”
“Novoye vremya” qəzetinin baş redaktoru Şakir Ağayev “Bakı-Xəbər”ə şərhində bildirdi ki, müxtəlif vətəndaşların, o cümlədən də vəzifəli şəxslərin, dövlət məmurlarının öz ailələri ilə rayonlara istirahətə getməsi təəssüfedici faktdır. “Əlbəttə, rayonlara istirahətə gedənlər kasıblar deyil, vəzifəli, pullu adamlardır, onlarıb istirahət üçün xərcləməyə pulları var. Vəzifə sahiblərinin, müxtəlif dövlət qurumlarının əməkdaşlarının, məmurların onlara verilən icazədən sui-sitifadə edərək karantin qaydalarını bu və digər şəkildə pozması mənfi haldır. Dövlətimizin koronavirusa qarşı kəskin mübarizə aparıldığı və bütün resursların bu istiqamətə yönəldildiyi, virusun yayılma surətinin azalmadığı bir vaxtda vəzifəli insanların bu cür məsuliyyətsiz davranışları insanlarda yaranmış psixoloji durumu daha da kəskinləşdirir. Bəzi məmurlar bir şeyi anlamalıdırlar ki, qaydaları pozmaqla aztəminatlı ailələrin psixoloji durumuna mənfi təsir göstərirlər, eyni zamanda da insanlarda virusa qarşı inamsızlıq yaradırlar. Yəni vətəndaş düşünür ki, ölkədə virus varsa, onda məmurlar, vəzifə adamları və onların ailələri niyə istirahətə gedirlər? Baxmayaraq ki, ölkə başçısı da dəfələrlə öz çıxışlarında virusun nə qədər təhlükəli olduğunu bildirib və insanların qaydalara riayət etməsi ilə bağlı çağırışlar edib.
Dövlət qurumlarının işçiləri, məmurlar, vəzifəli şəxslər qanunu pozmamalıdır, əksinə öz davranışları ilə digər vətəndaşlara nümunə olmalıdırlar. Təəssüf ki, biz bir sıra hallarda bunun əksini görürük”.
Ş.Ağayev vurğuladı ki, insanlar vəziyyətin çox ciddi olduğunu bilməli və pandemiya təhlükəsini hiss etməlidir. “Vəziyyət çox ciddidir. Yəqin ki, xəbəriniz var, artıq Rusiyadan və Türkiyədən ölkəmizə mütəxəssislər dəvət edilib. Bu mütəxəssislərin dəvət edilməsi təqdirəlayiq haldır və heç kəsə sirr deyil ki, Türkiyədə, eləcə də Rusiyada çox güclü virusoloqlar, epidemoloqlar var. Onların arasında azərbaycanlı mütəxəssislər də az deyil. Pandemiya dünyanın qarşılaşdığı böyük çətinlərdən biridir, bu səbəbdən də virusun kökünü kəsmək üçün ölkələr arasında qarşılıqlı mütəxəssis mübadiləsi həyata keçirilməlidir. Prezidentin göstərişi ilə ölkəmizdə koronavirusun qarşısının alınması yollarının araşdırılıb tapılması istiqamətində işlər görüldüyü bir vaxtda bəzi məmurlar dövlətin onlara verdiyi iş icazəsindən sui-istifadə edirlər. Əgər dövlətin məmuru bu icazədən öz şəxsi məqsədləri, əyləncəsi üçün istifadə edirlərsə, onda şirkətlərin əməkdaşları da qanunları pozamağa cəhdlər edəcəklər. Məmurlara icazə verilir ki, işlə məşğul olsunlar, ölkənin vacib iş sahələri dayanmasın, ölkəmizə maddi və iqtisadi cəhətdən az zərər dəysin, amma onlar bu işlə məşğul olmaq əvəzinə ailələrini götürüb istirahətə gedirlər”-deyə Ş.Ağayev bildirdi.
Ş.Ağayevin fikirlərindən bir daha aydın oldu ki, dövlət məmurları onlara verilən səlahiyyətlərdən sui-istifadə etməməli və öz enerjilərini, potensiallarını qanunları pozmağa yox, çalışdıqları sahələri inkişaf etdirməyə, pandemiyadan itkisiz çıxarmağa sərf etməlidirlər.
İradə SARIYEVA
