Ölkə üzrə koronavirusa yoluxanların böyük faizi Bakının payına düşür. “Trend”in statistik məlumatlara istinadən yaydığı xəbərə görə, paytaxt sakinlərinin 55,1 faizi virusa yoluxub. Belə ki, Bakı şəhəri üzrə ən çox yoluxma halları paytaxtın Binəqədi, Yasamal və Xətai rayonlarında olub. Paytaxt üzrə yoluxanların 12,8 faizi Binəqədi, 12,4 faizi Yasamal, 1,9 faizi isə Xətai rayonunun payına düşür. Yoluxma hallarının 11,4 faizi Sabunçu, 10,4 faizi Nəsimi, 8,8 faizi Nərimanov, 8,7 faizi isə Suraxanı rayonunda qeydə alınıb. Yoluxma hallarının 8,2 faizi Nizami, 5,7 faizi Qaradağ, 4,2 faizi Xəzər, 4,7 faizi Səbail rayonlarındadır. Bakı şəhəri üzrə ən az yoluxma halı isə Pirallahı rayonunda olub.
Qeyd edilənə görə, Azərbaycan üzrə ikinci ən çox yoluxma Abşeron rayonundadır. Bu zonada yoluxma 16,3 faziə çıxıb. Gəncə-Qazax zonası isə 8,3 faiz yoluxma ilə 3-cü yerdədir. 7,5 faiz yoluxma Aran zonası, 5,8 faizi isə Lənkəran şəhərində qeydə alınıb. Yoluxanların 1.3 faizi xaricdən gələnlərdir.
Hazırda ölkə üzrə yoluxma hallarının 1,4 faizi Şəki-Zaqatala, 1,6 faizi Quba-Xaçmaz, 1,1 faizi Yuxarı Qarabağ bölgəsində, 1,2 faizi isə Dağlıq Şirvan ərazilərindədir. Ötən həftədən sonra Naxçıvanda koronavirusa yoluxma halı baş verməyib.
Mütəxəssislər statistikada hansı dəyişikliklər görür?
“Bu amillər də paytaxtda virusun yüksək faizlə yayılmasına gətirib çıxarıb”
Statistikanı təhlil edən Azərbaycan Milli Elmlər Akademiyasının Mikrobiologiya İnstitutunun direktor əvəzi, AMEA-nın müxbir üzvü, tanınmış mütəxəssis Pənah Muradov “Bakı-Xəbər”ə bildirdi ki, Bakıda və onun rayonlarında koronavirusun yüksək dərəcədə olması bir çox amillərlə bağlıdır. P.Muradovun sözlərinə görə, son zamanlar ölkə ərazisində epidemoloji vəziyyət nəzarətdə saxlansa da, vətəndaşların məsuliyyətsiz davranışları virusun bu şəkildə genişlənməsinə, yoluxmaların sayının sağalnların sayını üstələməsinə səbəb olub. “Çox təəssüf ki, koronavirusun yayılma statistikasında böyük dəyişikliklər izlənir. Əvvəlki dövrlə müqayisədə yoluxanların sayının sağalanların sayını üstələməsi təəssüf doğurur. Pandemiyanın ilkin dövrlərində ümiyyətlə Bakıda yoluxma az idi və bütövlükdə respublika ərazisində 20-25 nəfərdə virus aşkarlanırdı, sağalanların sayı isə yoluxanların sayını dəfələrlə üstələyirdi. Dövlət virusun qarşısının alınması istiqamətində kifayət qədər işlər görüb və görməkdə də davam edir. Son həftələrin statistikası göstərir ki, Bakıda koronavirusa yoluxanların faizi daha çoxdur. Əvvəlki həftələrdə virusun daha yüksək faizdə yayıldığı rayon Yasamal idisə, indi Binəqədi rayonudur. Yasamal rayonunda müəyyən qədər azalma müşahidə edilir. Bakı şəhərində koronavirusa yoluxanların 55 faizdən artıq olması təsadüfi deyil. Çünki Bakı sıxlıqdır və burada insanların təmas imkanları, bir-birilə ünsiyyət qurması halları böyükdür, bu amillər də paytaxtda virusun yüksək faizlə yayılmasına gətirib çıxarıb. Bilirsiz ki, rayon sakinlərinin də xeyli bir qismi müntəzəm və qeyri-müntəzəm şəkildə Bakıda yaşayır. Bəziləri pandemiya ilə əlaqədar öz rayonlarına getsələr də, hələ də burada qalanlara rast gəlinir. Bakıda insanlar avtobuslardan müntəzəm şəkildə istifadə edir, iri marketlərə, ticarət obyektlərinə gedir, daha çox təmasda olurlar. Çox təəssüflər olsun ki, dövlətin bu qədər çağırışlarına baxmayaraq insanların bir qismi hələ də mağazada, avtobusda, bütövlükdə ünsiyyət zamanı sosial məsafə gözləmir, maska taxmır, digər zəruri qaydalara əməl etmir. Bir tərəfdən avtobuslardakı sıxlıq, başqa bir tərəfdən isə ictimai nəqliyyatda və iri marketlərdə karantin qaydalarına tam aməl edilməməsi Bakıda virusa yoluxanların sayının daha yüksək faizdə olmasına səbəb olub.
Vətəndaşların virusdan tamamilə xilas olması öz əllərindədir. Dövlət tərəfindən planlı şəkildə koronavirusla mübarizə strategiyası qurulub, bu istiqamətdə dövlət vətəndaşa hər cür dəstək göstərir. Vətəndaş isə bu dəstəyə öz əməli ilə cavab vermək əvəzinə koronavirusun yayılmasına səbəb olan davranışlar göstərir. Prezident öz üzərinə düşən vəzifəni artıqlaması ilə yerinə yetirir, tədbirlər görür. Bəzi vətəndaşlar isə öz əməlləri ilə bu tədbirlərə dəstək olmaq istəmirlər”.
P.Muradov qeyd etdi ki, Gəncə-Qazax, Lənkaran sərhədyanı bölgələr olduğu üçün orada gediş-gəliş halları əvvəlki aylarda çox olub və əhali də karantin qaydalarına tam riayət etmədiyi üçün analoji vəziyyət yaranıb. “Burada virusa yoluxanların böyük əksəriyyəti xaricdən ölkəyə gələnlərdir. Demək onların çoxu virus daşıyıcısı olub və virusun yayılmasına səbəb olublar. Yoluxma faizinin Bakı, Lənkəran, Gəncə-Qazax bölgələrinə nisbətən az olduğu Şəki-Zaqatala, Quba-Xaçmaz, Yuxarı Qarabağ bölgəsi və Dağlıq Şirvan ərazilərində isə vəziyyətin bu cür olması səbəbsiz deyil. Bilirsiz ki, virusla əlaqədar olaraq bu bölgələrdə sıxlıq yaşanmır və gediş-gəliş tam olaraq məhdudlaşdırılıb. Yoluxmanın az faiz təşkil etdiyi rayonlarda əsas amil təbii şəraitdir, eyni zamanda da insanların təbii immunitetidir. Havanın təmizliyi, insan sıxlığının olmaması, təmasların az olması, ictimai nəqliyyatdan təsadüfi hallarda istifadə edilməsi həmin rayonlarda virusa yoluxanların faizin aşağı olmasına səbəb olub”- deyə P.Muradov vurğuladı.
İradə SARIYEVA
