Kapital Bankın pensiya və əmək haqqı kartları ilə mədaxil etmək mümkün deyil. Bu barədə kart sahiblərinə bildiriş də göndərilib. Məlumdur ki. əvvəllər bu prosesi həyata keçirmək mümkün idi. Çox rahat istifadə edilirdi.
Yəni kimsə başqasına pul göndərmək istəsə, kartın nömrəsini qeyd etməklə “Milli Ön” aparatından kart cash-in edir və kart sahibi ən yaxın bankomatdan pulu rahat şəkildə çəkə bilirdi. Ancaq1 iyuldan etibarən həmin kartlara mədaxilə məhdudiyyət qoyulub. Yeni qaydalara görə, belə köçürmələr yalnız bankla göndərilməlidir və yaxud da avqust ayının 1-dən etibarən kart sahibi banka yaxınlaşıb ərizə-blankı doldurduqdan sonra xidmətdən istifadəni aktiv edə bilər. Bu qayda tətbiq edildikdən sonra Kapital Bankın istənilən filialının qarşısında insan izdihamı yaşanır. Nəzərə almaq lazımdır ki, hazırda koronavirusun tuğyan etdiyi bir dönəmdə insan sıxlığının hansısa məkanda qeydə alınması düzgün deyil. Ekspertlər hazırda "Kapital Bank"ın filiallarının qarşısını virus mənbəyi adlandırır. Çünki orda yaranan növbələrdə sosial məsafə saxlanılmır.
“Mənim bankda hesabım varsa, ondan mən yalnız kartla istifadə edirəmsə, bank heç bir məhdudiyyət qoya bilməz”
Məsələ ilə bağlı fikir bildirən bank məsələləri üzrə ekspert Əkrəm Həsənov qeyd etdi ki, Azərbaycanda pensiya və əmək haqqı kartlarının sistemi əvvəldən düzgün qurulmayıb:“Mənim bankda hesabım varsa, ondan yalnız kartla istifadə edirəmsə, bank heç bir məhdudiyyət qoya bilməz. Praktikada bizim banklarımız belədir. Məsələn, hansısa müəssisə rəhbəri işçilərinə əmək haqqı vermək istəyir. Həmin adam gəlir bankla müqavilə bağlayır. Bank da onun bütün əməkdaşlarına kart verir. Bu düzgün deyil, bank qanunvericiliyinə ziddir. Çünki bank hər bir müştərisi ilə ayrıca müqavilə bağlamalıdır. O cümlədən kart müqaviləsi. Həmin müştərinin bankda bank hesabı var, kart da bağlanır bank hesabına, müştəri hardan istəyir pul köçürə bilər, o cümlədən əmək haqqı da gələ bilər və s. Eynilə də pensiya kartları".
Həmsöhbətimiz hesab edir ki, Kapital Bank hər bir kəslə müqavilə bağlamalıdır: "Yəni dövlət həmin bankı seçirsə, bu o demək deyil ki, bank qanunu pozaraq kartları paylayır, amma pensiyaçılarla bank müqaviləsi hesabı bağlamır. Kart yalnız bank hesabından istifadə alətidir, vəssalam. Bu alət də, bank qanunvericiliyinə görə, bank hesabına bağlanmalıdır. Əgər mənim bankda hesabım varsa, ondan mən yalnız kartla istifadə edirəmsə, bank buna heç bir məhdudiyyət qoya bilməz".
Günel CƏLİLOVA
