Təəssüf ki, hələ də aramızda öz məsuliyyətini dərk etməyən, vacib dövlət qurumlarının “qaynar xətt”lərini lazımsız zənglərlə məşğul edən, onlara yalan məlumatlar verən şəxslərə rast gəlinir.
Əlbəttə, dövlət qurumlarının “qaynar xətt” sistemi vətəndaş-dövlət münasibətlərinin daha yüksək səviyyədə tənzimlənməsi, vətəndaşları narahat edən qayğı və problemlərin həll edilməsi baxımından yaradılıb. “Qaynar xətt”lərə əsaslı zəng edən vətəndaşların da şikayətlərinin, onları narahat edən məsələlərin operativ şəkildə həll edilməsinin şahidi oluruq.
Ancaq təəssüf ki, bəzi vətəndaşların da “qaynar xətt”ləri əsassız şəkildə məşğul etməsini də müşahidə edirik.
Adı çəkilməyən bir vətəndaşın Daxili İşlər Nazirliyinin 102 xidmətinə əsassız olaraq 57 dəfə zəng etməsi ilə bağlı internetdə və sosial şəbəkələrdə səsyazısı yayılıb. Tural adlı polis əməkdaşının həmin vətəndaşla telefon əlaqəsi saxlayaraq ona 102 xidmətinə mənasız yerə 57 dəfə zəng etdiyini və buna görə həmin vətəndaşa qarşı İnzibati Xətalar Məcəlləsinin 534-cü maddəsilə tədbir görüldüyünü bildirib. Səs yazısından açıq görsənir ki, polisin mədəni, qanun çərçivəsində etdiyi müraciətə həmin şəxs normal, mədəni şəkildə cavab vermək əvəzinə, müxtəlif fikirlərlə təxribat törətməyə cəhdlər edir, kobudluq nümayiş etdirtir. Məsələ burasındadır ki, həmin vətəndaş 102-yə həm Bakıdan, həm Lənkərandan, həm də digər yerlərdən zəng vurub. Özünü iki ali təhsilli, xaricdə oxumuş “jurnalist” kimi təqdim edən həmin şəxsin kimliyini təəssüf ki, aydınlaşdıra bilmədik. Polislə söhbətində Lerikdə bağ evində olduğunu bildirən, 57 dəfə 102-yə əsassız zəng edən “şikayətçinin” şikayət obyektlərinin gülünclüyü diqqəti çəkir. O, 102-yə “heyvanların vəkili” kimi zəng etdiyini dolayısı ilə bildirir. 102-yə gah itə, gah pişiyə, gah meymuna, gah da digər bu kimi məsələlərə görə zəng edib.
Polis əməkdaşı isə ona bildirdi ki, ixtisaslaşmış xidmətlərə bilə-bilə yalandan zəng vurub onları çağırdığına və bu quruma heç bir mənası olmayan məlumatlar verdiyinə görə vətəndaş haqqında tədbir görülür. Polislə həddən artıq kobud danışan vətəndaş özünü “haqlı çıxarmaq” üçün müxtəlif bəhanələr sərgiləsə də, polis onun şikayətlərinin yalan üzərində qurulduğunu, məzmunsuz olduğunu vətəndaşın diqqətinə çatdırdı: “Siz yeganə vətəndaşsınız ki, sizdən 102 şikayət edib. Şikayətinizdə də heç bir məntiq yoxdur”. Polis ona bildirdi ki, o, şikayətə meylli insandır.
“Bu adamın jurnalist olduğu qətiyyən inandırıcı deyil, sadəcə, o, jurnalist adından istifadə edir”
“Polisə Dəstək” İctimai Birliyinin sədri, tanınmış hüquqşünas Şəmsəddin Əliyev “Bakı-Xəbər”ə bildirdi ki, sözügedən vətəndaşın bütün hərəkətləri yaxından izlənməli və onun bu davranışlarına inzibati metodlarla yanaşı, hüquqi qiymət də verilməlidir. Cəmiyyətimizdə belə şəxslərin olduğunu təəssüflə qeyd edən Ş.Əliyev hesab edir ki, belələrinin əsas məqsədi Azərbaycan polisinin həyata keçirdiyi işlərə kölgə salmaqdır. “Əslinə baxanda həmin vətəndaşın hərəkətlərində özünü idarə etməyi bilmək, hərəkətlərinə cavab verib-verməmək iqtidarında olub-olmadığına diqqət yetirmək lazımdır. Mütəxəssislər rəy verməlidirlər ki, bu adam kifayət qədər öz hərəkətlərini ölçüb-biçmək iqtiradında deyil, yaxud iqtidarındadır. Bunun əsasında da həmin şəxsi inzibati məsuliyyətlə yanaşı, cinayət məsuliyyətinə də cəlb etmək mümkündür. Faktiki olaraq, o, cinayətkarlıqla mübarizə aparan bir qurumu əsas təyinatından yalan məlumatlar ötürməklə yayındırır, davamlı olaraq 102 “qaynar xətt”ini yükləməklə məşğul olur. Burada da onun məqsədi çaşqınlıq yaratmaqdır, guya onun zənglərində “ciddi əsaslar” var və sair. Ehtimal edirəm ki, bu şəxsin psixoloji durumunda çox ciddi affekt vəziyyəti var, özünü idarə etmək qabiliyyəti yoxdur. Buna da artıq mütəxəssislər rəy verməlidirlər. Belə insanlar çoxdur. Belələri Sovet dövründə də vardı. Telefon butkalarına daxil olub aparata 2 qəpik atmaqla Dövlət Təhlükəsizliyi Xidmətinə, Daxili İşlər orqanlarına müxtəlif yalan məlumatlar verirdilər. O dövrdə bəzən onları müəyyən etmək üçün uzun zaman tələb olunurdu. Amma sonra nail olunurdu. Bu gün isə yalan məlumatları verən adamların şəxsiyyətini müəyyən etmək çox asandır. Onların əsas məqsədi hüquq-mühafizə orqanlarının fəaliyyətinə kölgə salmaq, onları əsas təyinatından kənara çəkmək və boş yerə məşğul etməkdir. Bu da bir təxribatdır. Bir şəxsin 57 dəfə 102 xidmətinə əsassız zəng vurması, yalan məlumatlar verməsi nəticəsində 102 həmin şəxsdən şikayət verib. Bu gün elə insanları aşkarlayıb üzə çıxarmaq və onlara elə cəza vermək lazımdır ki, başqalarına görk olsun”.
Ş.Əliyev hesab edir ki, həmin şəxslərin adları, soyadları açıq şəkildə göstərilməklə sosial şəbəkələrdə, internet resurslarında onları ifşa etmək lazımdır. Bu şəxsin özünü “jurnalist” kimi təqdim etməsində də şübhəli məqamlar olduğunu deyən Ş.Əliyev qeyd etdi ki, bu gün jurnalist adından istifadə edən şəxslər çoxdur və onların da işi bu ad altında təxribat törətməkdir: “Bu necə jurnalistdir ki, imzasını təqdim etmir. Normal jurnalist qarşılaşdığı problem, ən azından, çalışdığı KİV-də ictimailəşdirə bilər, yazar, yaxud sosial şəbəkədə paylaşar. Bu adamın jurnalist olduğu qətiyyən inandırıcı deyil, sadəcə, o, jurnalist adından istifadə edir. Hesab edirəm ki, aidiyyəti qurumlar onun kimliyini, fəaliyyətini, məqsədini tamamilə araşdıracaqlar”.
İradə SARIYEVA
