09/08/2020 13:13
728 x 90

Özəl klinikalar pandemiya ilə bağlı mübarizədə hansı çətinliyi yaradırlar...

Adil Qeybulla: “Özəl xəstəxanalar da koronavirusla mübarizədə dövlət xəstəxanaları ilə bir araya gəlməlidirlər”

img

Azərbaycanda koronavirus aşkarlanan xəstələrin statistikası böyüdükcə, bu prosesə cəlb olunan tibb müəssisələrinin də sayı artır. Yoluxmanın sürətlə artması səbəbindən artıq koronaviruslu xəstələrin müalicəsinə özəl tibb müəssisələri də cəlb olunub. Bunlar Mərkəzi Neftçilər Xəstəxanası və Mərkəzi Gömrük Hospitalıdır.

Virusa yoluxanların sayının artması özəl klinikalara tələbatın artmasına səbəb olur. Nazirlər Kabineti yanında Operativ Qərargahın keçirilən son brifinqində Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədri Ramin Bayramlı media nümayəndələrinə açıqlamasında qeyd edib ki, özəl xəstəxanalarda kompyuter tomoqrafiyasından keçmiş şəxslərlə bağlı məlumatlar onlara gec daxil olur: “Özəl xəstəxanaları həmrəyliyə çağırıram. Bəzən xəstələr qanda saturasiyanın 50-yə düşməsi ilə bizə daxil olur. Bu halda onları dərhal tənəffüs aparatına qoşmaq lazım gəlir. Əks halda, xəstəni itirə bilərik. Ona görə də özəl xəstəxanaları bizimlə həmrəy olmağa çağırıram".

  • “Özəl klinikalarda olunan analiz, tomoqrafiya və digər prosedurların cavabı qısa müddətdə dövlət xəstəxanalarına verilməlidir”

Məsələ ilə bağlı fikir bildirən professor, həkim-ekspert Adil Qeybulla bildirdi ki, Azərbaycanda kifayət qədər özəl tibb müəssisəsi var. Tibb müəssisələri pandemiya üçün məcburi ayrıla bilməz. Bu, sahibkarın istəyi əsasında baş tuta bilər: “Özəl klinikalar yaranmış vəziyyətdən xeyli istifadə ediblər. Vətəndaşlar arasında qorxu hissini artırdılar ki, test verməyə gələn müştəriləri çox olsun. Axı bir testin qiyməti özəl klinikada 130-140 manata başa gəlir. İndi biz insanlardakı qorxu hissini aradan qaldırmağa çalışırıq, maarifləndirmə işləri aparırıq. Bu xəstəlikdən qorxmamalı, məlum simptomlar müşahidə ediləndə, sadəcə, həkimə müraciət etməlisiniz. Həm öskürək, həm də qızdırma sağlamlığın təhlükədə olmasının əlamətidir. Amma bunun səbəbinin hansı xəstəlik olmasını bilmək üçün ehtimallarla çıxış etmək, necə deyərlər, fala baxmaq olmaz. Bunu həkimlər müəyyən etməlidirlər.

Bu gün adama elə gəlir ki, ölkədə COVID-19-dan başqa xəstəlik yoxdur. Əlbəttə ki, bu, belə deyil və digər xəstəliklərdən planlı müalicə alan insanlar onların müalicəsinin arxa plana keçirilməsi faktları ilə qarşılaşmamalıdırlar. COVID-19 pandemiyası dövlət səviyyəli problemdir”.

Həmsöhbətimiz onu da əlavə etdi ki, özəl xəstəxanalar da koronavirusla mübarizədə dövlət xəstəxanaları ilə bir araya gəlməlidirlər. Özəl klinikalarda olunan analiz, tomoqrafiya və digər prosedurların cavabı qısa müddətdə dövlət xəstəxanalarına verilməlidir. Koronavirusla mübarizədə hər kəs mücadilə etməlidir, o cümlədən, özəl xəstəxanalar da.

Günel CƏLİLOVA

Son xəbərlər