11/08/2020 22:51
728 x 90

Maskaya görə cərimə 200-800 manat civarında – Prezidentin təsdiqinə tam dəstək var

img

Məlum olduğu kimi, Prezident İlham Əliyev İnzibati Xətalar Məcəlləsində dəyişiklik edilməsi haqqında qanunu imzalayıb. Sənədə əsasən, epidemiya əleyhinə rejim, sanitariya-gigiyena və karantin rejimləri dövründə fərdi qoruyucu vasitələrdən istifadə ilə bağlı cərimələr artırılıb.

Belə ki, dəyişikliklə epidemiya əleyhinə rejim, sanitariya-gigiyena və karantin rejimləri dövründə fərdi qoruyucu vasitələrdən istifadə ilə bağlı müvafiq icra hakimiyyəti orqanı tərəfindən müəyyən edilən tələblərin pozulmasına, habelə vəzifəli şəxslər və hüquqi şəxslər tərəfindən həmin tələblərin pozulmasının qarşısının alınmamasına görə fiziki şəxslər 100 manat məbləğində, vəzifəli şəxslər 200 manat məbləğində, hüquqi şəxslər 400 manat məbləğində cərimə ediləcək.

Bundan əlavə, həmin əməllərin inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsinə görə fiziki şəxslər 200 manat məbləğində, vəzifəli şəxslər 400 manat məbləğində, hüquqi şəxslər 800 manat məbləğində cərimə ediləcək.

Qeyd edək ki, İnzibati Xətalar Məcəlləsinə edilən bu dəyişiklik insanlar tərəfindən birmənalı qarşılanmayıb. Sosial şəbəkələrdə aparılan müzakirələrdən belə görünür ki, insanların müəyyən bir hissəsi cərimələrin yüksək olmasından narazılıq edib.

Məlumat üçün bildirək ki, maska taxmaq tələbini pozanlara qarşı tətbiq olunan cərimələrin məbləğinə görə Azərbaycan region ölkələri arasında ilk sıralarda qərarlaşıb.

Bildirək ki, qonşu Türkiyə, Rusiya və Gürcüstanda da tətbiq edilmiş sərt karantin müsbət nəticə verib. Türkiyədə karantin rejiminin pozulması, o cümlədən, maska taxmamağa görə cərimələrin məbləği 370- 3000 lirə arasında dəyişir, Gürcüstanda karantin rejiminin pozulmasına görə fiziki şəxslər 2 min lari (670 dollar), hüquqi şəxslər 10 min lari (3300 dollar), Rusiyada karantin rejiminin pozulmasına görə fiziki şəxslər 15 mindən 40 min rubla qədər (214 və 570 dollar), hüquqi şəxslər 150 min-500 min rubl (2152 və 7150 dollar), maska taxmamağa görə fiziki şəxslər 5000 rubl (120 manat) məbləğində cərimə olunurlar. Ukraynada isə maska taxmayan vətəndaşlar 1700 manat cərimələnirlər.

  • Musa Quliyev: “Cərimə məbləğinin artırılması vətəndaşı cəzalandırmaq məqsədi daşımır, əksinə, onun sosial məsuliyyətinin yüksəlməsinə, intizamın artmasına xidmət edir”

İctimai xadimlər maska taxmamağa görə cərimə məbləğinin artırılmasının tərəfdarıdırlar. Millət vəkili Musa Quliyev qeyd etdi ki, ötən dövrün təcrübəsi göstərir ki, cərimələrin məbləği təsirli nəticələr üçün yetərli deyil: “Eyni zamanda, aşağı məbləğdə cərimələr inzibati xətanın ağırlığına adekvat deyil. Artıq dünyada koronavirusa görə karantin rejiminin və maskadan istifadənin pozulması həm də cəmiyyətə hörmətsizlik və qəsd kimi də qiymətləndirilir”.

Həmsöhbətimizin sözlərinə görə, karantin rejiminin pozulmasına, o cümlədən, qapalı məkanlarda maskadan istifadə olunmamasına görə cərimə məbləğinin artırılması təqdirəlayiqdir: “Əlbəttə, cərimə məbləğinin artırılması vətəndaşı cəzalandırmaq məqsədi daşımır, əksinə, onun sosial məsuliyyətinin yüksəlməsinə, intizamın artmasına xidmət edir”.

  • Fatimə Hacıbəyli: “...vətəndaşlarımızın karantin rejimi qaydalarına riayət etməsinə yeni bir təkan verə bilər”

“Vəfa” Sosial-İctimai Birliyinin sədri Fatimə Hacıbəyli bizimlə söhbətində qeyd etdi ki, son günlər ölkəmizdə koronavirusa yoluxanların sayının xeyli artması cərimələrin məbləğinin yüksəldilməsini də zərurətə çevirdi. Ona görə ki, bir çox vətəndaş bu təhlükəyə laqeydliklə yanaşır. Tibbi maskadan istifadə edilməsi zəruri olan yerlərdə ondan düzgün istifadə etmirlər. Metroya daxil olarkən tibbi maskanı taxır, amma içəri daxil olduqdan sonra onu çıxarıb ciblərinə qoyurlar. Bu kimi hallar xoşagələn deyil.  Özümüzün, yaxınlarımızın və bütün cəmiyyətimizin təhlükəsizliyinin və sağlamlığının qorunması üçün  qaydalara əməl etmək həyati əhəmiyyət kəsb edir. Bu qaydalara hamılıqla əməl etməliyik ki, koronavirus bəlasından xilas olaq və əvvəlki kimi, normal həyat tərzinə tezliklə qovuşa bilək. Amma görünən budur ki, cərimələrin aşağı olması insanların sosial məsuliyyətini azaldırdı: “Cərimələr artırılırsa, insanlar məcbur olacaqlar ki, tibbi maskalar taxsınlar, qaydalara əməl etsinlər. Azərbaycanda cərimələrin müəyyən qədər artırılması, əlbəttə ki, vətəndaşlarımızın karantin rejimi qaydalarına riayət etməsinə yeni bir təkan verə bilər. Dünyanın bir çox ölkəsində cərimələr Azərbaycanla müqayisədə dəfələrlə yüksəkdir. Nəzərə almaq lazımdır ki, koronavirusla mübarizədə təşkilati-institusional tədbirlərlə yanaşı, vətəndaş məsuliyyətini artıran cərimə və nəzarət tədbirlərinin gücləndirilməsinin də əhəmiyyəti böyükdür”.

Günel CƏLİLOVA

Son xəbərlər