11/08/2020 23:26
728 x 90

Beş nəfərdən çox qrup halında toplantılar üzərində qadağa - ekspertlər cəmiyyətin zəruri qadağaya anlayışla yanaşmasından danışır

Şakir Ağayev: “...birbaşa təhlükəsizlik məqsədi daşıyır”

img

Nazirlər Kabineti yanında Operativ Qərargahın iyulun 2-də açıqladığı qərarda virusa yoluxma dinamikasının azaldılması istiqamətindəki tədbirlər çərçivəsində bütün ölkə ərazisində ictimai yerlərdə, o cümlədən, küçələrdə, bulvarlarda 5 nəfərdən artıq qruplarda cəmləşmək qadağan edilir.

Operativ Qərargahın qərarına əsasən, COVID-19 virusunun yayılma sürətinin azaldılması, eləcə də onun törədə biləcəyi fəsadların minimuma endirilməsi məqsədilə Goranboy, Göygöl və Mingəçevir şəhərləri, Bərdə, Xaçmaz, Samux, Siyəzən və Şəki rayonları daxil olmaqla, Bakı, Cəlilabad, Gəncə, Lənkəran, Masallı, Sumqayıt, Yevlax şəhərlərində və Abşeron rayonunda xüsusi karantin rejimi 2020-ci il 5 iyul saat 06:00-dan 20 iyul saat 06:00-dək uzadılır.

  • “Hər bir vətəndaş buna anlayışla yanaşmalı və 5 nəfərdən artıq toplaşmamalıdır”

 “Novoe vremya” qəzetinin baş redaktoru, tanınmış icmalçı Şakir Ağayev bizimlə söhbətində bildirdi ki, Operativ Qərargahın bu qərarı yerində verilmiş qərardır və vacibdir. “Bu onunla bağlıdır ki, ölkəmizdə xəstəliyin yayılma sürəti azalmaq əvəzinə çoxalır. Bu, təbii ki, çox məyusedici haldır. Bu qədər tədbirin görülməsinə baxmayaraq, koronavirusun yayılma dinamikası azalmaya doğru getmir. Uzunmüddətli karantin rejiminə, qadağalara baxmayaraq, təəssüf ki, mövcud vəziyyət yaranıb. Sözsüz ki, burada obyektiv və subyektiv səbəblər var. Çox təəssüf ki, biz bu halın şahidi oluruq. Bu virus ölkə əhalisinin sağlamlığını təhdid edir, təhlükə altına alır. Digər tərəfdən, ölkənin sosial-iqtisadi, maliyyə durumuna çox böyük təsir göstərən bir amilə çevrilib. Ancaq vətəndaşların sağlamlığı dövlət üçün hər şeydən əsas olduğu üçün, bu addımların atılması zəruri olub. Operativ Qərargahın qəbul etdiyi son qərarda bəndlərdən biri metronun fəaliyyətinin dayandırılmasıdır. Bu da çox vacib məsələdir. Metro qapalı şəraitdə hərəkət etdiyi üçün burada da insan sağlamlığına təhlükələr var. Çox təəssüflər olsun ki, bütün qadağalara, inzibati və cərimə metodlarına baxmayaraq, kimlərsə maska taxmır, sosial məsafə saxlamır, beş-on nəfər bir yerdə maskasız dayanır. Bu, böyük və kiçik mağazalarda, avtobuslarda və metroda daha sıx-sıx yaşanır. Bilirsiniz, insanların özündə də bir məsuliyyət hissi, qorxu olmalı, ən azından, ailəsinin sağlamlığı üçün qadağalara əməl etməlidir. Hadisələr göstərir ki, təkcə inzibati resurslarla bu xəstəliyin qarşısını almaq mümkün deyil. Əvvəllər 10 nəfərin bir yerə toplaşmasına icazə verilirdisə, bunun təhlükə yaratdığını nəzərə alaraq yeni üsul tətbiq edilir. Artıq 10 nəfər deyil, 5 nəfər bir yerə toplaşa bilər. Bu da ondan irəli gəlir ki, bir çox halda 10 nəfərə icazə verilirdisə, onların ətrafında daha çox insan toplaşırdı. Bu insanlar ara məsafəsi saxlamadan maskasız gəzir, yaxud ünsiyyət qururdular. Bu gün 5 nəfərdən artıq insanın bir yerə toplaşmasına icazə verilməməsi birbaşa təhlükəsizlik məqsədi daşıyır. Hesab edirəm ki, bu, virusun yayılma tempinin aşağı düşməsində müsbət nəticə verəcək. Hər bir vətəndaş buna anlayışla yanaşmalı və 5 nəfərdən artıq toplaşmamalıdır. Bu hər bir vətəndaşın təhlükəsizliyi üçün atılan addımdır”.

Bu məsələdə təkcə inzibati resurslara arxalanmalı olmadığımızı deyən Ş.Ağayev hesab edir ki, virusa qarşı elmi metodlarla da mübarizə tədbirləri aparılmalıdır. “Elmi vasitələrdən, resurslardan istifadə bir neçə ölkədə öz müsbət effektini verib. Bizdə də bu tətbiq edilməlidir. Bilmirəm, bu insanlara virusun dəhşətli dərəcədə təhlükəli olduğunu necə anlatmaq lazımdır ki, onlar bu bəlanı dərindən dərk etsinlər və birdəfəlik bu bəladan xilas olaq. Hesab edirəm ki, bütün tətbiq edilən qaydalarla bərabər, məşhur virusoloqları, sosioloqları, epidemioloqları maarifçilik işinə cəlb etmək lazımdır. Bu gün Rusiyada və dünyanın digər ölkələrində çox güclü Azərbaycan həkimləri, mütəxəssisləri işləyirlər. Onları da dəvət etmək olar. Yaxud da pandemiyaya görə onlar bura gələ bilməsələr də, onların Azərbaycan xalqına müraciəti yayılmalıdır. Onlar virusun nə dərəcədə təhlükəli olduğunu elmi əsaslarla bizim xalqa anlatsınlar” - deyə Ş.Ağayev vurğuladı.

İradə SARIYEVA

Son xəbərlər