Azərbaycan Respublikası Nazirlər Kabineti yanında Operativ Qərargah koronavirusla bağlı KİV nümayəndələri üçün brifinq keçirib. “Trend”in məlumatına görə, brifinqdə Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev, Tibbi Ərazi Bölmələrini İdarəetmə Birliyinin (TƏBİB) şöbə müdiri Yaqut Qarayeva və Səhiyyə Nazirliyinin aparat rəhbəri Eldar Zeynalov jurnalistləri maraqlandıran suallara cavab verib.
Daha 556 nəfər koronavirusa yoluxdu, 346 nəfər sağaldı, 7 nəfər vəfat etdi
Y.Qarayeva deyib ki, Azərbaycanda 556 yeni koronavirus infeksiyasına yoluxma faktı qeydə alınıb, 346 nəfər müalicə olunaraq sağalıb və evə buraxılıb. Onun sözlərinə görə, daha 7 nəfər bu virusdan dünyasını dəyişib.
İndiyədək ölkədə, ümumilikdə, 17 524 nəfərin koronavirus infeksiyasına yoluxması faktı müəyyən edilib, onlardan 9 715 nəfər müalicə olunaraq sağalıb, 213 nəfər vəfat edib, 7 596 nəfərin xüsusi rejimli xəstəxanalarda müalicəsi davam etdirilir.
Son sutka ərzində yeni yoluxma hallarının müəyyənləşdirilməsi ilə əlaqədar 6 645, ötən müddət ərzində isə, ümumilikdə, 482 170 test aparılıb.
Xüsusi karantin rejimi uzadıla bilər
“Xüsusi karantin rejiminin daha iki həftə uzadılması ilə bağlı fikirlər var”. Bunu isə Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib.
Onun sözlərinə görə, Azərbaycanda koronavirusla bağlı məsələlər 24 saat ərzində nəzarətdə saxlanır, zəruri tapşırıqlar verilir və tədbirlər görülür.
H.Hacıyev qeyd edib ki, ev şəraitində müalicə olunan şəxslərə də dəstək göstərilməsi nəzərdən keçirilir. PA rəsmisi əlavə edib ki, koronavirus dünya miqyasında çox böyük sosial, iqtisadi və digər problemlərə yol açır: "Koronavirus dünyada problemləri daha da ağırlaşdırır, çətinləşdirir. Dünya miqyasında kornavirus müharibə kimi qəbul olunmalıdır. Koronavirus tam aradan qalxmayınca, bu təhlükəni hiss edəcəyik”.
H.Hacıyev bildirib ki, Azərbaycan koronavirusla bağlı beynəlxalq əməkdaşlığı davam etdirir. O bildirib ki, Azərbaycan bu istiqamətdə Ümumdünya Səhiyyə Təşkilatı ilə əməkdaşlıq edir. H.Hacıyev vurğulayıb ki, Azərbaycanın beynəlxalq aləmdə gördüyü ən mühüm işlərdən biri də dövlət başçısının BMT Baş Assamleyasının xüsusi sessiyasının keçirilməsi ilə bağlı təşəbbüsü idi.
Təşəbbüsün dünyanın 130-dan çox ölkəsi tərəfindən dəstəklənməsini vurğulayan H.Hacıyev bildirib ki, bu, Azərbaycan dövlətinə olan etimadın və hörmətin bariz nünuməsidir.
Pandemiya dövründə də Ermənistan təcavüzü davam etdirir
PA rəsmisi deyib ki, BMT Baş katibi tərəfindən COVID-19-la bağlı qlobal atəşkəs təşəbbüsü irəli sürülüb. H.Hacıyev bildirib ki, Azərbaycan beynəlxalq sülh təşəbbüslərini dəstəkləyir: “Ancaq yalnız atəşkəs kifayət deyil. 1994-cü ildə Ermənistan ilə Azərbaycan arasında atəşkəs əldə olunsa da, sülhə nail olunmayıb. Təəssüflər olsun ki, Ermənistan atəşkəs arxasında gizlənərək təcavüzü davam etdirir. Atəşkəsə olan çağırışlarla bərabər, BMT Nizamnaməsindəki tələb və prinsiplərin həyata keçirilməsi, işğala son qoyulması təmin olunmalıdır. Koronavirus pandemiyası dövründə bu, daha aktualdır”.
Azərbaycanla digər ölkələr arasında uçuşlar bərpa edilə bilər
H.Hacıyev bildirib ki, Azərbaycanla digər ölkələr arasında hava reyslərinin açılmasına baxıla bilər. Onun sözlərinə görə, Bakı-İstanbul pilot layihəsinin davamı olaraq digər ölkələrlə də reyslərin açılmasına baxıla bilər.
H.Hacıyev vurğulayıb ki, ölkələrin qarşılıqlı razılığı olduğu təqdirdə belə addımlar atıla bilər.
PA rəsmisi əlavə edib ki, İstanbuldan təşkil olunan reyslərdə tələbələrə AZAL tərəfindən 30 faiz güzəşt tətbiq olunur.
Ermənistan hakimiyyəti rəqəmlərin əksəriyyətini gizlədir
Ermənistan hakimiyyətinin yarıtmaz siyasəti nəticəsində ölkədə koronavirusla bağlı acınacaqlı vəziyyətin hökm sürdüyünü deyən H.Hacıyev bildirib ki, Ermənistan hakimiyyəti rəqəmlərin əksəriyyətini gizlədir, düzgün məlumat vermir.
PA rəsmisi vurğulayıb ki, Ermənistan dünyadan yardım diləndiyi halda, Azərbaycan Prezidentinin BMT Baş Assambleyasının xüsusi sessiyasının keçirilməsi ilə bağlı qlobal təşəbbüsünə qarşı çıxır: “Bu, bir daha Ermənistanın əsl mahiyyətini ortaya qoymuş oldu. Bütün dünya ölkələri koronavirusla bağlı həmrəylik nümayiş etdirir. Dünya ölkələri bəyan edir ki, bu təşəbbüs çox vacib və yerində irəli sürülən bir təşəbbüsdür. Lakin Ermənistan tərəfi bu təşəbbüsə qarşı çıxmaqla əsl mahiyyətini ortaya qoymuş oldu”.
Evdə müalicə olunan xəstələr dərmanlarla təmin olunacaq
Səhiyyə Nazirliyinin Aparat rəhbəri Eldar Zeynalov isə deyib bildirib ki, evdə müalicə olunan COVID-19 xəstələrinə dərmanların poliklinikalar vasitəsilə çatdırılması nəzərdə tutulur. Onun sözlərinə görə, bu dərmanlar qeydiyyatda olan xəstələrə veriləcək.
E.Zeynalov bildirib ki, ev şəraitində müalicə edilən xəstələrin dərman təminatı məsələsi həll olunacaq. Ev şəraitində müalicə edilənlər COVID-19-a yoluxan, ancaq simptomsuz olan və yüngül əlamətləri, toksik dərmanlarla müalicəyə ehtiyacı olmayan xəstələrdir.
Nazirlik rəsmisi əlavə edib ki, evdə müşahidə altında saxlanılan şəxslərin immun sistemini gücləndirən yüngül dərmanlarla, əsasən vitaminlərlə müalicəsi nəzərdə tutulur.
O, virusa yoluxmuş şəxslərin apteklərə getməsinin yolverilməz olduğunu söyləyib.
Ev şəraitində müalicə işi poliklinikaların üzərinə qoyuldu, təcili yardımın işi yüngülləşəcək
N.Zeynalov deyib ki, poliklinikalar yükün bir hissəsini öz üzərinə götürdükdən sonra təcili yardım xidmətlərinin işinin daha səmərəli olacağını gözləyə bilərik. COVID-19-a yoluxmuş şəxslərin evdə müalicəsi və müşahidəsinin aparılması xəstəxanaların, tibb işçilərinin üzərinə düşən yükün azaldılması məqsədi daşıyır.
Onun sözlərinə görə, ev şəraitində müalicə işi poliklinikaların üzərinə qoyulub: “Təcili tibbi yardımın gec gəlməsi, testlərin gec bilinməsi ilə bağlı faktlar varsa da, poliklinikalar yükün bir hissəsini öz üzərinə götürdükdən sonra xəstəxanaların və təcili yardım xidmətlərinin işinin daha səmərəli olacağını gözləyə bilərik”.
Evdə müalicə edilən koronavirus xəstələri evi tərk edə bilməz
E.Zeynalov qeyd edib ki, ev şəraitində müalicə olunan COVID-19 xəstələrinin nəzarətdə saxlanması Nazirlər Kabinetinin 12 iyun tarixli qərarına edilən dəyişikliklə tənzimlənir. Onun sözlərinə görə, bu xəstələrin evi tərk etməməsi məqsədilə akt imzalanır və belə xəstələr iltizamnaməyə qol çəkirlər.
E.Zeylanov əlavə edib ki, belə xəstələrin vəziyyətinə sahə həkimləri telefonla nəzarət edirlər. Ehtiyac olarsa, həkimlər evə gələrək xəstəyə baxış keçirəcək və vəziyyəti qiymətləndirəcəklər.
Koronavirus əlamətlərini gizlədən vətəndaşlarımız var…
“Bunu etiraf edək ki, bir çox vətəndaş COVID-19-un əlamətlərini hiss edənə qədər onu başqalarına bildirməkdən çəkinir” – deyən N.Zeynalovun sözlərinə görə, belə şəxslər xəstəxanaya yerləşdiriləcəklərindən, planlaşdırdıqları işi görə bilməyəcəklərindən ehtiyat edirlər. Buna görə də bu xəstəliyi müəyyən müddət gizli saxlayırlar: “Onlar özbaşına müalicə tədbirləri görür və müəyyən nəticə gözləyirlər. Nəzərə almalıyıq ki, koronavirusa yoluxma zamanı xəstənin vəziyyətinin dəyişməsi qısa zaman ərzində baş verə bilər. Bu əlamətləri görən kimi həkimə müraciət etməyi tövsiyə edirəm”.
Koronavirus əlamətləri olan şəxslər hara müraciət etməlidir...
N.Zeynalov qeyd edib ki, indiyədək simptomu olan xəstələr COVID-19 testi vermək və ya xəstəxanaya çatdırılmaq üçün təcili tibbi yardıma müraciət ediblər. İndi isə bunun tətbiq ediləcəyi ardıcıllıq dəyişdirilib.
Onun sözlərinə görə, özündə COVID-19 xəstəliyinin əlamətlərini görən insanların poliklinikaya gəlməsinə ehtiyac yoxdur. Çünki bu zaman onlar digər şəxsləri də yoluxdura bilərlər: “Belə şəxslər poliklinika ilə əlaqə saxlayacaqlar. Bir çoxları sahə həkiminin də telefon nömrəsini bilir, onunla da əlaqə saxlamaq olar”.
N.Zeynalov qeyd edib ki, Bakıda və ətraf ərazilərdəki poliklinkaların əsasında 39 COVID məntəqəsi yaradılıb: “Özündə COVID əlamətlərini hiss edən şəxslər barədə məlumatlar bu məntəqələrə çatdırılacaq. Ondan sonra təcili yardım deyil, ilkin səhiyyə xidməti çərçivəsində briqadalar həmin şəxsin evinə gələrək analizlər götürəcəklər. Testin nəticəsi çıxana qədər ona təlimat veriləcək.
Testin nəticəsi müsbət çıxarsa, sahə həkiminin nəzarəti altında onun müalicəsi aparılacaq. Əgər vəziyyətdə dəyişiklik olacaqsa, bu barədə müvafiq qurumlara məlumat verildikdən sonra xəstə pandemik xəstəxanaların birinə çatdırılacaq”.
Evdə müalicə alan COVID-19 xəstələrinin sayı hələ ki, bəlli deyil
N.Zeynalov deyib ki, evdə müalicə alan COVID-19 xəstələrinin sayı hələ ki, bəlli deyil. Lakin artıq statistika yeni yanaşma ilə aparılmağa başlanır. Onun sözlərinə görə, COVID-19 xəstəliyindən əziyyət çəkmiş və xəstəxanada müalicə olunan xəstələr evə yazılarkən onlara ambulator müalicə təyin edilir. Bu xəstələr sahə həkiminin nəzarəti altında aparılır: “Beləliklə, həmin xəstələr yaşadığı ünvan üzrə poliklinikada qeydiyyatda olurlar. Hazırda Bakı və ətraf qəsəbələrdə 2000-ə yaxın şəxs poliklinika nəzarətindədir. Amma bundan sonra poliklinika tərəfindən qeydiyyata alınan, aktiv nəzarətə götürülən, yüngül əlamətləri olan xəstələrin statistikası yenidən formalaşdırılacaq”.
Y.Qarayeva isə bildirib ki, TƏBİB testlərlə bağlı işləri davam etdirir və bu prosesdə gecikmə olmur. Onun sözlərinə görə, hazırda qurum pozitiv şəxslərin təmaslarını və xaricdən gələnləri test edir: "Bizim laborator imkanların artırılması planlaşdırılır. Yaxın vaxtlarda ölkəyə xaricdən yeni avadanlıqların gətirilməsi gözlənir. Ümumi olaraq test saylarının artması müşahidə olunur".
Ramin Bayramlının istefa verməsi xəbərləri təkzib edildi
Y.Qarayeva deyib ki, TƏBİB-in sədri Ramin Bayramlı istefa verməyib və hazırda iş başındadır. Onun sözlərinə görə, TƏBİB-də COVID-19-la mübarizə ilə bağlı hazırda layihələr həyata keçirilir və Ramin Bayramlı həmin layihələrə rəhbərlik edir: "Bu gün Türkiyədən həkimlər dəvət olunub və Ramin Bayramlı onlarla birlikdə COVID-19-la mübarizə istiqamətində çalışır. Hazırda Ramin Bayramlı xəstəxanalarda xəstələrin vəziyyətini şəxsən nəzarətdə saxlayır".
Apteklərdə satılan dərmanların qiymətinə nəzarət kimin səlahiyyətindədir…
Y.Qarayeva bildirib ki, TƏBİB apteklərdə satılan dərmanların qiymətinə nəzarət etmək səlahiyyətində deyil. Onun sözlərinə görə, qurum yalnız xəstəxanalara nəzarət edir: "Bizim vəzifəmiz xəstəxanalarda dərman çatışmazlığının aradan qaldırılması və xəstələrin vəziyyətini nəzarətdə saxlamaqdır. Biz bu prosesə ciddi nəzarət edirik. Amma apteklərdə qiymət tənzimləmək bizlik deyil".
Artıq gənc yaşda insanlar da yoluxur
Y.Qarayeva deyib ki, Nazirlər Kabineti yanında Operativ Qərargah yaranandan COVID-lə mübarizə üçün planlar hazırlayıb.
Onun sözlərinə görə, TƏBİB çalışır ki, itkilər minimal olsun: "Bunun üçün planlar həyata keçiririk. Bu xəstəlik çox ciddidir. Artıq gənc yaşda insanların yoluxmalarına şahid oluruq. Biz bu prosesi nəzarətdə saxlayırıq. Gözləmirik ki, xəstəlik pik həddə çatsın".
Karantin rejiminin müsbət nəticəsi…
TƏBİB-in şöbə müdiri qeyd edib ki, Azərbaycanda tətbiq edilən xüsusi karantin rejimi öz müsbət nəticəsini verir. Onun sözlərinə görə, tətbiq edilən xüsusi karantin nəticəsində yoluxma sabitləşib. Karantin bizim xəstəxanalarda palata sayımızı nizamlamağa imkan verir, xəstələrin yerləşdirilməsinə şərait yaradır. Karantin rejimi, həmçinin, xəstəliyin yoluxma səviyyəsinin iki dəfə artmasının qarşısını alır".
Y.Qarayeva deyib ki, dünya mətbuatında koronavirusun mutasiya etməsi haqqında məlumatlar yer alıb. Azərbaycanda bununla bağlı araşdırma aparılmır. Onun sözlərinə görə, bu məsələ ilə əlaqəli məlumatlar aparılacaq tədqiqatların mövzusudur: "Bu, yeni bir virusdur. Azərbaycanda da bununla bağlı araşdırma aparılacaq".
