12/07/2020 07:28
728 x 90

İyunun sonunda karantin sərtləşdirilməsinin birhəftəlik ən ciddi yekunu – yoluxma sürətində artım tam cilovlandı…

Musa Ağayev: “...yoluxanların statistikasında xeyli azalmanı müşahidə edirik”

img

Ölkəmizdə koronavirus pandemiyasının böyük sürətlə yayılmasının qarşısının alınması üçün dövlət səviyyəsində həyata keçirilən mübarizə tədbirlərinin müsbət nəticələr verməsi müşahidə edilməkdədir.

İyunun 21-dən iyulun 5-nə qədər ölkəmizin bir sıra şəhərlərində və rayonlarında sərt karantin rejiminin qüvvəyə minməsi vətəndaşların sağlamlığını hər şeydən üstün tutan dövlətin növbəti təhlükəsizlik tədbirlərindən biridir. Son bir həftənin nəticələrini təhlil etsək görərik ki, yoluxma halları xeyli sayda azalıb. Sərt karantin rejiminə qədər gündə yoluxanların sayı 590 nəfər idisə, bu gün statistikada 50, 40 azalma müşahidə edirik.    

Bildiyimiz kimi, mayın sonlarında Azərbaycanda həyata keçirilən yumşalma prosesi nəticəsində virusa yoluxanların sayında sürətli artım baş verdi və xəstəlik daha geniş şəkildə yayılmağa başladı. Lakin dövlətin prosesin nəzarətdən çıxmasına imkan verməyərək, iyunun 21-dən iyulun 5-nə qədər  məlum şəhər və rayonlarda ciddi karantin rejimi elan etməsi yoluxmanın artmasının qarşısının alınmasına ciddi təsir etdi. Məlum olduğu kimi, 21 iyun tarixindən tətbiq edilmiş ciddi karantin rejimi nəticəsində gündəlik yoluxma hallarının sayında müəyyən qədər sabitləşmə təmin edildi. Yoluxma sayının azaldılması ilə  hələ də epidemioloji vəziyyəti qənaətbəxş hesab etmək olmaz. Çünki gündəlik yeni yoluxan xəstələrin sayı sağalanların sayından artıq olur ki, bu da, öz növbəsində, təcili tibbi yardımın operativliyinə mənfi təsir göstərir, səhiyyə müəssisələrinin işini bir qədər də ağırlaşdırır. Bildiyimiz kimi, hazırda tətbiq edilən ciddi karantin rejimi nəticəsində şəhər üzrə mobilliyin və ictimai nəqliyyatdan istifadənin nisbətən aşağı düşməsi müşahidə edilir. Əhalinin daha çox evdə qalması, kütləvi toplantıların, gəzintilərin olmaması, insanlar arasında yaxın təmasların kəskin azalması nəticəsində növbəti günlərdə vəziyyətin nisbətən yaxşılaşması və müsbət dinamikanın əldə olunması gözlənir.

Mövcud vəziyyəti şərh edən ekspertlər hesab edirlər ki, karantin rejiminin növbəti həftələrdə də tətbiq edilməsinə ciddi zərurət var. Onlar hesab edirlər ki, ciddi karantin rejiminin ilk həftəsində biz müsbət dinamikanın şahidi olduq. Ekspertlər hesab edirlər ki, ölkədə koronavirus pandemiyasının sürətlə yayılması prosesini ikihəftəlik ciddi karantinlə tənzimləmək, cilovlamaq mümkün olub. Növbəti həftələrdə ciddi rejim davam edərsə, daha müsbət nəticələr əldə edə bilərik.

  • “Ciddi karantin rejiminin davam etdirilməsi zərurətdən irəli gəlir və vəziyyətdə tam müsbət nəticə əldə etmək istəyiriksə, buna gedilməlidir”

“Yeni Zaman” partiyasının sədri, tanınmış siyasi icmalçı Musa Ağayev “Bakı-Xəbər”ə bildirdi ki, ölkəmizdə qüvvədə olan ciddi karantin rejimini dəstəkləyir. M.Ağayevin sözlərinə görə, iyunun 21-dən indiyə qədər virusa yoluxanların sayında azalmanın müşahidə edilməsi prosesin tam olaraq nəzarətə alındığından xəbər verir: “Əlbəttə, iyunun 21-dən etibarən ciddi karantin rejiminin birhəftəlik yekununa baxanda yoluxanların statistikasında xeyli azalmanı müşahidə edirik. Bu çox müsbət haldır. Ciddi karantin rejiminin davam etdirilməsi zərurətdən irəli gəlir və vəziyyətdə tam müsbət nəticə əldə etmək istəyiriksə, buna gedilməlidir. Düzdür, hökumət və vətəndaşlar karantin rejiminin uzadılmasını istəməzlər, amma hər şey nəticəyə bağlı məsələdir. Çünki bu, ölkə iqtisadiyyatına da, insanların sosial rifah halına da təsir göstərir. Amma bununla yanaşı, Azərbaycan dövləti üçün əsas faktor əhalinin sağlamlığı, təhlükəsizliyi  olduğu üçün, karantin rejiminin ciddiləşdirilməsi zəruridir. Ölkədə ya ciddi karantin rejimi davam etməlidir, ya da komendant saatı elan edilməlidir. Yəni bütün bunlar hamısı əhalinin təhlükəsizliyinin, sağlamlığının təmin edilməsinə, virusun təsirinin azaldılmasına gətirib çıxaran amillərdir. Eyni zamanda da hesab edirəm ki, bu ağır şəraitdə insanlar, vətəndaşlar özlərində məsuliyyət hiss etməli və qaydalara əməl etməklə özlərini, eləcə də yaxın ətraflarını qorumuş olarlar. Ancaq təəssüflər olsun ki, bəzi vətəndaşlarda məsuliyyət hissi yetərincə deyil. İnsanın həqiqətən də temperaturu varsa, özünü narahat hiss edirsə, həkimə müraciət etməli, özünü və yaxın ətrafını düşünməlidir. Özünə hörmət edən başqalarına da hörmət etməlidir. Camaat bilməlidir ki, vəziyyət ciddidir. Bu məsələdə vətəndaşın üzərinə böyük məsuliyyət düşür. Vətəndaşlar öz üzərlərinə düşən vəzifəyə əməl etsələr, virusun artım tempi çox-çox aşağı düşər. Dövlət tərəfindən görülən tədbirlərlə yanaşı, ilk növbədə, insanlar özlərində məsuliyyət hiss etməlidirlər” - deyə M.Ağayev vurğuladı.

Partiya sədrinin də qeyd etdiyi kimi, karantin rejiminin bu şəkildə davam etdirilməsi bir zərurətdir və bu, insanların sağlamlığına, təhlükəsizliyinə xidmət edən faktordur.

İradə SARIYEVA 

Son xəbərlər