Azərbaycanda koronavirusa yoluxanların sayı artdıqca, COVID-19 testindən keçmək istəyən şəxslərin sayı da artır. Məlumat üçün bildirək ki, hazırda Azərbaycanda iki cür koronavirus testi aparılır. Bunlardan biri burundan və ağız boşluğundan yaxma götürülməklə, digəri isə seroloji test vasitəsilə, yəni qan analizi verməklə aparılır. Burun və ağız boşluğundan götürülən yaxma sizin hazırda COVID-19 infeksiyası daşıyıb-daşımadığınızı göstərir. Seroloji test isə indiyədək nə vaxtsa koronavirusa yoluxub-yoluxmadığınızı müəyyən edir.
Qeyd edək ki, COVID-19-a görə müayinələr “İnci” laboratoriyası, “Referans” klinikası və "Memorial Klinik"də aparılır.
Koronavirus testinin qiyməti insanlar arasında narazılıq yaradır. Özündə hər hansı bir narahatlıq hiss edən şəxs adıçəkilən xəstəliyə görə test vermək istəyir. Ancaq testin qiymətinin hər kəsin büdcəsinə uyğun olmaması insanları narazı salır. Xüsusilə də özəl klinikalarda koronavirus testinin qiyməti bahadır. Məlumat üçün bildirək ki, özəl klinikalarda test qanvermə üsulu ilə aparılırsa, 40-110 manat, yaxma ilə aparılırsa 100-130 manata başa gəlir.
Rəvanə Əliyeva: “Müayinələri aparan klinikalar özəl olduğundan, testlərin qiymətləri də onların özləri tərəfindən müəyyən edilib”
Tibbi Ərazi Bölmələrini İdarəetmə Birliyinin (TƏBİB) mətbuat katibi Rəvanə Əliyeva bildirdi ki, müayinələri aparan klinikalar özəl olduğundan, testlərin qiymətləri də onların özləri tərəfindən müəyyən edilib. Bu klinikalar xarici ölkələrə uçuş üçün müəyyən edilsə də, istənilən şəxs müayinə üçün həmin müəssisələrə müraciət edə bilər.
Adil Qeybulla: “Özəl sektorda isə qiymət təyin olunan zaman əhalinin büdcəsi nəzərə alınmalıdır”
Professor, həkim-ekspert Adil Qeybulla qeyd etdi ki, qiymətlər baha olduğundan, çox adam test üçün müraciət edə bilmir: “Koronavirus testləri xüsusi dövlət xəstəxanalarında pulsuz olmalıdır və hazırda pulsuzdur. Özəl sektorda isə qiymət təyin olunan zaman əhalinin büdcəsi nəzərə alınmalıdır. Yəni testlərə maksimum 30 manat aralığında qiymət qoyula bilər. Bəlkə də bu qiymətlər testin alınma qiymətindən asılıdır. Təbii ki, dövlətin özəl sektorun işinə müdaxilə etmək ixtiyarı yoxdur. Amma özəl sektor özü də bazarda olan rəqabətə görə qiyməti tənzimləyir. Bu testləri əhaliyə əlçatan qiymətə təşkil etmək lazımdır ki, istənilən adam testdən keçə bilsin. Özəl xəstəxanalar da maraqlı olmalıdırlar ki, səhhətindən şübhələnən şəxslər yoxlamadan keçsinlər. Belə olsa, xəstələri aşkar etmək daha tez başa gələr. Əks halda, testlərin aparılması yalnız TƏBİB-in nəzarətində olsa, prosesin gedişatı çətin olacaq".
Həmsöhbətimiz onu da əlavə etdi ki, TƏBİB testləri pulsuz şəkildə vətəndaşlar üzərində tətbiq edirsə, bu prosesi yenə davam etdirməlidir: "Ən azı, testləri özəl xəstəxanalara ucuz qiymətə paylaya, onlar da müəyyən qədər öz faizlərini testlərin üzərinə qoyaraq, münasib qiymətlə tətbiq edə bilərlər.
Günel CƏLİLOVA
