Rafis Bağırov: “Son bir neçə ayda pandemiya ilə bağlı təcili tibbi yardım stansiyalarının işi həddindən artıq çoxalıb”
Elə insanlar var ki, adətkar olduqlarından yaxşını da pis kimi, ağı da qara kimi görürlər. Əlbəttə, belələri hər şeyi öz düşüncələrinə uyğun şəkildə təqdim edirlər. Bu gün Azərbaycan əhalisinin böyük faizi ölkənin təcili tibbi yardım sistemindən razı olsa da, təəssüflər olsun ki, bəzi narazı qalanlara da rast gəlinir. Bu insanlar təcili tibbi yardımın fəaliyyətinə kölgə salmaq istəyənlərdir.
Son günlər sosial şəbəkələrdə müəyyən insanlar təcili tibbi yardımın fəaliyyətini qaralamaqla məşğuldurlar. Qaralama kampaniyası aparan insanlar iddia edirlər ki, guya təcili tibbi yardım stansiyaları çağırışlara operativ cavab vermir, təcili yardım maşınları vaxtında gəlib çıxmır, gecikir.
Pandemiya ilə mübarizədə Azərbaycan səhiyyəsi və onun vacib qollarından birini təşkil edən təcili tibbi yardımın üzərinə çox böyük yük düşür. Ölkəmizin bütün səhiyyə sistemi tam gücü ilə pandemiya ilə mübarizəyə səfərbər olunduğu bir vaxtda kimlərinsə təcili tibbi yardım stansiyalarının və bu sistemdə gecə-gündüz çalışan personalın əməyinin üzərindən qara xətt çəkməsi yolverilməzdir. Bu gün respublikamızda koronavirus pandemiyasının təsirləri artır və daha çox insanın bu virusa yoluxduğunu görürük. Virusun yaratdığı problemlər, psixoloji gərginlik vətəndaşların daha çox təcili tibbi yardıma müraciət etməsinə səbəb olur. Gün ərzində yüzlərlə vətəndaşa xidmət göstərən təcili tibbi yardım personalının üzərinə bu çətin şəraitdə ağır yük düşdüyünün şahidi oluruq. Ümumiyyətlə, təcili tibbi yardım stansiyalarının əməkdaşları mümkün qədər xəstələrin dadına yetməyə çalışırlar. Azərbaycan vətəndaşlarının bu halda təcili tibbi yardımın fəaliyyətinə anlayışla yanaşması arzuediləndir. Təəssüf ki, bəziləri onların fəaliyyətinə anlayışla yanaşmaq əvəzinə, onu qaralamaqla məşğuldurlar. Pandemiya ilə mübarizədə təcili tibbi yardım həkimlərinin və tibb işçilərinin fəaliyyəti fasiləsizdir və onlar hər an xəstələrin yanına tələsirlər.
Səhiyyə sisteminin mükəmməlliyi ilə öyünən bir çox Qərb və Avropa ölkələrinin səhiyyəsinin pandemiya ilə mübarizədə aciz qaldığı bir dövrdə Azərbaycan səhiyyə sistemi tamamilə səfərbər olunmuş şəkildə virusla mübarizəyə qoşuldu. Bundan əlavə, son aylar ölkəmizdə koronavirusa yoluxan xəstələrin müalicəsi üçün yeni klinikalar, modul tipli xəstəxanalar inşa edildi. Özü də bu proses yalnız paytaxtla məhdudlaşmadı, bölgələri də əhatə etdi. Bundan başqa, ölkənin təcili tibbi yardım avtomobil parkı vaxtaşırı yenilənir, daha müasir nəqliyyat növü ilə təmin edilir. Paytaxtla yanaşı, digər rayon və şəhərlərin də təcili tibbi yardım avtomobil parkı yenilənir.
Tanınmış ekspertlər qeyd edirlər ki, ölkə ərazisində virusa yoluxanların və başqa xəstəliklərdən əziyyət çəkən insanların sayı çox olduğundan, ola bilsin, təcili tibbi yardım çağırış ünvanına bir az gec çatsın, amma bu heç də bu sistemin qaralanmasına əsas vermir. Ekspertlərin bildirdiyinə görə, təcili tibbi yardım stansiyaları mümkün qədər çağırışlara operativ cavab verməyə çalışır və buna nail olur da. Bu gün pandemiya ilə mübarizədə böyük mücadilələr verən həkimlərə hər bir vətəndaş ciddi dəstək verməlidir.
- “Vətəndaşlar bunu anlayışla qarşılamalı...”
Tanınmış həkim-terapevt Rafis Bağırov “Bakı-Xəbər”ə bildirdi ki, bir yeri ağrıyan adamın, ilk növbədə, atdığı addım təcili tibbi yardım məntəqəsinə müraciət etmək olur. Pandemiya ilə əlaqədar olaraq bu gün səhiyyə sisteminin, onun tərkib hissəsi olan təcili tibbi yardımın yükləndiyini deyən R.Bağırov hesab edir ki, bu sahədə hər hansı bir nöqsan olsa belə, bu, onların fəaliyyəti haqqında mənfi fikir söyləməyə əsas vermir: ”Son bir neçə ayda pandemiya ilə bağlı təcili tibbi yardım stansiyalarının işi həddindən artıq çoxalıb. Bir çox hallarda onlar xəstə sıxlığı ilə qarşılaşırlar. Virus və qeyri-virus mənşəli xəstəliklərlə əlaqədar olaraq təcili tibbi yardım stansiyalarına müraciətlər artıb. Onu da bildirim ki, bu gün təcili tibbi yardım sahəsində çalışan həkimlərin, tibb işçilərinin sayının artırılmasına ehtiyac var. Onlar bəzən xəstənin çoxluğundan çağırışlara vaxtında çata bilmirlər. Vətəndaşlar bunu anlayışla qarşılamalı, hər kəs öz sahəsində həkimlərə dəstək olmalıdır. Pandemiya ilə mübarizə apardığımız bu dövrdə Dövlət Tibb Universitetinin axırıncı kurs tələbələrini təcili tibbi yardım stansiyalarına səfərbər etmək lazımdır” - deyə R.Bağırov vurğuladı.
İradə SARIYEVA
