Həkimlik çox nəcib peşədir. İnsanların sağlamlığını qorumaq, onlara ömür bəxş etmək, yaşatmaq müqəddəs və şərəfli bir vəzifədir. Ümid yeri olmaq, şəfa paylamaq, ömürlərə ömür calamaq xeyirxah olduğu qədər də gərəkli və müqəddəs işdir. Elə bu nəcib peşələrinə görə həkimlər hər cür hörmət və ehtirama layiqdirlər.
Dünyanı bürüyən koronavirus pandemiyası ilə mübarizədə həkimlərimizin fədakarlıqlarını, Hippokrat andına sadiqliklərini, öz vəzifə borclarını şərəflə yerinə yetirdiklərini bir daha nümayiş etdirirlər. Hər bir ölkənin tərəqqisində, vətəndaş məmnunluğunun artırılmasında bu və ya digər peşə sahiblərinin öz vəzifə borclarını şərəflə yerinə yetirmələri əsas rol oynayır. Koronavirusla mübarizə bütün peşə sahiblərini bir araya gətirdi, onları daha səylə çalışmağa, birlik, həmrəylik fonunda bu çətinlikdən şərəflə çıxmağa səslədi. “Evdə qalaq həkimlərə dəstək olaq!” çağırışı da bunu bir daha təsdiqləyir.
Pandemiya hər bir dövlətin səhiyyə sistemində mövcud imkanlara da işıq salır. Dünyanın inkişaf etmiş ölkələrində yoluxma və ölüm hallarının günbəgün artması, müalicələrin sayının azalması da bir çox məqamların açılmasında yardımçıdır. Lakin Azərbaycan ilk gündən insanların sağlamlığının təmin olunmasını qarşıya prioritet vəzifə kimi qoyduğundan, diqqəti daha çox xəstələrin müalicəsinə yönəltdi.
Pandemiya dövründə virusa yoluxmuş insanların sağalması üçün tibb işçiləri əllərindən gələni edirlər.
Azərbaycanlı həkim Murad Məmmədli sosial şəbəkələr vasitəsilə bildirib ki, karantin “görüntü yaratmaq” üçün tətbiq edilməyib, Bakı xəstəxanalarında xəstələr üçün yerlər həqiqətən qurtarır: “Mən həkiməm, COVID-19 xəstələri ilə işləyirəm. Yalnız Allah bilir biz xəstəxanada nələr çəkirik… Bütün həkimlərin üzünün dərisi çıxır, ayaqlarında damarlar şişib. Vəziyyət xeyli dərəcədə ciddiləşib. Hər şey biz zənn etdiyimiz kimi olmadı. Bakıda COVID pasientləri üçün ayrılan yerlər qurtarır. Yoluxma maskimal dərəcədədir. Hər gün ağır pasientlərin sayı artır. Bu templə bütün gücümüz və gördüyümüz işlərə baxmayaraq, ölənlərin sayı kəskin artacaq”.
Qeyd etdiyimiz kimi, koronaviruslu xəstələrlə çalışan həkimlər 8 saat dayanmadan xüsusi geyimdə xəstələrlə təmasda olurlar. Onlar həmin müddət ərzində su, qida qəbul edə bilməzlər. İsti yay günlərində həkimlər hava buraxmayan geyimdə olurlar. Təəssüf ki, həkimlər arasında da koronavirusa yoluxanlar və həyatını itirənlər də var. Məlumat üçün bildirək ki, bu günə qədər 700-ə yaxın tibb işçisi koronavirusa yoluxub.
Pandemiya dövründə gecələrini gündüzə qatan həkimlər üçün rəmzi abidənin qoyulması təklif olunur.
“...bu xəstəliyə yoluxan insanların sağalıb ailələrinə dönməsi üçün hər kəs bir araya gəlməlidir”
“Vəfa” Sosial-İctimai Birliyinin sədri Fatimə Hacıbəyli qeyd etdi ki, sağlamlığımızın keşikçiləri olan həkimlərimiz öz həyatlarını təhlükə qarşısında qoyaraq, gecəli-gündüzlü koronavirus infeksiyasının qarşısını almaq, bu xəstəliyə yoluxan insanların sağalıb ailələrinə dönməsi üçün bütün imkanlardan maksimum istifadə edirlər. Ən əsası, peşələrindən irəli gələn məsuliyyət hissinin ağırlığını daha dərindən dərk edirlər. Bu gün sağlamlığımız uğrunda gedən mübarizənin əsas qəhrəmanları, öncülləri şəfalı əlləri ilə insanlara xidmət edən, hər gün xalqımız tərəfindən alqışlanan həkimlərimizdir: “Həkimlərə dəstək olmaq üçün bütün vətəndaşlar qoyulan qaydalara riayət etməlidirlər. Mümkün olan qədər hər bir şəxs karantin qaydalarına əməl etməlidir. Bəli, bu, indiki dövrdə müxtəlif səbəblərdən çətindir. Ancaq yaranan vəziyyət tələb edir ki, qoyulan məhdudiyyətlərə əməl olunmalıdır. Nəzərə almaq lazımdır ki, bütün dünya koronavirusdan əziyyət çəkir. Bu gün bütün dünya koronavirusla mübarizədə ön cərgədə gedən, yorulmadan gecə-gündüz çalışan, həyatlarını risq altına atan həkimlərin yanında olmalıdır. Vətəndaşlar onların fəaliyyətinə öz işi ilə kömək etməlidirlər. Azərbaycan həkimləri mümkün olan qədər səy göstərirlər. Bu çətin problemin öhdəsindən gəlmək üçün çalışırlar. Hesab edirəm ki, vətəndaşlar bu məsələdə nə mümkündürsə onu etməlidirlər. Gündəlik gigiyena qaydalarına yüksək səviyyədə əməl olunmalıdır. Bütün bunlar, nəticə etibarilə, həkimlərin işini asanlaşdıra bilər”.
Həmsöhbətimiz onu da əlavə etdi ki, pandemiya dövründə çalışan fədakar həkimlər üçün rəmzi abidə qoyulsa yaxşı olar.
Günel CƏLİLOVA
