Nazirlər Kabineti yanında Operativ Qərargah koronavirusla bağlı KİV nümayəndələri üçün brifinq keçirib. “Trend”-in məlumatına görə, brifinqdə ÜST-ün Azərbaycandakı nümayəndəliyinin rəhbəri Hande Harmancı, TƏBİB-in xəstəliklərin profilaktikası və kontrolu şöbəsinin müdiri Yaqut Qarayeva və BMT-nin Azərbaycandakı rezident əlaqələndiricisi Qulam İshaqzai jurnalistləri maraqlandıran suallara cavab verib.
Evlərdə, parklarda bir araya toplanırıqsa, xəstəliyin qarşısını ala bilməyəcəyik…
Yaqut Qarayeva deyib ki, bəzi vətəndaşlar artıq koronavirusun çox ciddi xəstəlik olduğunu hiss etməyə başlayıblar. Onun sözlərinə görə, bəzi insanlar sərt karantin olsa da yenə arxa küçələrdə toplaşır və maskadan istifadə etmirlər: "Hər bir vətəndaş dərk etməlidir ki, bu xəstəlik ağır keçir. Bəziləri uşaqları küçələrə buraxırlar. Buna nəzarət olunmalıdır. Vətəndaşlar parklarda 10 nəfərdən çox bir yerə toplanmasın. Əgər qaydalara əməl etsək, bu xəstəlikdən qoruna bilərik. İstər evlərdə, istər parklarda bir araya toplanırıqsa, xəstəliyin yoluxmasının qarşısını ala bilməyəcəyik və yoluxma sayı daha da artacaq".
Evdə müalicə olunanlara - həkimin icazəsi olmadan özbaşına dərman istifadə etməyin
Y.Qarayeva deyib ki, TƏBİB-in istifadə etdiyi dərmanlar evdə müalicə üçün hazırlanıb və paylanıb. Onun sözlərinə görə, evdə yalnız simptompsuz olan xəstələrin müşahidə altına alınması nəzərdə tutulub: "Bizim istifadə etdiyimiz dərmanlar simptomları olan şəxslər üçündür: "Evdə öz-özünə müalicə olunan şəxslərdən xahiş edirik, həkimin icazəsi olmadan özbaşına dərman alıb istifadə etməsinlər. Bu zərərlə nəticələnə bilər".
Bəziləri elə bilirlər ki, maskanı taxmamaqla kimisə aldadırlar, amma bilmirlər ki...
Y.Qarayeva qeyd edib ki, TƏBİB yalnız tibb müəssisələrinə nəzarət edir. İnsanların maska taxmasına nəzarət edə bilmir.
Onun sözlərinə görə, maskadan istifadəyə nəzarət səlahiyyəti qurumun səlahiyyətində deyil: "Biz maska taxmaları üçün vətəndaşlara müraciət edirik, amma onlara nəzarət etmək səlahiyyətində deyilik. Bəzi vətəndaşlar elə bilirlər ki, maskanı taxmamaqla kimisə aldadırlar. Amma bilmirlər ki, maska taxmaqla özlərini və ətrafdakıları qoruyurlar.
Qaydalar sərtləşdikcə vəziyyət gərginləşir. Marketlərdə hər kəsin üzərinə bir polis qoya bilmərik. Bunun üçün ictimai qınaq olmalıdır. Ona görə də maskasız olan vətəndaşlar qınaq obyektinə çevrilməlidir".
Bir müddət özümüzü yaxınlarımızdan da təcrid etməliyik
“Fevralın sonundan etibarən xaricdən ölkəyə virusun gəlməsinin qarşısını aldıq. Amma virus ölkəyə daxil olandan sonra yayılmağa başladı” deyən Y.Qarayevanın sözlərinə görə, bunun üçün sərhədlərimiz nəzarətə götürüldü:"Avropa ölkələrində bu virus yayılanda biz bunun qarşısını sərhədləri nəzarətə götürməklə ala bildik. Amma ölkədə vətəndaşlar qaydalara riayət etmədiyi üçün xəstəlik yayıldı.
Bu virus insandan insana yayılır. Ona görə də biz bir müddət özümüzü hətta yaxınlarımızdan da təcrid etməliyik".
TƏBİB-dən xəbərdarlıq - xüsusi karantin rejimi yenidən sərtləşdirilə bilər
TƏBİB-in şöbə müdiri bildirib ki, əgər koronavirusa yoluxma çoxalarsa, xüsusi karantin rejimi yenidən sərtləşdirilə bilər. Onun sözlərinə görə, ölkədə karantin qaydalarının sərtləşdirilməsi cəmiyyətdən asılıdır: "Əgər yoluxma çoxalarsa, xüsusi karantin rejimi yenidən sərtləşdirilə bilər. Biz sərtləşməyə getmək istəməsək də vəziyyət buna şərait yarada bilər".
Xroniki xəstələr özlərini təcrid etməli və daha ciddi qorunmalıdırlar
Y.Qarayeva səhhətində xroniki xəstəlik olanlar risq qrupuna aiddirlər. Onun sözlərinə görə, vərəm və digər xəstəliyi olanlar özlərini qorumalıdırlar: "Çünki bu xəstəlik hava-damcı yolu ilə yayılır. Ona görə də onlar toplu insanlar olan yerə getməməlidirlər. Biz bütün tibb müəssisələrini bağlayıb COVİD xəstəxanası edə bilmərik. Bəs onda bizim xroniki xəstələrimizin müalicəsi necə olacaq?! Ona görə də xroniki xəstələr özlərini təcrid etməli və daha ciddi qorunmalıdırlar".
BMT: Pandemiya ilə mübarizədə Azərbaycanın yanındayıq
BMT-nin Azərbaycandakı rezident əlaqələndiricisi Qulam İsaqzai isə bildirib ki, koronavirus pandemiyası ilə mübarizədə biz Azərbaycanla əməkdaşlıq edirik və Azərbaycanın yanındayıq. O qeyd edib ki, BMT Azərbaycana texniki yardım göstərir və bu sahədə bilikərin artırılmasında dəstək olur: “Biz müxtəlif istiqamətlərdə dövlət strukturlarının biliklərinin artırılmasında iştirak etmişik”.
Q.İsaqzai vurğulayıb ki, pandemiyanın yaratdığı təhlükə İkinci Dünya Müharibəsindən sonra bəşəriyyətin üzləşdiyi ən böyük təhlükədir: “Bu virusa qarşı mübarizə qlobal həmrəylik və əməkdaşlıq tələb edir, eyni zamanda ölkə daxilində bütün vətəndaşların həmrəylik göstərməsi vacibdir. Hökumətlər cəmiyyətin hər bir üzvünün iştirakı olmadan bu pandemiyaya qalib gəlmək imkanında deyillər. Bu virusa qalib gəlmək üçün cəmiyyətin hər bir üzvü öz məsuliyyətini dərk etməli və üzərinə düşən vəzifəni yerinə yetirməlidir. Bu virusa qalib gəlməsək, ölkələrdə iqtisadiyyatın bərpası mümkün olmayacaq”.
Q.İsaqzai vurğulayıb ki, Azərbaycanda sosial-iqtisadi vəziyyətin bərpası ilə bağlı İqtisadiyyat Nazirliyi ilə danışıqlar aparılır.
Koronavirusa qarşı peyvənd nə zaman hazır olacaq...
ÜST-ün Azərbaycandakı nümayəndəliyinin rəhbəri Hande Harmancı isə deyib ki, pandemiyanın sürəti getdikcə artır. Avropada vəziyyət yaxşılığa doğru getsə də, qlobal vəziyyət ürəkaçan deyil. Onun sözlərinə görə, artıq bir peyvənd sınaq mərhələsindədir. 2020-ci ilin sonuna kimi bu peyvəndin əlçatan ola biləcəyi gözlənir.
H.Harmancı əlavə edib ki, bu yaxınlarda Azərbaycana yeni fərdi qoruyucu vasitələr gətirilib. Bundan sonra ölkəyə daha iki partiya qoruyucu vasitələr gətiriləcək.
Son 14 gündə yoluxma sayında 50 faiz artım...
H.Harmancı bildirib ki, son 14 gündə Azərbaycanda COVİD-19-a yoluxma sayında 50 faiz artım olub. Onun sözlərinə görə, hazırda ən vacib tədbir fiziki məsafənin qorunmasıdır: “Mən COVİD-19-un təhlükəsini dərk edən insanlara müraciət edərək demək istəyirəm ki, bilgilərinizi yalnız özünüz üçün saxlamayın. Bu barədə digər insanlara da məlumat verin”.
Qeyd edək ki, 21 iyun saat 00:00-dan Bakı, Sumqayıt, Gəncə, Lənkəran, Yevlax, Masallı, Cəlilabad şəhərlərinin və Abşeron rayonunun ərazisində xüsusi karantin rejiminin sərtləşdirilməsi tətbiq edirlir. Sərtləşdirilmiş xüsusi karantin rejimi 5 iyul saat 06:00-dək davam ediləcək.
