Azərbaycan dövlətinin koronavirusla mübarizə strategiyası tamamilə yeni, təkmil və faydalı bir platforma kimi bütün dünyaya nümunə olub. Mübaliğəsiz deyə bilərik ki, dövlət bu istiqamətdə bütün vacib və gərəyi olan tədbirləri böyük qayğı ilə, məsuliyyətlə həyata keçirib və keçirməkdə də davam edir.
Başdan görülən qabaqlayıcı tədbirlər, virusun yayıldığı dövrdə həyata keçirilən hərtərəfli işlər buna nümunədir. Proses vətəndaşların və dünyanın gözləri qarşısında həyata keçirildiyi və bu barədə kifayət qədər deyildiyi, danışıldığı üçün, detallara varmaq istəmirik. Fakt budur ki, Azərbaycan dövləti koronavirusla mübarizə istiqamətində həyata keçirdiyi bütün tədbirləri vətəndaşlarımızın sağlamlığının qorunması və virusdan çəkəcəyimiz zərərin minimuma endirilməsi naminə edib. Amma təəssüf ki, bir sıra vətəndaşların məsuliyyətsizliyi üzündən koronavirusla mübarizədə hələ də qalib gələ bilməmişik. Amma məsuliyyətimizi daha da artırsaq, səhlənkarlığımızı unutsaq və dövlətin qoyduğu qayda-qanunlara əməl etsək, inanırıq ki, tezliklə virusla mübarizədən qalib çıxan xalqlardan, dövlətlərdən biri və birincisi kimi adımızı bəşər tarixinə yazdıracağıq.
Prezident İlham Əliyev iyunun 24-də 1 saylı Gəncə Şəhər Xəstəxanasının modul tipli infeksion xəstəliklər korpusunun açılışında etdiyi çıxış zamanı dövlətin koronavirusla mübarizə istiqamətində bütün mümkün tədbirləri həyata keçirdiyini və bundan sonra da keçirəcəyini bir daha bəyan edib. “....Dövlət nə lazımdırsa, onu edir. Bundan artıq nəsə etmək mümkün deyil. Çünki nə lazım idisə, biz onu etmişik və edəcəyik. Bu məqsədlər üçün istənilən vəsaiti xərcləməyə hazırıq, vəsaitimiz də var və heç kimdən də asılı deyilik” - deyə ölkə başçısı nitqində bildirib.
Prezidentin də nitqində bir daha qeyd etdiyi və bizim də gördüyümüz, şahidi olduğumuz kimi, dövlət koronavirusla mübarizə üçün nə lazımdısa edib və edir də. Bu halda, həqiqətən, cəmiyyət də dövlət kimi məsuliyyətli olsaydı, indi hansı nəticələrimiz olardı?
“...öz məsuliyyətini dərk edərək, bu bəlanın azalmasına səbəb olsunlar”
“Novoye vremya” qəzetinin baş redaktoru, tanınmış siyasi icmalçı Şakir Ağayev “Bakı-Xəbər”ə bildirdi ki, əgər vətəndaşlar dövlət kimi məsuliyyətli davransaydı və öz üzərinə düşən sadə vəzifəni icra etsəydilər, virusla bağlı vəziyyət bu dərəcədə kəskin olmazdı, yoluxanların sayı günü-gündən artmazdı. “Virusla bağlı təhlükəli vəziyyət artıq o həddə çatıb ki, cənab Prezident bununla bağlı narahatlığını açıq şəkildə cəmiyyətə, vətəndaşlara çatdırdı. Ölkə başçısı pandemiyanın təhlükəli hal aldığını cəmiyyətə çatdırmaqla, vətəndaşları bir daha məsuliyyətli olmağa çağırdı. Vətəndaşlar cənab Prezidentin çıxışından nəticə çıxarmalı və məsuliyyətlərini artırmalıdırlar. Əgər yadınızdadırsa, sizin qəzetdə bizim bu məsələ ilə bağlı dəfələrlə söhbətimiz olub. Yenə də qeyd edirəm ki, insanlar, vətəndaşlar məsuliyyətli olmasalar və öz üzərlərinə düşən vətəndaş məsuliyyətini dərk etməsələr, hər kəs evində, ailəsində, küçəsində, binasında bu virusla qarşılaşacaq. Bir sıra insanlar bu virusa yoluxana, yaxud yaxınları tutulana qədər virusun olduğuna inanmırdılar. Amma indi inanmağa başlayıblar. Bilirsiniz ki, ölkəmizdə dövlətin gördüyü tədbirlər nəticəsində virusa yoluxanların sayı çox az idi və vətəndaşlar həmin zaman məsuliyyətli davranmalı idilər ki, sonradan virus yayılmasın. Çox təəssüf ki, cəmiyyətin bir xeyli hissəsi pandemiyaya qeyri-ciddi yanaşdı və onların məsuliyyətsizliyi nəticəsində isə mövcud səhnə ilə üzləşdik. Pandemiya ilə bağlı mövcud olan sərt karantin rejiminin qaydaları çox sadə idi. Vətəndaşdan maska taxmaq, sosial məsafə saxlamaq, sanitar-gigiyena qaydalarına əməl etmək tələb olunurdu. Ağrılı hal ondan ibarətdir ki, vətəndaşlarımız buna biganə yanaşdılar, sərt karantin rejimi yumşalan kimi küçələrə, parklara, restoranlara, açılan ticarət mərkəzlərinə, mağazalara, yarmarkalara axışdılar. Onların, lazım oldu-olmadı, etdikləri bu hərəkətlər indiki duruma gətirib çıxardı. Vətəndaşlar zamanında məsuliyyətli davransaydılar, biz indi bu acı mənzərənin şahidi olmazdıq və virusla vidalaşmışdıq. Lakin belə olmadı. Prezidentin də qeyd etdiyi kimi, bu, ilk növbədə, insanların sağlamlığını təhlükə altına atdı, ikinci növbədə, ölkənin iqtisadi, maliyyə vəziyyətini ağır duruma saldı. Dövlət hər şeyi edir. Amma vətəndaş məsuliyyətsizliyinə görə vəziyyət istər sağlamlıq, istərsə də iqtisadi və maliyyə cəhətdən çətinləşərsə, vəziyyət daha da ağırlaşa bilər. Cənab Prezident bunu Gəncədə qeyd edib”.
Bir daha Azərbaycan vətəndaşlarını məsuliyyətli olmağa səsləyən Ş.Ağayev qeyd etdi ki, əhali hər şeydən əvvəl məsuliyyətli olarsa, dövlətin bu istiqamətdə gördüyü işlərin nəticəsi daha da effektiv olar. “Cənab Prezidentin söylədiyi kimi, ölkə vətəndaşları üç şərtə əməl etməlidir. Yəni vətəndaşlar maskadan istifadə etməli, ara məsafəsi saxlamalı və dezinfeksiya işləri görməlidirlər. Bu qaydalara vaxtında əməl etsəydik, məsuliyyətli olsaydıq, koronavirus bəlasından çoxdan xilas olmuşduq. Görürsünüz ki, başqa yerlərdə vəziyyət yaxşılaşdığı halda, bizdə vətəndaş məsuliyyətsizliyi nəticəsində durum getdikcə ağırlaşır. Hesab edirəm ki, heç olmasa, vətəndaşlar, cəmiyyət indən sonra dövlətin üzərinə götürdüyü məsuliyyətin bir hissəsini öz üzərinə götürüb, öz məsuliyyətini dərk edərək, bu bəlanın azalmasına səbəb olsunlar. Əgər vətəndaşlar indi öz məsuliyyətlərini anlayıb, üzərlərinə düşən vəzifəni görsələr, bu virusun səngiməsinə, azalmasına yardımçı olacaqlar” - deyə Ş.Ağayev vurğuladı.
Ekspertin də mövqeyindən məlum oldu ki, virusun azalması, tamamilə yox olması istiqamətində vətəndaşlar da, cəmiyyət də dövlətin məsuliyyətini bölüşməlidir. Bu amil bizi xalq və dövlət olaraq görünməz düşmənlə mübarizədə məğlub deyil, qalib edəcək.
İradə SARIYEVA
