Son günlər aparılan müşahidələr onu göstərir ki, hələ də bəzi sərnişinlər sosial məsuliyyətdən kənar davranaraq avtobusda, nəqliyyat mübadilə mərkəzlərində və dayanacaqlarda qoruyucu tibbi maskadan istifadə etmirlər.
Məlumdur ki, virusun ən sürətlə yayıldığı məkanlardan biri də ictimai nəqliyyatdır. İctimai nəqliyyatda tibbi maska taxılmasının zəruri olması dəfələrlə gündəmə gətirilib. Lakin bəzi vətəndaşlar hələ də məsuliyyətsizlik nümayiş etdirərək tibbi maska taxmadan avtobusa daxil olurlar. Nəticədə isə virusa yoluxanların sayı sürətlə artır. Virusa yoluxmanın qarşısını almaq üçün maska istifadə etməyən şəxs ictimai nəqliyyata daxil olarsa, həmin avtobus hərəkət etməyəcək.
Bakı Nəqliyyat Agentliyinin Mətbuat xidmətinin rəhbəri Mais Ağayev bildirib ki, bu cür məsuliyyətsiz davranışlara yol verən sərnişin özü ilə yanaşı, digərlərinin də sağlamlığını risqə atır: "Bu hal sərnişindaşımaların təşkili baxımından da olduqca təhlükəlidir və sürücülər arasında yoluxma ehtimalını ciddi şəkildə artırır. Virusa yoluxan bir nəfər sürücü istehsalat bazasında yüzlərlə əməkdaşı yoluxdura bilər ki, bu isə eyni anda bir və ya bir neçə marşrut xəttinin fəaliyyətinin dayanmasını qaçılmaz edir. Bu cür xoşagəlməz halların yolverilməzliyini və tibbi maskadan istifadənin mütləq olduğunu nəzərə alaraq, marşrut avtobuslarında bəzi qaydaların tətbiqinə qərar verilib. Bildiririk ki, sərnişinlərin maska taxmadan avtobusa minməsi qadağandır. İyunun 25-dən maskadan istifadə etməyən sərnişin olacağı halda avtobus dayanacaq məntəqəsini tərk etməyəcək. Yalnız sərnişin maska taxdıqdan sonra avtobus hərəkət edəcək. Artıq avtobuslara maskasız girişin qadağan olunduğunu bildirən məlumatlar da yerləşdirilib”.
İnfeksionist Azər Nağıyev bildirdi ki, qapalı məkanlarda maska taxmaq zəruridir: “Xəstəliyi məhdudlaşdırmaq üçün, ilk növbədə, sıravi vətəndaşlar bəsit qaydalara riayət etməlidirlər. Bunlardan birincisi maska taxmaqdır. Maska infeksiyadan ikili qoruma deməkdir. İnsan bununla özündə olan infeksiyanın hava yolu ilə damlalar şəklində digərlərinə keçməsinin qarşısını alır. Digər tərəfdən, infeksiyanın giriş qapısı olan yuxarı tənəffüs yollarını virusdan qorumaqla hər hansı məsuliyyətsiz insandan ona virus keçməsinə mane olur. İkinci məsələ sosial məsafənin gözlənilməsidir. Virusun sıçrama məsafəsi təxminən 1,5 metrə qədər hesab olunur. Odur ki, insanlar əsasən də qapalı məkanlarda aralarında 1,5-2 metr məsafə saxlamalıdırlar. Üçüncü ən sadə gigiyenik qayda normal həyat qaydasıdır. Bura əllərin vaxtaşırı adi sabunla yuyulması və dezinfeksiyaedici məhlullardan istifadə aiddir. Bu bəsit qaydalara riayət etmək lazımdır”.
Həmsöhbətimiz onu da əlavə etdi ki, vətəndaşlar məsuliyyətli olarsa, virusun yayılması azala bilər: “Artıq dövlət bütün tədbirləri görüb. İndi isə məsuliyyət vətəndaşların üzərinə düşür. Təkcə dövlət tərəfindən tədbirlər görülməsi ilə problem həll olunmur. Gərək vətəndaş da məsuliyyətini anlaya və ən ibtidai qaydalara riayət edə. Biz həyat tərzimizdə kiçik də olsa dəyişiklik etməliyik. Düşünürəm ki, bu qaydaları uzun müddət özümüzə təlqin etməli və bu qaydalarla yaşamağı ən azı bir neçə ay və ya illik normal həyat tərzi kimi qəbul etməliyik. Onu da bildirim ki, artıq Bakı Nəqliyyat Agentliyi (BNA) sərt qayda tətbiq edib. Belə ki, avtobuslara maska taxmadan girməyə icazə verilməyəcək, maskadan istifadə etməyən sərnişin olacağı halda avtobus yerindən tərpənməyəcək. Bu qərarın verilməsini alqışlayıram. Maska ilə ağız və burunu qapamadan avtobuslara girişə icazə verilməməsi çox gözəl tədbirdir. Belə də olmalıdır. Hesab edirəm ki, bütün qapalı məkanlarda bu qayda tətbiq edilsə daha gözəl olar”.
Xatırladaq ki, BNA tərəfindən marşrut avtobuslarında maskadan istifadə ilə bağlı yeni qaydaların tətbiqinə qərar verilib. İyunun 25-dən etibarən maskadan istifadə etməyən sərnişin olacağı halda avtobus dayanacaq məntəqəsini tərk etməyəcək. Bu qaydanın tətbiq edilməsində məqsəd virusun yayılma tempinin aşağı salınmasıdır.
Günel CƏLİLOVA
