Azərbaycanda koronavirus xəstələrinin sayı artır. Bu səbəbdən xəstəliyi yüngül formada keçirən xəstələrə TƏBİB evdə özünütəcrid şəraitində müalicə almağa icazə verir. Bu xəstəliyə yeni yoluxmuş və onu yüngül formada keçirənlər üçün bəzi preparatların qəbul edilməsi tövsiyə edilir.
Koronavirusdan əziyyət çəkənlərin müalicəsi üçün lazım olan dərmanlar arbidol, vitamin C və maqnezium əleyhinə olan preparatlardır. Özünü narahat hiss edən insanlar evdə müalicəyə üstünlük verirlər. Ancaq son günlər apteklərdə adıçəkilən dərmanlar tapılmır. Vətəndaşlar bildirirlər ki, əksər aptekdə arbidol və vitamin C adlı dərman yoxdur. Halbuki, TƏBİB bütün apteklərə göstəriş vermişdi ki, adıçəkilən dərmanlar yetərincə olsun.
Qeyd edək ki, Tibbi Ərazi Bölmələrinin İdarəetmə Birliyinin (TƏBİB) məlumatında deyilir ki, COVID-19 xəstəliyini yüngül simptomla və ya simptomsuz keçirən şəxslərin ev şəraitində təcridi və müalicəsi müzakirə olunur. Hazırda belə xəstələrin müşahidəsi və müalicəsi xüsusi rejimli tibb müəssisələrində aparılır. TƏBİB-in məlumatına əsasən, hava-damcı yolu ilə yoluxmuş xəstələrlə təmasda olan şəxslərin karantinə götürülməsində yeni qaydalar müəyyən edilib. Mayın 1-də təsdiqlənmiş "Azərbaycan Respublikasının ərazisində hava-damcı yolu ilə keçən yoluxucu xəstəliklər zamanı karantin nəzarətinə götürülmə Qaydaları" qərarına dəyişiklik yeni növ virusa "yoluxma sürətilə" bağlı müzakirəyə çıxarılıb. "Virusa yoluxma sürətinin artmasını nəzərə alaraq, bu dəyişikliyin COVID-19 xəstələrinin müalicəsinə tətbiqi Nazilər Kabineti yanında Operativ Qərargah tərəfindən müzakirə olunur. Son dəyişikliyə görə, xəstəliyi yüngül formada keçirən şəxslər, onların xüsusi tibb müəssisələrindən kənarda müalicə olunması mümkün hesab edildikdə, "müəyyən olunmuş qaydalara" riayət etməklə, yaşadıqları və ya olduqları yerdə təcrid oluna bilər və onların üzərində tibbi müşahidə həyata keçirilir.
Eyyub Hüseynov: “Ölkədə dərman qıtlığının yaranmasının başqa səbəbləri də ola bilər”
Azad İstehlakçılar Birliyinin (AİB) sədri Eyyub Hüseynov bildirdi ki, istehsalçılar və yaxud idxalçılar süni olaraq defisit yarada bilərlər. Yəni dərman idxalçıları öz aralarında müəyyən razılığıa gəlirlər, qiyməti artırırlar: “Şübhəsiz ki, məqsədləri məhsulu, dərmanı bazardan azaldıb qiyməti artırmaq ola bilər. Ola da bilər ki, doğrudan da dünya bazarında bu dərmanlar azalıb, onları idxal etməkdə çətinlik var".
Həmsöhbətimiz onu da əlavə etdi ki, ölkədə dərman qıtlığının yaranmasının başqa səbəbləri də ola bilər.
Mətanət Cəfərova: “Bunun əsas səbəbi insanların ajiotaj içində...”
Həkim Mətanət Cəfərova bildirdi ki, qeyd olunan dərmanlar daha çox parasetamoldur, vitamin D, vitamin C və eyni zamanda, virus əleyhinə təsir göstərən müəyyən qrup preparatlardır: “Bu və digər dərmanlara tələbatın artması, insanların daha çox bu dərmanlardan alması həmin preparatların tükənməsinə səbəb olub. Bəli, hazırda əksər aptekdə bu dərmanların qıtlığı müşahidə olunur. Hətta tapmaq belə mümkün deyil. Bunun əsas səbəbi insanların ajiotaj içində apteklərdən lazım oldu-olmadı, yaş fərqinə baxmadan, böyükdən-kiçiyə, yaşlıdan-uşağa müəyyən qrup dərmanları almasıdır".
Adil Qeybulla: “...mütləq belə xəstələrin müalicəsi həkim tərəfindən aparılmalıdır”
Professor, tibbi ekspert Adil Qeybulla qeyd etdi ki, koronavirusa yoluxmuş, yüngül simptomlu və simptomsuz xəstələrin evdə özbaşına müalicəsi düzgün deyil. Professorun sözlərinə görə, belə xəstələr evdə müalicə alsalar da, mütləq həkim nəzarətində olmalı, həkimin resepti əsasında dərman almalıdırlar: "Hər xəstəyə fərdi yanaşılmalıdır. “Bir koronavirus xəstəsi bu dərmanı qəbul edirsə, mən də həmin dərmandan alıb qəbul edim" yanaşması əks təsir göstərə bilər. Mütləq belə xəstələrin müalicəsi həkim tərəfindən aparılmalıdır. Dərman qəbulunda doza həddi var. Hərarət üçün istifadə edilən dərmanları da dozadan artıq qəbul etmək olmaz! Ona görə də mən bir həkim kimi koronavirus xəstələrinin evdə nəzarətsiz müalicəsini düzgün hesab etmirəm".
Günel CƏLİLOVA
