Ölkə başşısı İlham Əliyev və Birinci vitse-prezident Mehriban xanım Əliyevanın tapşırıq və göstərişlərinə uyğun olaraq, Bakı Şəhər İcra Hakimiyyəti tərəfindən xüsusi karantin rejimi dövründə paytaxtda koronavirus (COVID-19) pandemiyasına qarşı mübarizənin daha da genişləndirilməsi məqsədilə Bakı şəhərinin bütün rayonlarında xüsusi gücləndirilmiş kompleks tədbirlər geniş şəkildə davam etdirilir. Nazirlər Kabinetinin müvafiq qərarına əsasən, ölkə ərazisində dezinfeksiya işləri aparılmalıdır.
Ancaq bəzi ərazilərdə dezinfeksiya işlərinin həyata keçirilməməsi ilə bağlı şikayətlər var. Belə ki, paytaxtın Xətai rayonu, Neapol küçəsində yerləşən 24, 26 a və 28 saylı yaşayış binalarında, nədənsə, dezinfeksiya işləri aparılmır.
26 a saylı binanın sakinləri bildirirlər ki, karantin rejimi tətbiq edildiyindən bəri yaşadıqları binada dezinfeksiya işləri aparılmır: “COVID-19 pandemiyası dünyanı cənginə alıb. Paytaxtda əhali arasında geniş yayılmağa başlayıb. Karantin rejimi tətbiq edilib, amma yaşadığımız binanın girəcəklərində, zirzəmisində və eləcə də sakinlərin sıx toplaşdığı ərazilərdə dezinfeksiya işləri aparılmayıb. Karantin rejiminə qədər hər gün sakinlər çıxıb həyətdə oturur, uşaqlar isə oynayırdılar. Həyətdəki oturacaqları, söhbətgahları, uşaq oyuncaqlarını gəlib dezinfeksiya etmirlər. Aidiyyəti qurumlar mərkəzi küçələri dezinfeksiya edirlər. Hər gün bloklarda onlarca insan mərtəbələrə qalxıb-düşür, nədənsə, gəlib girəcəkləri, binaların mərtəbələrini, pilləkənləri, liftləri dezinfeksiya etmirlər. Yeri gəlmişkən, elə xəstəliyin yayılma risqinin də artmasının bir səbəbi yaşayış binalarında və zibil qutuları qoyulan ərazilərdə dezinfeksiya işlərinin aparılmamasıdır”.
Xətai Rayon Mənzil-Kommunal Təsərrüfatı Birliyi - Ramiz Əliyev: “Komendant tərəfindən həmin binanın liftində gündə 2-3 dəfə, girəcəklər və mərtəbələrində isə hər gün dezinfeksiya işləri aparılmalıdır”
Məsələ ilə bağlı Xətai Rayon Mənzil-Kommunal Təsərrüfatı Birliyi ilə əlaqə saxladıq. Birliyin şöbə müdiri Ramiz Əliyev bildirdi ki, 26 a saylı bina Rayon MKTB-nin tabeliyində deyil: “Həmin bina təzə tikilib. Binanın özünün komendantı var. Komendant tərəfindən həmin binanın liftində gündə 2-3 dəfə, girəcəklər və mərtəbələrində isə hər gün dezinfeksiya işləri aparılmalıdır. Bu haqda 26 a saylı binanın komendantı Mahir müəllimə məlumat veriləcək”.
Rasif Bağırov: “Evlər, evlərin arasındakı çirkli sahələr dezinfeksiya olunmalıdır”
Həkim-ekspert Rasif Bağırov bildirdi ki, ev və evlərin arasındakı sahələrin dezinfeksiya edilməsi daha məqsədəuyğundur: "Küçələrin, maşın yollarının dezinfeksiya olunmasının heç bir əhəmiyyəti yoxdur. Evlər, evlərin arasındakı çirkli sahələr dezinfeksiya olunmalıdır. Yolun, küçənin ortasını dezinfeksiya etmək kimə lazımdır? Maşının təkərinin altında virus olur ki, dezinfeksiya edirlər? Ona görə də olunmalıdırsa, insanların daha çox olduğu yerlər dezinfeksiya edilməlidir. Həmçinin, ev heyvanlarının olduğu yerlər dezinfeksiya olunmalıdır. Çünki həmin yerdə digər virusların da inkişafına şərait yaranır. Xarici ölkələrin praktikasında da belədir ki, küçələri deyil, evləri, evlərin arasındakı sahələri dezinfeksiya edirlər".
Günel CƏLİLOVA
