Son günlər sosial mediada, mətbuatdakı müzakirə mövzularından ən birincisi koronavirusa yoluxmanın artması, xüsusilə özəl klinikalarda aparılan kompyuter tomoqrafiyası zamanı pasiyentlərdə “buzlu şüşə” effektinin çox aşkarlanmasıdır.
Tanınmış jurnalist, “Kaspi” qəzetinin baş redaktoru İlham Quliyev də özü və ailəsinin koronavirusa yoluxduğunu bildirərək “Facebook”dakı paylaşımında “buzlu şüşə”dən yazıb: “Koronavirus infeksiyası ilə mübarizə aparan xəstələrin sırasına mən və ailə üzvlərim də qoşuldu. Kompyuter tomoqrafiyası ilə aparılan müayinələr ağciyərlərimin hər iki payında “buzlu şüşə” aşkarladı. Müalicə “Neftçilər” xəstəxanasında davam etdirilir”.
Maraqlıdır, koronavirusun ağırlaşmasının əsas əlaməti kimi təqdim edilən “buzlu şüşə”, əslində, nədir?
Suada Qasımova: “Ağciyərlərin KT görüntüsündə “buzlu şüşə” görünməsi koronavirus diaqnozunda ən vacib və spesifik kriteriyadır”
Mərkəzi Gömrük Hospitalının rəsmi tərəfdaşı “Florence Nightingale” Xəstəxanalar Qrupunun tərkibində fəaliyyət göstərən “Şişli Florence Nightingale” Xəstəxanasında koronaviruslu xəstələri müalicə edən azərbaycanlı həkim Suada Qasımova bildirdi ki, xəstəxanaya bu şikayətlərlə gələn xəstələrdə koronavirusdan şübhələnmək və diaqnostika məqsədilə mütləq PCR testi etmək lazımdır: “PCR testi ilə birlikdə mütləq hər iki ciyərin rentgenoqrafiyası çəkilməlidir. PCR testinin nəticəsi neqativ və yüksək dərəcədə COVID-19 şübhəsi olarsa, xəstənin ağciyərlərinin aşağı dozada KT müayinəsi edilməlidir. Ağciyərlərin KT görüntüsündə “buzlu şüşə” görünməsi koronavirus diaqnozunda ən vacib və spesifik kriteriyadır. Antikor testləri elisa ilə birlikdə olmadığı təqdirdə diaqnostika etibarlı deyil”.
Həmsöhbətimiz onu da əlavə etdi ki, diaqnoz qoyulan xəstələrin xəstəxanada saxlanmasına qərar verərkən istifadə olunan ən mühüm göstərici oksigen saturasiyasıdır: “Saturasiyası normal olan xəstələrdə hər iki ciyərin yarısından çoxunda tutulma varsa, xəstəxanaya yerləşdirilməsi doğru yanaşmadır. Bundan başqa, ümumi vəziyyəti yaxşı olan bəzi qadın xəstələrə həkimin klinik qərarına görə yataq rejimi qərarı verilə bilər”
Adil Qeybulla: “COVID-19 ağciyərlərdə “buzlu şüşə” sindromuna səbəb olur, koronavirusa yoluxan xəstələrin ağciyərləri ömürlük zədələnir”
Professor, həkim-ekspert Adil Qeybulla bildirdi ki, COVID-19 ağciyərlərdə “buzlu şüşə” sindromuna səbəb olur: “Koronavirusa yoluxan xəstələrin ağciyərləri ömürlük zədələnir. Virus keçsə də, ağciyərdəki zədələnmə bərpa olunmur. Aktiv pnevmoniya başlayan şəxslərdə ağciyərin rentgen mənzərəsində “buzlu şüşə” sindromu görünür. Koronavirusa yoluxan xəstənin ağciyəri zədələnibsə, sağaldıqdan sonra orada fibroz inkişaf edir. Fibroz ağciyər çatışmazlığına gətirib çıxarır. Fibroz nə qədər çoxdursa, ağciyər çatışmazlığı da o qədər artır. Bəzən elə hallar olur ki, xəstəyə prosesdən sonra ağciyər köçürülməsinə ehtiyac yaranır. Ağciyər xəstələri koronavirusa yoluxmaqdan və hipoksiyadan ölürlər".
Günel CƏLİLOVA
