Artıq bir müddətdir Azərbaycanda ictimai nəqliyyatda, dövlət xidməti binalarında, bütün iaşə, alış-veriş mərkəzlərində, qapalı məkanlarda tibbi maskadan istifadə etmək məcburidir. Bunun üçün cərimələr də tətbiq edilib. Maska taxmamağa görə fiziki şəxslər 50, vəzifəli şəxslər 100, hüquqi şəxslər isə 200 manat cərimə ödəyəcəklər. Təkrar aşkarlanma olarsa, fiziki şəxslər 100, vəzifəli şəxslər 200, hüquqi şəxslər isə 400 manat ödəyəcəklər.
Lakin yenə də adları sadalanan ərazilərdə bir çox vətəndaşın öz üzərinə düşən sosial məsuliyyəti dərk etməyərək, maska taxmadığının şahidi oluruq. İnsanların təhlükəsizlik tədbirlərinə riayət etməməsi nəticəsində koronavirusa yoluxanların sayı günü-gündən artır. Qeyd edək ki, Azərbaycanda COVID-19-a yoluxanların sayı son bir ay yarım içərisində doqquz dəfə artıb və on mini keçib. Tək iyunun 21-də ölkədə virusa yoluxma üzrə antirekord qeydə alındı. Belə ki, həmin gün ölkədə 491 yeni koronavirus infeksiyasına yoluxma faktı qeydə alınıb, 283 nəfər müalicə olunaraq sağalıb və evə buraxılıb. COVID-19 üçün götürülən analiz nümunələri müsbət çıxmış 6 nəfər vəfat edib.
Məlumat üçün bildirək ki, indiyədək ölkədə, ümumilikdə, 12 729 nəfərin koronavirus infeksiyasına yoluxması faktı müəyyən edilib, onlardan 6 799 nəfər müalicə olunaraq sağalıb, 154 nəfər vəfat edib, 5 776 nəfərin xüsusi rejimli xəstəxanalarda müalicəsi davam etdirilir.
Bəs nə etmək lazımdır ki, vətəndaşlar üzərlərinə düşən məsuliyyəti dərk etsinlər, karantin rejimi qaydalarının onların özlərinin, ətrafdakıların təhlükəsizliyi üçün tətbiq edildiyini düşünərək sosial məsafəni gözləsinlər, tibbi maskadan mütəmadi olaraq istifadə etməyi bacarsınlar?
Cəlal İsayev: “İnsanların səhlənkarlığı nəticəsində bu gün koronavirusdan əziyyət çəkənlərin sayı artır”
Azərbaycanın baş infeksionisti, Nazirlər Kabineti yanında Operativ Qərargahın üzvü Cəlal İsayev “Bakı-Xəbər”ə açıqlamasında qeyd etdi ki, insanların səhlənkarlığı və xaricdə yaşayan azərbaycanlıların bir hissəsinin Vətənə qayıtması koronavirusa yoluxanların sayının artmasına səbəb olub. Hətta ölkədə xüsusi karantin rejimi qaydalarının yumşaldılmasından sonra virusun guya mövcud olmadığına inananlar artmağa başlayıb: “Çünki hələ də xəstəliyin siyasi oyun olduğunu düşünənlər var. Mən onları dar düşüncəli insanlar sayıram. Belə siyasi oyun olmaz. Axı bütün dünyada virus alovlanıb. Yəni inkişaf etmiş bu qədər ölkənin rəhbərləri səhv edirlər?! Hətta deyirlər ki, guya həkimlər ölən şəxsin qohumlarına virusdan vəfat etdiyini yazmaq üçün pul təklif edirlər. Həkimlərin bu qədər çox pulu var? Vicdan bu qədər itirilib?
Hər gün gözümüzün qarşısında çox sayda insanın virusa yoluxduğunu, əziyyət çəkdiyini və dünyasını dəyişdiyini görürük. Əlimizdən gələni edirik ki, insanlar virusa yoluxmasınlar. Axı nə qədər demək olar ki, sosial məsafəni gözləyin, arada 2 metrlik məsafə saxlayın, zərurət olmadığı təqdirdə qapalı məkanlara getməyin, gigiyena qaydalarına əməl edin, yaxud qoruyucu tibbi maskalardan istifadə edin”.
Həmsöhbətimiz onu da əlavə etdi ki, ictimai nəqliyyatda qoruyucu maskalardan istifadənin vacibliyi dəfələrlə qeyd edilib, ancaq buna əməl edən çox az adam var. Pandemiyanın başlanğıcında virusun sürətlə yayılmasının qarşısı alındı. Amma bu gün daxili yoluxmaların sayında kifayət qədər artım var. Hər kəs infeksiyaya qarşı birgə mübarizə aparmalıdır, öz üzərinə düşəni etməlidir.
Rüfət Quliyev: “Vətəndaşlar, birmənalı olaraq, sosial məsafə qaydalarına, tibbi ləvazimatlardan istifadəyə mütləq riayət etməlidirlər”
Millət vəkili Rüfət Quliyev bildirdi ki, dünyada tüğyan edən koronavirus pandemiyası Azərbaycanda da var və bu çağırılmamış qonaq dünyanın əksər nöqtəsini əhatə edib. COVID-19 virusuna qarşı mübarizə məqsədilə ölkə başçısı İlham Əliyev tərəfindən təsirli və davamlı tədbirlər həyata keçirilib: “Bütün bunlara baxmayaraq, Azərbaycan vətəndaşlarının üzərinə çox böyük vəzifələr düşüb. İlkin pandemiya dövrü Azərbaycanda yaşananda hakimiyyət bütün lazım olan tədbirləri həyata keçirib. Karantin qaydaları yumşalmağa başlayandan sonra insanlarda belə bir təəssürat yaranmağa başladı ki, artıq koronavirus keçmişdə qaldı. Bəziləri düşünürlər ki, ümumiyyətlə, belə bir xəstəlik yoxdur. Bu, təəssüfləndirici haldır. Hazırda inkişaf etmiş ölkələrin də durumu iflic vəziyyətdədir. Buna görə Azərbaycan vətəndaşı sosial məsuliyyətini dərk etməlidir.
Söhbət vətəndaşların həyati təhlükəsindən gedir. Bütün bu tədbirlər vətəndaşların sağlam və salamat qalması üçün görülür. Vətəndaşlar maska taxmaqla həm özlərini, həm ailə üzvlərini, həm də qohumlarını qorumuş olurlar. Bir insan özü özünü qorumur, axı o, tək özünə görə deyil, həm də ailə üzvlərinin salamat qalması üçün məsuliyyət daşıyır. Vətəndaşlar, birmənalı olaraq, sosial məsafə qaydalarına, tibbi ləvazimatlardan istifadəyə mütləq riayət etməlidirlər”.
Adil Qeybulla: “Yoluxmaların sayında artımın əsas səbəbi insanların davranışıdır”
Professor, tibbi ekspert Adil Qeybulla bildirdi ki, yoluxmaların sayında artımın əsas səbəbi insanların davranışıdır: “30 kvadratmetrlik bir mağazaya 20 adam girir, satıcı maskasız, camaat maskasız, girişdə dezinfeksiyaedici məhlul yox, paltarlara çox adam əl vurur. Azərbaycanda yoluxanların sayı daha çoxdur və yaxın həftələrdə bu aşkara çıxacaq. İnsanlar öz sağlamlıqlarına biganə yanaşırlar”.
Həmsöhbətimiz hesab edir ki, ictimai nəqliyyatda vətəndaşlara tibbi maskalar pulsuz paylanmalıdır: “Yaxşı olardı ki, ictimai nəqliyyatda, avtobuslarda tibbi maska pulsuz olaraq paylansın. Bir maskanın dəyəri o qədər də böyük deyil. Hesab edirəm ki, təhlükəni azaltmaq üçün, insanları maska taxmağa daha çox cəlb etmək üçün bunu həyata keçirmək mümkündür. Yoxsa, qeyd etdiyim kimi, vəziyyət daha da pisləşəcək”.
Günel CƏLİLOVA
