Yas yerlərində koronavirusa yoluxmaların çoxalması ciddi narahatlıq doğurur. Təəssüflər olsun ki, xəbərdarlıqlara baxmayaraq, vətəndaşlarımız koronavirusla mübarizədə lazımi məsuliyyət nümayiş etdirmirlər.
Nazirlər Kabineti yanında Operativ Qərargahın təşkil etdiyi mətbuat konfransında TƏBİB İdarə Heyətinin sədri Ramin Bayramlı bildirib ki, ən çox yoluxma halları yas mərasimlərində baş verib: “Təəssüf ki, yas yerlərində kütləvi yoluxmalar baş verir. Yas qadağan olunsa da, xüsusən rayonlarda bu qadağalara riayət olunmur. Yoluxma baş verdikdən sonra analizlər aparılır. Analizlər göstərir ki, yoluxmaların əksəriyyəti yas yerlərində baş verir. Xüsusən yaşlı insanların və qadınların yas yerlərində toplaşması yoluxmaya səbəb olub. Vətəndaşları qaydalara riayət etməyə dəvət edirik”.
Qeyd edək ki, karantin dönəmində yas mərasiminin kütləvi təşkili ilə bağlı məhdudiyyətlərin, qadağaların qüvvədə qalması arzuediləndir. Çünki yas mərasimlərində iştirak edən insanlar karantinlə bağlı qadağalara riayət etmək istəmirlər. Bu səbəbdən də karantin qaydalarını pozan mollalarla bağlı ölçü götürüləcək.
Qafqaz Müsəlmanları İdarəsi (QMİ) ölkədə karantin gündəmə gələn ilk günlərdən koronavirusa yoluxma hallarının qarşısının alınması məqsədilə ölkə ərazisindəki bütün məscid və ziyarətgahların fəaliyyətini müvəqqəti dayandıraraq, kütləvi ibadət mərasimlərin keçirilməməsi barədə tapşırıq və tövsiyələrini verib.
Qafqaz Müsəlmanları İdarəsinin yaydığı məlumatda qeyd olunur ki, Nazirlər Kabineti yanında Operativ Qərargahın müəyyən etdiyi qaydalara uyğun olaraq dəfn mərasimləri məhdud sayda, yaxın qohumların iştirakı ilə və sosial məsafəyə riayət edilməklə həyata keçirilməlidir. Qapalı, yaxud açıq məkanlarda on nəfərdən artıq şəxsin iştirakı ilə ehsan verilməsi və yas məclislərinin təşkili və orada din xadimlərimizin iştirakına icazə verilmir: “Bütün din xadimlərinə bununla bağlı tərəfimizdən tapşırıq verilib. Bu qərarların icrasına QMİ nəzarət edir, tapşırığın yerinə yetirilməsinə yerlərdəki qazilərimiz və səlahiyyətli nümayəndələrimiz məsuldurlar və bu barədə QMİ-yə mütəmadi məlumat verirlər. Bu müvəqqəti çətinlik dövründə tövsiyələrimizi nəzərə almayanlar, təəssüf ki, mövcud vəziyyətin məsuliyyətini dərk edə bilməyənlərdir. Qayda və tövsiyələrə əməl etməyən din xadimləri ilə bağlı hal aşkarlanarsa, QMİ tərəfindən müvafiq ölçü götürüləcək”
Ekspertlər də hesab edirlər ki, hazırki dönəmdə kütləvi yas mərasimlərinin keçirilməsi düzgün deyil. Həmin mərasimdə iştirak edən din xadimləri də qanun çərçivəsində cəzalandırılmalıdırlar.
“Yas mərasimlərində iştirak edən mollalar insanlara onların sağlamlığı üçün sosial məsafə saxlanmasının vacibliyi haqqında məlumat verməlidirlər”
İlahiyyatçı Seyid Camal Əzimbəyli bildirdi ki, bir insan başqasını yoluxdura biləcəyi və ya özü yoluxa biləcəyi bir yerə gedirsə, onun orada iştirakı dini baxımdan da haramdır: “Həm dünyasını dəyişən insanın ailəsi, həm də o məclisdə iştirak edən insanlar məsuliyyətli olmalıdırlar. Bu məsələləri insanlara təkcə inzibati yollarla yox, maarifləndirmə yolu ilə çatdırmaq lazımdır. Bu mənada din xadimləri fəal olmalıdırlar. Xüsusilə də dəfn mərasimində iştirak edən din xadimlərinə Qafqaz Müsəlmanları İdarəsi tövsiyə edir ki, bu məsələlərlə bağlı insanlara mövqelərini bildirsinlər, insanları həmin mərasimlərdə iştirak etməkdən çəkindirsinlər”.
Həmsöhbətimiz onu da vurğuladı ki, yas mərasimlərində iştirak edən mollalar insanlara onların sağlamlığı üçün sosial məsafə saxlanmasının vacibliyi haqqında məlumat verməlidirlər: “Bu gün yas mərasimlərində insanların sosial məsafə saxlaması vacibdir. İnsanlar sıx şəkildə oturmamalıdırlar. Əvvəllər insanlar buna əhəmiyyət vermirdilər, çünki virus yox idi. Ancaq indi vəziyyət fərqlidir”.
S.C.Əzimbəyli hesab edir ki, kütləvi yas mərasimlərində iştirak edən din xadimləri cəzalandırılmalıdırlar.
Günel CƏLİLOVA
