Koronavirusa yoluxma və ölüm sayı getdikcə artır. Dünyada COVID-19 infeksiyasına yoluxanların ümumi sayı 8 milyonu ötüb, yarım milyona yaxın insan pandemiyanın qurbanı olub. Son günlər Azərbaycanda da yoluxma sayında artım müşahidə edilir. İndiyədək ölkəmizdə 10 mindən çox yoluxma halı aşkar edilib.
Təəssüf ki, digər ölkələrdə olduğu kimi, Azərbaycanda virusa yoluxan və dünyasını dəyişənlər arasında tanınmış insanlar da var. Onların arasında millət vəkili, siyasətçi, ziyalı, şair, şou-biznes təmsilçisi də var. Koronavirus elə bir xəstəlikdir ki, sosial məsafə saxlamayan hər bir kəsə yoluxur. Qeyd etdiyimiz kimi, yaşından, vəzifəsindən asılı olmayaraq, təhlükəsizlik qaydalarına riayət etməyən hər kəs koronavirusa yoluxa bilər.
Azərbaycanda koronavirusa yoluxmuş tanınmış şəxslərin siyahısını təqdim edirik:
Nicat Əzimli - Mərkəzi Neftçilər Xəstəxanasının həkimi, Bəhram Bağırzadə - Əməkdar artist, Müstəqim Məmmədov - Tərtər Rayon İcra Hakimiyyətinin başçısı, Sahib Alıyev - millət vəkili, Məmməd Məmmədov - Tovuz Rayon İcra Hakimiyyətinin başçısı,Şəhriyar Del Gerani - şair, Barat Bayramov - həkim, Kamal Abdullayev - məşhur uroloq həkim, Yasin Həzirə - aktyor, Şəfəq Əliyeva - Əməkdar artist, Sərvər Əliyev - Əməkdar artist, Nadir Qasımov - Azərbaycanın tanınmış futbol məşqçisi, Aydan Salahova - məşhur rəssam Tahir Salahovun qızı, rəssam-heykəltəraş, Fərəh Əliyeva - Azərbaycan Prezident Administrasiyasının Humanitar siyasət, diaspor, multikulturalizm və dini məsələlər şöbəsinin müdiri, Bayram Əliyev - Pauerliftinq üzrə üçqat Dünya və üçqat Avropa çempionu, Dövlət Gömrük Komitəsinin Bakı Baş Gömrük İdarəsinin mayoru, Şahin Abbasov - ATV-nin Almaniya üzrə müxbiri, Anar Cəfərsoy - idman jurnalisti, Xaliq Rəşidoğlu - jurnalist, Rövşən Tağıyev - Birləşmiş Ukrayna Azərbaycanlıları Konqresinin sədri, Ukrayna Millətlər Assambleyasının rəhbəri, Mirvari Fətəliyeva - Azərbaycanın Fransadakı diaspor rəhbərlərindən biri, Paris-Azərbaycan Evinin rəhbəri.
Koronavirus səbəbindən vəfat edənlər isə…
Fikrət Namazov - tanınmış həkim-onkoloq, Azərbaycan Tibb Universitetinin Onkologiya kafedrasının dosenti, Mehman Hüseynov - tanınmış travmatoloq-həkim, Cəmşid Abbasov - Gəncə Şəhər 3 nömrəli Təcili Tibbi Yardım Stansiyasının həkimi, Zakir Xəlilov - Azərbaycanda Demokratiya və Rifah (ADR) Hərəkatının Nəsimi rayon təşkilatının İdarə Heyətinin üzvü, həkim, Teymur Mustafayev - Xalq artisti, Fərman Bağırov - Tanınmış fotojurnalist, Qəzənfər Əliyev - Samux rayon icra başçısının müavini.
Onu da bildirək ki, bəzi şəxsləri hələ də koronavirusun varlığına şübhə ilə yanaşırlar. Onların verdikləri sual isə “niyə tanınmışlar bu xəstəliyə yoluxmur” idi. Ancaq, göründüyü kimi, COVID-19 infeksiyasına yoluxanlar arasında tanınmış şəxslər də var.
“Nəyə görə bəzilərinin məsuliyyətsizliyi üzündən bu qədər görülən işlər, çəkilən zəhmətlər, əməklər hədər getməlidir?”
Millət vəkili Jalə Əliyeva bildirdi ki, hər gün bu bəlanın, bu təhlükənin aradan qaldırılması istiqamətində növbəti, yeni addımlar atılır: “İndi bu addımların üzərindən nəyə görə bir andaca xətt çəkilməlidir? Nəyə görə bəzilərinin məsuliyyətsizliyi üzündən bu qədər görülən işlər, çəkilən zəhmətlər, əməklər hədər getməlidir?
Heç nəyə fikir vermədən, karantin tələblərinə əməl etmədən belə bir addıma yol vermək gerçəkdən yolverilməz və qəbuledilməzdir. Qayda-qanun hamı üçündür və eynidir. Kimsə özünü əlahiddə apara, hesab edə bilməz. Özünüz də son 3-4 gündə açıqlanan və böyük həyəcan doğuran statistikanı görürsünüz. Yenə də artım, yenə də çoxalan ölüm halları. Tanınmışların, məşhurların, tanıdıqlarımızın koronavirusa yoluxması, bu bəladan əziyyət çəkməsi artıq hamımızı ciddi şəkildə düşündürməlidir. Dəyərli ziyalımız, hamımızın sevimlisi Bəhram Bağırzadə artıq neçə gündür ağır vəziyyətdədir, koronavirus bəlasından əziyyət çəkir, onun sağlamlıq durumu birbaşa ölkə Prezidenti cənab İlham Əliyevin və Birinci vitse-prezident Mehriban xanım Əliyevanın şəxsi nəzarətindədir.
Bunun özü məsuliyyətsizlik, laqeydlik, biganəlik göstərən bəzi vətəndaşlarımza nəsə demirmi? Onlar məsələnin, bəlanın ciddiyyətini anlamırlarmı? Niyə özlərinin, başqalarının həyatını “sevə-sevə” risqə atırlar? Tibbi maskalardan və əlcəklərdən istifadə etmək, sosial məsafəni gözləmək, karantin şərtlərinə və tələblərinə əməl etmək bu qədərmi çətindir?”.
Günel CƏLİLOVA
