Bu gün respublika ərazisində koronavirusun daha sürətlə yayılması baxımından risqli yerlərdən biri ictimai nəqliyyatdır, burada xüsusən də marşrut avtobuslarındakı sıxlıq əsas rollardan birini oynayır.
Bilirsiniz ki, xəttə buraxılan avtobusların sayının yetərli olmaması nəticəsində sıxlıq yaranır, bu da sosial məsafə saxlamaq məsələsini arxa plana keçirir.
Virusa yoluxmanın azalması üçün xəttə buraxılan avtobusların sayının artırılması təklif olunur.
Nəqliyyat üzrə tanınmış mütəxəssis Azər Allahverənov baki-xeber.com-a bildirdi ki, xəttə buraxılan avtobusların sayının artırılması təklifi təqdirəlayiqdir. “Xəttə buraxılan avtobusların sayının artırılması ilə bağlı təklif təqdirəlayiqdir. Ən azından ona görə ki, müxtəlif vaxt, zaman kəsiyində ictimai nəqliyyatdan, avtobusdan istifadə edən insanların sayında müəyyən artımlar olur. Xüsusən də biz bunu pik saatlarında daha çox müşahidə edirik. Səhər və axşam saatlarında xəttə daha çox avtobus buraxılması, intervalların azaldılması, təbii ki, avtobusdan istifadə edən sərnişinlərin bölüşdürülməsi baxımından olduqca vacibdir. Digər tərəfdən, təkcə avtobus sayının artırılması ilə məsələni həll etmək düzgün olmaz. Çünki biz bilirik ki, pik saatlarda avtobuslardan istifadə edən insanların sayının kəskin artması adi vaxtlarda belə həmin avtobuslarda sərnişin sıxlığının yaşanmasına gətirib çıxarırdı. Düzdür, bu gün təhsil müəssisələri işləmir, bəzi iş sahələri fəaliyyət göstərmirlər. Xüsusən də qarşıdan gələn 21 iyundan 5 iyul tarixinədək müəyyən məhdudiyyətlərin tətbiq edilməsi və digər məsələlər, təbii ki, ictimai nəqliyyatdan istifadə edənlərin sayında xeyli azalmaya gətirib çıxara bilər. Amma təcrübə də göstərir ki, intervalın azaldılması və avtobusların sayının artırılması ilə yanaşı, digər işlər də görülməlidir. Məsələn, iş qrafiklərinin dəyişdirilməsi kimi. Normalda bizdə iş səhər saat 9-dan 6-ya qədərdir. Bu baxımdan, müxtəlif iş yerlərinə, qurum və müəssisələrə tövsiyə edilir ki, iş qrafikini dəyişsinlər. Bilmirəm, müəssisələr nə dərəcədə buna gedirlər? Məlumatıma görə, ciddi surətdə hansısa bir müəssisə iş qrafikində hər hansı bir dəyişikliklə bağlı qərar qəbul etməyib. Amma bu onlara tövsiyə olunur. Bu da pik saatlarında daha az insanın ictimai nəqliyyatdan, avtobuslardan istifadəsinə gətirib çıxaran bir haldır. Sözügedən məsələ kompleks şəkildə öz həllini tapmalıdır. Fikrimcə, burada elə etmək lazımdır ki, pik saatlarında daha çox insan avtobusdan istifadə etməsin. İctimai nəqliyyatda, avtobuslarda sosial məsafənin gözlənilməsi, eləcə də maskalardan və başqa vasitələrdən istifadə edilməsi də öz həllini tamamilə tapmalıdır. Koronavirus pandemiyası ilə bağlı ilk siqnallar başlayanda biz bəzi avtobuslarda artıq qoruyucu məhlulların yerləşdirilməsi üçün salonda xüsusi qabların quraşdırılmasının şahidi olduq. Amma mən fikir verirəm ki, bu gün ictimai nəqliyyata daxil olan sərnişinlərin heç biri o məhluldan istifadə etmir. Necə ola bilər ki, insanlar bundan istifadə etmirlər?”
Bunun da bir neçə səbəbinin olduğunu deyən A.Allahverənovun sözlərinə görə, bəzi avtobuslarda, ümumiyyətlə, bu məhlul yoxdur, bir qismində qab varsa belə, içi boş olur. O hesab edir ki, avtobus xəttinin başlanğıcında və sonunda avtobusa baxış keçirilməli və boşalan qablara məhlul doldurulmalıdır. “Burada hər tərəfin üzərinə bir məsuliyyət düşür. Ona görə də təkcə avtobus sayını artırmaqla və xəttə buraxmaqla problem tam olaraq öz həllini tapmır. Bu istiqamətlərdə işlər görülməlidir. Potensial məsələsinə gəlincə, bu gün Bakı şəhərində avtobus qıtlığı var. Yəni, aşağı-yuxarı, bu gün 2200 avtobus şərnişinlərə xidmət göstərir. Əlavə olaraq 300-400 avtobus da xəttə buraxılarsa, bu da 2500-2600 olsun. Onsuz da səhər əhali tam gücü ilə hərəkət etsə, təhsil müəssisələri də açılsa, 2600, hətta 2800 avtobus sayı belə ictimai nəqliyyata olan ehtiyacı ödəməyəcək. Bu baxımdan, yenidən istifadəyə verilən metropoliten bizim avtobus seqmentində olan yüklənmənin qarşısını müəyyən dərəcədə alır. Amma yenə də ümid edək ki, xəttə daha çox avtobus buraxılması ilə yanaşı, digər istiqamətlərdə də işlərin yerinə yetirilməsi ictimai nəqliyyatdan istifadə edən insanların pik saatlarda problemlər yaşamaması üçün müsbət nəticələr verə bilər” - deyə A.Allahverənov bildirdi.
Günel CƏLİLOVA
