Məlum olduğu kimi, Nazirlər Kabinetinin qərarı ilə təsdiq edilmiş koronavirusun (COVID-19) profilaktikasına dair metodiki göstərişlərin icrasına nəzarət məqsədilə Azərbaycan Respublikasının Qida Təhlükəsizliyi Agentliyinin (AQTA) əməkdaşları tərəfindən 18 iyun 2020-ci il tarixində Bakıda, eləcə də regionlarda fəaliyyət göstərən 201 ictimai iaşə obyekti, 212 ərzaq satışı mağazası olmaqla, ümumilikdə, 413 müəssisədə reyd keçirilib.
AQTA-dan mətbuata verilən məlumata görə, sahibkarlıq subyektlərinə qida təhlükəsizliyi sahəsində qanunvericiliyin tələbləri izah edilib, icrası məcburi göstərişlər və maarifləndirici tövsiyələr verilib. Reyd keçirilən obyektlərdən 265-də Nazirlər Kabinetinin qərarı ilə təsdiq edilmiş metodiki göstərişlərin tələblərindən irəli gələn bir sıra qaydalara əməl olunmaması və kobud şəkildə pozulması faktları aşkarlanıb. Aşkarlanmış faktlarla bağlı həmin müəssisələr barədə qanunvericiliyin tələbləri çərçivəsində inzibati tədbirlər görülüb. Sözügedən müəssisələr arasında daha çox uyğunsuzluqlar aşkar edilən ərzaq mağazaları -
Nərimanov rayonunda “Lizzetta” restoranı və “Dəniz” market, Binəqədi rayonunda “Orxan” və “Unimart” marketlər, Gəncə şəhərində “Xanımın dükanı”, “Asim” market, “Yeni market”, Quliyev Əli Sovet oğluna məxsus market, Masallı rayonunda “Sevimli” və “Buta” market, Salyan rayonunda “Al market”, Hacıyeva Laləzar Məhəmmədəli qızına məxsus marketlər, Neftçala rayonunda Mayılzadə Nurlan Mehman oğlu, Qəfərov Şirinbala Eynulla oğlu, Ələkbərov Cəmil Əsgər oğlu, Həsənov Ziyafət Habil oğlu və Nəzirov Əli Əziz oğluna məxsus ərzaq mağazaları, Göyçay rayonunda “Oskar” market, Novruzov Samir Çingiz oğluna məxsus ərzaq mağazası və Baxışov Xəyal Əlicabbar oğluna məxsus ət satışı mağazası, Qəbələ rayonu, Zarağan kəndində Xancanov Rəsul Eyvaz oğluna məxsus market, Balakən rayonunda Sultanova Aygün Kamil qızına məxsus çörək istehsalı və satışı müəssisəsi, Quba rayonunda “Quba”, “Ekonom” marketləri və Mirzəxanov İftixar Yaşar oğluna məxsus marketdir.
Qeyd edək ki, AQTA Bakıda, eləcə də regionlarda fəaliyyət göstərən ictimai iaşə obyektləri və ərzaq mağazalarında yoxlama-nəzarət tədbirlərini bundan sonra da davam etdirəcək və Nazirlər Kabinetinin qərarı ilə təsdiq edilmiş metodiki göstərişlərə əməl etməyən sahibkarlıq subyektləri barədə ən sərt tədbirlər görüləcək.
“Onlara cərimələr tətbiq ediləcək”
Azad İstehlakçılar Birliyinin rəhbəri Eyyub Hüseynov baki-xeber.com-a bildirdi ki, ölkənin əksər iri və kiçik marketlərində, ərzaq satışı mağazalarında, ət kəsimi dükanlarında karantin qaydaları kobud şəkildə pozulur. E.Hüseynovun sözlərinə görə, pandemiya dövrünün tələbləri iriliyindən və kiçikliyindən asılı olmayaraq, hər bir ərzaq satışı ilə məşğul olan mağazada gözlənilməlidir. Onun qeyd etdiyinə görə, bir sıra bu kimi obyektlərdə satıcılar maska, əlcək və digər qoruyucu vasitələrdən istifadə etmirlər, bu da epidemiyanın sürətlənməsinə təkan verir. Mağazalarda karantin qaydalarının pozulmasına hər hansı bir hüquqi qiymət verilməsinə gəlincə, E.Hüseynovun sözlərinə görə, bu mağazaların rəhbərlərinə yalnız maliyyə sanksiyasi tətbiq etmək mümkündür, həmin cəriməni isə hüquq-mühafizə orqanları edə bilər. “Karantin qaydalarına əməl etməyən hüquqi və fiziki şəxslər buna görə cərimə ödəyəcəklər. Bu cərimələnmə prosesi də hüquq-mühafizə orqanlarının iştirakı ilə həyata keçirilə bilər. Yəni onları polis cərimələyə bilər. Bir sıra marketlərdə satıcılar maska, əlcək və digər qoruyucu vasitələr taxmadan xidmət göstərirlər, həmin marketlər cərimələnəcək, cərimələnməlidir də. Deyim ki, Azad İstehlakçılar Birliyi bu yaxınlarda Qida Təhlükəsizliyi Agentliyinin qadağan etdiyi qənd növlərinin marketdə satılmasını aşkarladı. Onlar qeyd etdilər ki, biz o məhsulları qadağan etmişik. Təəssüf ki, AQTA-nın qadağan etdiyi bəzi ərzaq məhsulları, o cümlədən də tərkibində çoxlu kimyəvi maddə olan qəndlər yenə də satılır. Hər bir marketə tövsiyə edərdim ki, istehlakçıların təhlükəsizliyini qorusun və virusun yayılmasında iştirak etməsin” - deyə E.Hüseynov qeyd etdi.
Günel CƏLİLOVA
