Məlum olduğu kimi, koronavirus pandemiyası bütün dünyanı cənginə alıb. Əksər dünya ölkəsində virusa yoluxanların sayında artım müşahidə edilir.
Azərbaycanda da son günlər virusa yoluxanların sayında artım tendensiyası müşahidə edilir. İndiyədək ölkədə, ümumilikdə, 11 767 nəfərin koronavirus infeksiyasına yoluxması faktı müəyyən edilib, onlardan 6 325 nəfər müalicə olunaraq sağalıb, 143 nəfər vəfat edib, 5 299 nəfərin xüsusi rejimli xəstəxanalarda müalicəsi davam etdirilir. İyunun 20-də 6 976 koronavirus testi aparılıb. Ötən müddət ərzində yeni yoluxma hallarının müəyyənləşdirilməsi ilə əlaqədar 410 475 test aparılıb.
Ancaq bir sıra ölkələrlə müqayisədə Azərbaycan yaxşı vəziyyətdədir. Çünki hansı ölkədə vəziyyətin necə olması ancaq müqayisə yolu ilə müəyyənləşdirilə bilər. Məsələ ondadır ki, Azərbaycanla əhalisi təxminən eyni olan ölkələrdə virusa yoluxanların, infeksiyadan ölənlərin sayı qat-qat çoxdur. Məsələn, Çexiyada xəstələrin sayı 12 min nəfəri ötüb. Azərbaycanla müqayisədə virusa yoluxanların sayında böyük fərq olmasa da, ölənlərin arasında fərq böyükdür. Azərbaycanda virusdan ölənlərin sayı 143 nəfər olduğu halda, Çexiyada ölənlərin sayı 365 nəfərdir. Bu o deməkdir ki, Çexiyada COVID-19-dan ölənlərin sayı Azərbaycanla müqayisədə 2 dəfədən çoxdur. Ölənlərin sayının artmasına rəğmən, indiyədək bu ölkədə 514 min nəfər testdən keçib.
Əhalisi Azərbaycanla eyni olan Avstriyada vəziyyət daha acınacaqlıdır. Belə ki, Avstriyada xəstələrin sayı 17 min 271 nəfərdir. Ölənlərin sayı isə ən son məlumata görə, 688 nəfərə çatıb. İndiyə qədər ölkədə 552 min test keçirilib.
Ermənistan əhalisinin sayı Azərbaycandan 3 dəfədən çox azdır, amma bu ölkədə virusa yoluxanların sayı əhalinin ümumi sayına baxanda çoxdur. Ermənistanda xəstələrin sayı 19157, ölənlərin sayı isə 319 nəfərdir. Ölkədə indiyə qədər cəmi 90 min test keçirilib. Portuqaliyanın əhalisi Azərbaycandan təxminən 1 milyon nəfər çoxdur. Ancaq bu günə qədər 1492 nəfər koronavirusdan vəfat edib.
Sadalanan rəqəmlər ən yaxşı vəziyyətin Azərbaycanda olduğunu deməyə əsas verir. Azərbaycanda koronavirusla bağlı testlərin də sayı xeyli artıb. Məsələn, təkcə mart ayında 2000 nəfərədək vətəndaşda test aparılıbsa, yeni yoluxma hallarının müəyyənləşdirilməsi ilə əlaqədar artıq 410 475 test aparılıb. Bu kifayət qədər böyük rəqəmdir.
Azərbaycanda virusa yoluxanların sayının artması karantin tədbirlərinin yumşaldılmasından sonra əhalinin məsuliyyətsiz davranışı ilə əlaqədardır. Problem ondadır ki, əhalinin bir çoxu qaydalara riayət etməkdə məsuliyyətsiz davrandı, pandemiyaya ciddi yanaşmadı, bununla bağlı gigiyenik qaydalara əməl etmədi. Nəticədə virusa yoluxma sayı gündəlik olaraq 300 nəfəri ötdü. Artıq iki gündür sutka ərzində virusa yoluxanların sayı 400 nəfəri keçir. Yumşalmadan sonrakı 20 gün ərzində vətəndaşlar hamılıqla məsuliyyətli olsaydılar, o zaman virusa yoluxanların və bundan ölənlərin sayı xeyli az olacaqdı. Ona görə də karantin qaydalarının yenidən sərtləşdirilməsi doğru qərardır.
Vidadi ORDAHALLI
