Dünya üzrə indiyədək yeni növ koronavirus aşkarlanan insanların sayı 8 milyon 420 minə çatır. Pandemiyadan həyatını itirənlərin sayı isə 451 700-ü ötüb. Ən ağır vəziyyət yenə Amerika qitəsində müşahidə olunur. Bununla yanaşı, bir çox ölkədə virusa yeni yoluxmaların artması narahatlıq doğurmağa başlayıb. Artıq bəzi yerlərdə yenidən məhdudiyyətlərin tətbiq edilməsinə qərar verilib.
Belə ki, Liviya hökuməti koronavirusla mübarizə çərçivəsində yeni karantin qaydaları ilə bağlı yazılı açıqlama yayıb. Ölkədə həftənin cümə və şənbə günlərində komendant saatının tətbiq olunmasına qərar verilib. Bu hal təhlükəli virus tam bitənədək hər həftə davam edəcək. Digər günlər isə qadağaların axşam saat 20:00-dan səhər 6:00-a qədər tətbiq olunacağı açıqlanıb.
Almaniyada da koronavirusa yoluxanların sayında kəskin artım qeydə alınıb. Ölkədə əvvəlki gündə 338 nəfərin COVID-19 testi pozitiv çıxmışdısa, bir gün sonra bu rəqəm 645-ə yüksəlib. Bu arada, Almaniyada bütün böyük tədbirlərin oktyabr ayının sonuna qədər ləğvinə qərar verilib. Həmçinin, noyabr ayında ölkədə ənənəvi karnavallar da keçirilməyə bilər. Bu barədə Bavariya Federal Torpağının Baş naziri Markus Zöder kansler Angela Merkelin Almaniyanın 15 federal əyalət rəhbərləri ilə görüşündən sonra keçirilən brifinqdə deyib.
Yunanıstanda da koronavirusa yoluxma halları kəskin artıb. Ölkədə bir gündə 55 yeni yoluxma qeydə alınıb ki, bu da əvvəlki günlə müqayisədə 41 fakt çoxdur. Ölkənin şimalında yerləşən Rodope bölgəsində təhlükənin artması ilə əlaqədar yaşayış məntəqələrinin birində karantin və komendant saatı tətbiq olunub. Məhdudiyyətlər ölkənin şimalındakı Xanti bölgəsini də əhatə edir. Həmçinin, Yunanıstanın şərqində yerləşən Exinos qəsəbəsi COVID-19-la mübarizə tədbirləri çərçivəsində 7 gün ərzində tamamilə təcrid olunacaq. Buna iyunun 11-dən bəri qəsəbədə aşkar olunan 73 yeni yoluxma faktının qeydə alınması və son 3 gündə 4 nəfərin koronavirusdan ölməsi səbəb olub.
Ölkəmizdə də koronavirusa yoluxanların sayının artması nəticəsində karantin qaydaları yenidən sərtləşdirildi. Belə ki, iyunun 21-dən iyulun 5-dək Bakı, Sumqayıt, Gəncə, Yevlax, Cəlilabad, Lənkəran və Masallıda xüsusi məhdudiyyətlər tətbiq olunacaq. Nazirlər Kabineti yanında Operativ Qərargahın iyunun 18-də keçirilən iclasında qeyd edilib ki, bu yerlərdə vətəndaşlar SMS icazə ilə evdən çıxa biləcəklər. Dövlət və özəl təşkilatlarda işə çıxma ilə bağlı məhdudiyyətlər olacaq. Ticarət obyektləri bağlanacaq. Bərbərxana və gözəllik salonları, muzey və sərgi salonları bağlanır. Açıq havada idman oyunları qadağan edilir.bebelə ki,
“Son dövrlər vətəndaşların əksəriyyəti karantin qaydalarına əməl etmədiyinə görə yoluxanlarla sağalanlar arasında fərq artıb”
Psixoloq Könül İsmayılova bildirdi ki, karantin rejiminin sərtləşdirilməsi Azərbaycan vətəndaşının sağlamlığının və təhlükəsizliyinin təmin edilməsi məqsədi daşıyır: “Son günlərdə ölkədə koronavirus epidemiyasına yoluxma hallarının dinamikasına nəzər saldıqda xoşagəlməz bir mənzərə ilə rastlaşırıq. “Bu da ondan ibarətdir ki, infeksiyaya yoluxanlarla sağalanların dinamikası arasında ciddi fərq yaranmaqdadır. Baxmayaraq ki, pandemiya başladığı ilk zamanlarda cənab Prezidentin həyata keçirdiyi zəruri və təxirəsalınmaz tədbirlər nəticəsində həm yoluxma halları nəzarət altına alındı, həm də əhalinin sosial təminatı istiqamətində ciddi uğurlu addımlar atıldı. Görülən işlər sayəsində virusa yoluxanların sayı azaldı. Elə buna görə də karantin qaydaları yumşaldı. Təəssüflər olsun ki, bəzi vətəndaşlarımız karantin rejiminin yumşaldılması zamanı laqeydlik və məsuliyyətsizlik nümayiş etdirərək, qaydaları pozaraq, ona riayət etmədilər. Bundan sonra vəziyyət yenidən mənfiyə doğru getməyə başladı. Vətəndaşdan fərqli olaraq, dövlət, hər zaman olduğu kimi, bu dəfə də üzərinə düşən vəzifəni layiqincə icra etmək və prosesi nəzarətdə saxlamaq üçün koronavirusla bağlı vəziyyəti diqqətdə saxladı, vətəndaşları davamlı olaraq pandemiyadan qorunma qaydalarına və tövsiyələrinə əməl etməyə çağırdı. Hətta xəbərdarlıq etdi ki, vəziyyət nəzarətdən çıxa bilər, ikinci dalğa geri qayıda bilər. Acı nəticələr yaşana bilər. Lakin vətəndaşlarımız edilən bu çağırış və xəbərdarlıqlara yenə də əhəmiyyət verməyərək, məsuliyyətsiz davranışlarını davam etdirdilər. Çox təəssüf ki, zamanında əldə edilən uğurları qoruyub saxlamaq və tamamilə bu bəladan qurtulmaq mümkün olmadı. İndi də onun cəmiyyət olaraq hamımız acı nəticələrini yaşamaqdayıq”.
Həmsöhbətimiz onu da əlavə etdi ki, son dövrlər vətəndaşların əksəriyyəti karantin qaydalarına əməl etmədiyinə görə yoluxanlarla sağalanlar arasında fərq artıb. Buna görə karantin qaydaları sərtləşdirilib: “Karantin qaydalarının sərtləşdirilməsi tək ölkəmizdə yaşanmır. Əksər xarici ölkədə karantin qaydaları yenidən məhdudlaşdırılıb. Məlumdur ki, açıqlanan son statistikalarda koronavirusa yoluxanların sayı durmadan artır. Bu səbəbdən də məhdudlaşdırıcı tədbirlərin həyata keçirilməsi vacib idi”.
Günel CƏLİLOVA
