“Poliknik müşahidə altında xəstələrin evdə müalicə olunması ilə bağlı hazırlıq işləri yekunlaşır. Bununla bağlı bir sıra ölkələrin təcrübəsindən istifadə ediləcək. E-təbib mobil tətbiqi hazırlanır və bu sistemlə evdə müalicə olunan xəstələri izləmək mümkün olacaq. Evdə müalicə olunan şəxslər 12 saatdan bir sorğu ediləcək və qərara əsasən, müalicələrin ev və ya xəstəxana şəraitində davam etdirilməsi barədə qərar qəbul ediləcək”.
Bu sözləri Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədri Ramin Bayramlı Nazirlər Kabineti yanında Operativ Qərargahın brifinqində çıxışı zamanı deyib.
Qeyd edək ki, bir sıra ölkələrdə artıq koronavirusun yüngül formasına yoluxmuş şəxslər ev şəraitində müaliəcəni davam etdirirlər.
Vasif İsmayıl: “Ev şəraitində müalicəni davam etdirən insanlar güclü immun sisteminə malik olması üçün həyat tərzini dəyişməli və...”
Həkim Vasif İsmayıl bildirdi ki, ev şəraitində müalicəni davam etdirən insanlar güclü immun sisteminə malik olması üçün həyat tərzini dəyişməli və C vitamini ilə zəngin qidalar qəbul etməlidirlər: “Koronavirusdan qorunmaq üçün əvvəlcə şəxsin immun sistemi yaxşı olmalıdır. Müraciət edən şəxslər bu sistemi ayaqda tutmağın yollarını soruşurlar. İmmun sistemini gücləndirən dərman vitamin C-dır. Amma bu dərmanı da artıq istifadə etdiyiniz zaman dərman sağlamlığa zərərli ola bilər. İmmun sistemini gücləndirmək üçün öncə həyat sistemində dəyişiklik etmək lazımdır. Yəni yaxşı yatacaqsınız, evdə idman edəcəksiniz. İkincisi, düzgün qidalanmaq lazımdır. Qidalardan immun sistemini gücləndirən məhsullar rəngli meyvələr və tərəvəzlərdir. Xüsusən qırmızı və narıncı rəngdə olan meyvələrdir. Gün ərzində 2 litr maye qəbul etmək lazımdır ki, onun da yarısı su və ya limonlu su olmalıdır. 1 litr maye isə yəqin ki, çay olacaq. Mən yaşıl çay içməyi məsləhət görürəm. İmmun sistemini gücləndirmək üçün zəncəfil və darçından istifadə etməklə çay içmək lazımdır. Həmin çaya bal da əlavə etmək olar”.
Adil Qeybulla: “Xəstəliyi yüngül formada keçirənlər müalicəni ev şəraitində davam etdirə bilərlər”
Professor, həkim-ekspert Adil Qeybulla qeyd etdi ki, koronavirusa yoluxanların sayı günü-gündən artır. Xəstələrin sayı artdıqca, onların müalicəsində müəyyən problemlər yaşanır. Düzdür, xəstəxanalarda xəstə qəbulu, onun müalicəsində heç bir problem yaşanmır. Ancaq xəstə sayı artdıqca, xəstəliyi yüngül formada keçirənlər müalicəni ev şəraitində davam etdirə bilərlər.
Həmsöhbətimiz onu da əlavə etdi ki, insanlar karantin qaydalarına riayət etmirlər, yaxın vaxtlarda biz çox böyük yoluxma potensialı ilə üz-üzə qalacağıq: “Burada lovğalanmaq, ya da müvəqqəti uğurlarla öyünməyin yeri deyil. Biz situasiyanın ciddiliyini dərk etməliyik. Məsələ bundan ibarətdir ki, bizim camaat miflərə, falçılara, mistik şeylərə inanan camaatdır. Neçə müddətdir yazılır ki, ən mühüm qaydalara əməl etmək lazımdır. Bunlar sadə şeylərdir: maska taxmaq, sosial məsafə gözləmək, dezinfeksiya tədbirləri və s. Amma bu kimi sadə tövsiyələrə əməl etmirlər. Nəticədə isə virusa yoluxanların sayı sürətlə artır”.
Günel CƏLİLOVA
