Azərbaycanda xüsusi karantin rejimi avqustun 1-dək uzadılır. “Trend”in məlumatına görə, bunu Operativ Qərargahın keçirdiyi brifinqdə Xarici İşlər Nazirliyinin (XİN) Mətbuat xidməti idarəsinin rəisi Leyla Abdullayeva deyib.
Onun sözlərinə görə, Azərbaycanda epidemioloji vəziyyət təhlil olunub və bu qərar qəbul olunub.
Bəzi şəhər və rayonlarda xüsusi karantin rejimi tətbiq edilir
L.Abdullayeva deyib ki, 1-ci klastr üzrə ciddi karantin şərtlərinə ehtiyac yaranıb. Onun sözlərinə görə, 21 iyundan 5 iyul 06:00-a qədər ciddi karantin rejimi elan olunacaq. 1-ci klastr üzrə Bakı, Gəncə, Yevlax, Sumqayıt, Lənkəran şəhərləri və Masallı, Cəlilabad, Abşeron rayonları üzrə SMS xəbərdarlıq və xüsusi icazə ilə evdən çıxmaq qaydası tətbiq ediləcək, eləcə də ticarət mərkəzlərinin fəaliyyəti, ictimai iaşə obyektlərində yerində xidmətlər dayandırılacaq:
"Həmçinin, bərbərxana və gözəllik salonları, muzeylərin fəaliyyəti dayandırılacaq. 65 yaşdan yuxarı şəxslərin hərəkəti qadağan edilmir. Bakı metropoliteninin fəaliyyəti məhdudlaşdırılmır. Park və istirahət mərkəzləri də fəaliyyət göstərəcək".
Azərbaycanın karantin təcrübəsi dünya ölkələri tərəfindən təqdir olunur
XİN sözçüsü bildirib ki, Azərbaycanın karantin təcrübəsi dünya ölkələri tərəfindən təqdir olunur. Onun sözlərinə görə, əsas məqsəd ölkədə virusun qarşısının alınmasıdır: "Bunun üçün biz qaydalara riayət etməliyik, infeksiyanın yayılmasının qarşısını almalıyıq. Biz bunun üçün lazım olan bütün tədbirləri görürük".
Buraxılış və qəbul imtahanları təxirə salınacaq?
Buraxılış və qəbul imtahanları ilə bağlı müzakirələrin aparıldığını deyən L.Abdullayevanın sözlərinə görə, 2 həftə ərzində buraxılış və qəbul imtahanları təxirə salına bilər: "Buraxılış və qəbul imtahanları növbəti həftələrə keçirilə bilər. Bu barədə Təhsil Nazirliyi ilə də müzakirələr aparılır. Nazirlər Kabinetinin qərarında bu məsələyə aydınlıq gətiriləcək, amma ola bilsin ki, Naxçıvanda bu imtahanlar vaxtında keçirilsin".
Sərhədlər avqustun 1-dək bağlı qalacaq
L.Abdullayeva bildirib ki, sərhədlərin bağlı qalma müddəti də avqustun 1-dək uzadılır. Onun sözlərinə görə, bəzi ölkələrin Azərbaycana aviareysləri bərpa etməsi ölkələr arasında razılıq əsasında həyata keçirilə bilər: "Artıq xarici ölkələrdə müvəqqəti olan vətəndaşların Azərbaycana gətirilməsi istiqamətində işlər görülür. Mərhələli halda vətəndaşlar Azərbaycana gətirilir. Bunun karantin rejimində dayandırılması gözlənilmir. Amma sərhədlər avqustun 1-dək bağlı olacaq. Beynəlxalq reyslər isə qarşılıqlı razılıq əsasında bərpa oluna bilər".
…metro və marşrut avtobusları işləyəcək
L.Abdullayeva bildirib ki, xüsusi karantin dövründə metropolitenlə yanaşı, avtobuslar da fəaliyyətini davam etdirəcək. Onun sözlərinə görə, ictimai nəqliyyatın fəaliyyətinə qadağa olmayacaq: "Şəxsi avtomobillərdən istifadəyə isə yalnız işləməsinə icazə verilən şəxslərə iş saatları ərzində icazə veriləcək. Digər vaxtlarda avtomobillərin hərəkəti qadağan ediləcək".
Son bir ayda 1000-ə yaxın vətəndaş Azərbaycana gətirilib
XİN sözçüsü bildirib ki, Rusiyada yaşayan vətəndaşlarımız səbrli olmalı və Azərbaycana gətirilmələrini gözləməlidirlər. Onun sözlərinə görə, Azərbaycanın digər ölkələrdə qalan vətəndaşlarının ölkəyə qaytarılması istiqamətində işlər davam edir: "İki ölkə Prezidenti arasında bu barədə telefon danışığı olub. Son bir ay ərzində 1000-ə yaxın vətəndaş Azərbaycana qaytarılıb. Proses həm hava, həm də quru yolla həyata keçirilir. "Evegedirem" portalından qeydiyyatdan keçməklə həmin şəxslər geri qaytarılır. Bu prosesdə əsasən yaşlılar, qadın və uşaqlar nəzərə alınır. Amma bəziləri portaldan qeydiyyatdan keçsə də, sərhəd məntəqələrinə üz tutur. Azərbaycanın Rusiyadakı səfirliyi və biz dəfələrlə müraciət etmişik ki, qeydiyyatdan keçən şəxslər cavab gözləsinlər. Onlar geri qaytarılacaq. Sadəcə, səbr nümayiş etdirsinlər, olduqları ölkənin qanunlarına riayət etsinlər".
Azərbaycanda xəstəliyin yayılması sürəti yüksəkdir
Tibbi Ərazi Bölmələrini İdarəetmə Birliyinin (TƏBİB) sədri Ramin Bayramlı isə bildirib ki, Azərbaycanda epidemioloji vəziyyət qənaətbəxş deyil, ölkəmizdə xəstəliyin yayılması sürəti yüksəkdir.
Onun sözlərinə görə, iyunun 18-də 338 nəfərdə COVID-19-a yeni yoluxma faktı aşkar edilib. İndiyədək 139 nəfər dünyasını dəyişib, virusa yoluxmuş 6192 nəfər xəstə sağalıb, hazırda 4998 aktiv xəstə var.
Xəstələrin sağalma müddəti uzanır - 12-14 gün…
R.Bayramlı qeyd edib ki, artıq ölkədə koronavirus xəstələrinin sağalma vaxtı uzanaraq, 12-14 günədək çəkir. TƏBİB sədri bildirib ki, bununla əlaqədar yeni yoluxanların və sağalanların sayında fərq yaranır, xəstəxanada uzun müddət qalanların sayı çox olur.
O, əlavə edib ki, adətən, xəstəxanaların çarpayı fondunun 15 faizi reanimasiya şöbəsi üçün nəzərdə tutulur: “Xəstələrin böyük əksəriyyətinin oksigenə ehtiyacı yaranır. Bu, COVID-19 xəstəliyi üçün xarakterikdir. 3 ay ərzində bunları nəzərə alaraq, xəstəxanalar üçün oksigen generatorları gətirilib”.
R.Bayramlı qeyd edib ki, modul tipli xəstəxanalarla birlikdə 7000-ə yaxın çarpayı fondu var, artıq xəstələrin sayı 5000-ə çatır.
Onun sözlərinə görə, ötən həftə uzunmüddətli məhdudiyyətlərin tətbiqi üçün hazırlıq dövrü oldu: “Son iki həftə ərzində tətbiq olunan qısamüddətli məhdudiyyətlər düşünülmüş şəkildə edilmişdi. Bu, bizə imkan verdi ki, uzunmüddətli məhdudiyyətlərin tətbiqi üçün vaxt qazanaq”.
Koronavirusa yoluxan kifayət qədər ağır xəstə var
R.Bayramlı bildirib ki, ölkədə vəziyyəti ağır olan və intensiv terapiya tələb edən koronavirusa yoluxmuş kifayət qədər xəstə var. Bu, çox narahatedicidir. Onun sözlərinə görə, COVID-19 virusuna yoluxanlar arasında xəstəxanaya gec müraciət edənlər çoxdur.
Simptomları zəif olan xəstələrlə poliklinika həkimləri məşğul olacaq
TƏBİB sədri bildirib ki, yalnız COVID-19-a yoluxan deyil, yuxarı tənəffüs orqanlarının xəstəliklərindən əziyyət çəkən, amma simptomları zəif olan insanların evdə müşahidə altında saxlanması üçün müvafiq tədbirlər görülüb.
Onun sözlərinə görə, artıq poliklinika həkimləri simptomları zəif olan xəstələrin müalicəsi ilə məşğul olacaq. Bunun üçün beynəlxalq təcrübə əsasında hazırlanan mobil tətbiq əlavəsindən istifadə ediləcək. “E-təbib” adlanan bu mobil tətbiq əlavəsi vasitəsilə evdə müalicə alan xəstələr müşahidə altında saxlanacaqlar: “Onların evi tərk etməməsi üçün müvafiq qurumlar tərəfindən nəzarət tədbirləri həyata keçiriləcək. Burada 14 günlük karantinin olması, belə xəstələrin təlimatlara əməl etməsi vacibdir. Poliklinikada çalışan həkimlər 12 saatdan bir ev telefonu vasitəsilə xəstələrin səhhəti ilə bağlı sorğular göndərəcək və bu məlumat elektron sistemə daxil ediləcək. Bunun əsasında pasiyentin müalicəsini evdə və ya xəstəxanada davam etdirməsi barədə qərar qəbul ediləcək”.
Çarpayıların doluluğu - regionlarda 30, Bakıda 40 faiz…
R.Bayramlı qeyd edib ki, bir sıra xəstəxanalarda əhalinin dializi və s. kimi problemləri üzrə tibbi xidmətlərin göstərilməsi davam etdiriləcək. Vətəndaşlar əmin ola bilər ki, digər xidmətlər üzrə hər hansı axsama müşahidə olunmayacaq. Onun sözlərinə görə, bir sıra xəstəxanaların xüsusi rejimli xəstəxanaya çevrilməsi barədə qərar qəbul edilib: “Təhlillər onu göstərir ki, regionlarda çarpayıların doluluğu 30, Bakıda 40 faiz olub. Ölkəmizin bütün regionlarında rayon xəstəxanaları var. Bu xəstəxanaların hər birinin çarpayı fondu işə salınır”.
Vətəndaşlara deksametazon xəbərdarlığı…
“Məlumat almışıq ki, apteklərdən deksametazon dərmanı ilə maraqlananlar olub. Amma vətəndaşlar bu dərmanı COVID-19-a qarşı profilaktik məqsədlə işlətmək istəsələr, immun sistemlərini sıradan çıxara bilərlər” – deyən TƏBİB sədrinin sözlərinə görə, bu hala qətiyyən yol vermək olmaz: “Azərbaycanda virusla bağlı bütün müalicə protokolları tətbiq edilir. Deksametazon isə yenilik deyil. Bu dərman həmişə iltihab əleyhinə müalicə üçün istifadə edilib”.
Çimərliklərdən istifadəyə məhdudiyyət qoyulur
R.Bayramlı bildirib ki, karantin rejiminin sərtləşdirilməsi ilə bağlı çimərliklərdən istifadəyə məhdudiyyətlər qoyulacaq. Onun sözlərinə görə, əvvəlki məhdudiyyətlərdən fərqli olaraq, SMS sistemi ilə çıxışa icazənin verildiyi müddət ərzində park və bulvar açıq olacaq: “Hazırda bu məsələ üzərində işlənir. Bununla bağlı əlavə məlumat veriləcək”.
Xəstələrin 50 faizini itirmək təhlükəsi ilə üzləşə bilərik...
Dövlət Gömrük Komitəsi Tibbi Xidmət İdarəsinin Elmi Təcrübi və Tədris Mərkəzinin rəisi, Operativ Qərargahın tibbi eksperti Rəşad Mahmudov isə deyib ki, heç bir dövlət, heç bir millət tərəfindən arzu olunmayan vəziyyətlə qarşı-qarşıyayıq. Onun sözlərinə görə, pandemiyanın bizə diqtə etdiyi vəziyyətlə mübarizə aparmaq məcburiyyətindəyik: "Bu prosesdə günahkar axtarmaq lazım deyil. Lakin cəmiyyətin bir hissəsinin epidemioloji qaydalara əməl etməməsi hökuməti sərt qərarlar verməyə məcbur edir. Yumşalma mərhələsindən sonra yenidən sərtləşdirməyə qərar verməyə məcbur olduq.
Xəstəxanada çarpayıların getdikcə məhdudlaşması, COVID-19-la mübarizədə yeni nəticələr bizi ciddi şəkildə qorxudur. Dövlət başçısının tapşırığı ilə ilkin mübarizə tədbirləri bütün dünya ölkələri üçün nümunə idi. Amma indi yaranmış vəziyyət Azərbaycan dövlətini yenidən sərt addımlar atmağa vadar edir".
R.Mahmudov deyib ki, Azərbaycan əhalisinin bir hissəsinin koronavirusa inanmadığı halda, biz daha ciddi problemlərlə üz-üzə qala bilərik. Onun sözlərinə görə, Azərbaycan vətəndaşları hamılıqla bunu dərk etməli və mübarizə aparmalıdırlar: "Səhiyyə ləvazimatlarını nə qədər artırsaq da, bu, effektli deyil. 50 faiz xəstələri itirmək təhlükəsi ilə üzləşə bilərik. Bu qədər məlumat əlimizdə varkən bu məsələdə həssas olmalıyıq. Bu xəstəliklə birlikdə mübarizə aparmalıyıq. Həkimlərimiz aylardır dayanmadan xəstəliklə mübarizə aparırlar. Bu reallığa görə biz özümüz-özümüzü qorumalıyıq".
