Dünyanın COVID-19-un qeydə alındığı 213 ölkə və bölgəsində təhlükəli infeksiyadan ölənlərin sayı 450 min nəfərə çatıb. Pandemiya ərzində təhlükəli virusdan, ümumilikdə, 4 213 601 nəfər sağalıb.
Məlumat üçün bildirək ki, dünyada koronavirusa ən çox yoluxma ABŞ-da qeydə alınıb. Birləşmiş Ştatlarda təhlükəli infeksiyaya 2 182 950 yoluxma qeydə alınıb, koronavirusdan 118 283 nəfər ölüb.
COVID-19-a yoluxma üzrə siyahıda ikinci yerdə Braziliya qərarlaşıb. Cənubi Amerika ölkəsində 891 556 insan virusa yoluxub. Bununla yanaşı, 44 118 insan koronavirusdan vəfat edib.
Qonşu Rusiya da koronavirusa yoluxanların sayı üzrə ilk üçlükdə qərarlaşıb. Şimal qonşumuzda COVID-19-a 537 210 yoluxma təsdiqlənib, 7 091 insan pandemiyanın qurbanı olub.
Cənubi Asiya ölkəsi Hindistanda 343 026 insan cari ilin ən təhükəli virusuna yoluxub, 9 915 nəfər virusdan dünyasını dəyişib.
Böyük Britaniya Qərbi Avropanın koronavirusdan ən çox əziyyət çəkən ölkəsidir. Birləşmiş Krallıqda 296 857 nəfər COVID-19-a yoluxub, 41 736 insan ölüb.
Qərbi Avropanın digər ölkəsi İspaniyada yoluxma sayı 291 189, pandemiya qurbanlarının sayı isə 27 136 nəfər təşkil edir.
Siyahıda 7-ci yerdə virusa 237 290 yoluxma sayı ilə İtaliya qərarlaşıb. Qərbi Avropanın bu ölkəsində 34 371 nəfər virusdan ölüb.
Peru dünyada koronavirusa yoluxma hallarının sayına görə 8-ci yerdədir. Amerika ölkəsində 232 992 nəfər COVID-19 daşıyıcısı kimi qeydiyyata alınıb.
Qeyd etdiyimiz kimi, son zamanlar koronavirusa yoluxanların sayı artmaqda davam edir. Artım bütün ölkələrdə yaşanır.
“Qonşu ölkələrdə də virusa yoluxmanın artmasının əsas səbəbi insanların vəziyyətin ciddiliyini dərk etməməsi və...”
Həkim-ekspert Rasif Bağırov bildirdi ki, son günlər koronavirusa yoluxmanın sayında artma müşahidə olunur: “İnsanlar çölə çıxarkən maskadan istifadə etmir, məsafə saxlamırlar, müəyyən gigiyenik qaydalara əməl olunmur. Bunların hamısı yoluxmaların sayının artmasına səbəb olur. İnsanlar zərurət olmadan evdən çıxmamalı, yəni sosial izolyasiya qaydalarına əməl olunmalıdır. İkincisi, çölə çıxarkən mütləq maska taxılmalı, əhalinin sıx olduğu yerlərə getməkdən çəkinilməlidir. Bu infeksiya hava-damcı yolu ilə yayıldığına görə əhalinin daha sıx olduğu yerlərdə yoluxma risqi daha çoxdur. Əhali mütləq maskadan istifadə etməlidir. Yaxşı olar ki, N95 maskalardan istifadə edilsin, gigiyena qaydalarına riayət olunsun”.
Həmsöhbətimiz onu da əlavə etdi ki, karantin rejiminin nisbətən yumşaldılması virusa yoluxanların sayının artmasına səbəb olub: “Karantin rejiminin sərtləşdirilməsi növbəti günlərin yoluxma sayından asılı olacaq. Əgər yoluxma sayı artarsa, qaydalar nisbətən sərtləşdirilməlidir. Çünki qaydaların nisbətən yumşaldılması yoluxma sayının getdikcə artmasına səbəb oldu”.
Ekspert onu da əlavə etdi ki, virusa yoluxma halının artması tək ölkəmizdə deyil, bütün dünyada müşahidə olunur: “Bütün ölkələrdə virusa yoluxmanın artmasının əsas səbəbi insanların vəziyyətin ciddiliyini dərk etməməsi və bu məsələyə məsuliyyətsiz yanaşmasıdır”.
Günel CƏLİLOVA
