Prezident İlham Əliyev Dünya Bankının təşəbbüsü ilə bankın Avropa və Mərkəzi Asiya regionu üzrə yeni təyin olunan vitse-prezidenti xanım Anna Byerde, Cənubi Qafqaz üzrə regional direktoru Sebastian Molineus və bankın digər nümayəndələrilə keçirilən videokonfrans zamanı postpandemiya dönəmilə bağlı planlardan danışıb:
“Mən, həmçinin, məhkəmə sistemimizə dəstəyinizə görə minnətdarlığımı bildirmək istərdim. Mən şəxsən yeni məhkəmə binalarımızın açılış mərasimində iştirak etmişəm. Təkcə binalar deyil, həmçinin sistemlər, texnologiyalar. Bütün bu layihələr Dünya Bankının dəstəyi ilə həyata keçirilmişdir. Pandemiya ilə əlaqədar vəziyyəti nəzərə alaraq, təbii ki, postpandemiya dövrü böhranını idarə etmək üçün bizim ölkə strategiyasına ehtiyacımız var. Çünki bizim iqtisadiyyatımızın bəzi sahələri ciddi şəkildə zərər çəkdi. Xüsusilə də yaxşı nəticələrimiz olan və son 4 ildə artımın olduğu turizm sahəsi. Həqiqətən Azərbaycan turizm xəritəsində maraqlı istiqamətə çevrilib. Beləliklə, pandemiyadan sonra biz bu sektoru canlandırmaq və Azərbaycanı yenidən xarici turistlər üçün cəlbedici etmək istiqamətində çox çalışmalıyıq. Çünki turizm sərbəst konvertasiya olunan valyuta yaradan sektorlardan biridir. Qeyri-neft və qeyri-qaz ixracından gələcək daha çox sərbəst konvertasiya olunan valyuta ehtiyatlarına ehtiyacımız var. Ona görə də kənd təsərrüfatı, turizm, texnologiya, düşünürəm ki, bizim diqqətimizi cəmlədiyimiz əsas sahələr olacaq".
Göründüyü kimi, ölkə başçısı postpandemiya dövrü böhranını idarə etmək üçün bizim ölkə strategiyasına ehtiyacımızın olduğunu bildirir. Postpandemiya böhranı deyəndə nə nəzərdə tutulur?
İqtisadçı ekspert Günay Hüseynova “Bakı-Xəbər”ə açıqlamasında bildirdi ki, Dünya Bankı nüvüzlu qurumdur və hər bir ölkə onunla yaxından əməkdaşlıq etməyə maraq göstərir: “Birləşmiş Millətlər Təşkilatının ixtisaslaşmış qurumu olan Dünya Bankının əsas məqsədi iqtisadi keçid dövründə olan inkişaf etməkdə olan ölkələr başda olmaqla, digər üzv ölkələrin iqtisadi inkişafına nail olmaqdır. Bu qurumla ölkəmiz 1992 -ci ildən əməkdaşlıq etməkdədir. Bu əməkdaslıq çərçivəsində ölkə əhəmiyyətli bir çox layihələrə imza atılıb. Prezident İlham Əliyevlə Dünya Bankının yeni Vitse-prezidenti xanım Anna Byerde ilə, həmçinin Bankın Cənubi Qafqaz üzrə regional direktoru Sebastian Molineus və bankın digər nümayəndələri arasında videokonfrans keçirilib. Konfrans zamanı postpandemiya böhranını idarə etmək üçün orijinal strategiyaya ehtiyac duyulduğu bildirilib. Bütün dünya ölkələrini öz təsiri altına alan koronavirus (COVİD-19) Azərbaycan iqtisadiyyatından da yan keçmədi. Son altı ay ərzində ölkə iqtisadiyyatında 2 % azalma müşahidə edilib. İlin sonunadək isə iqtisadi artım templərinin zəifləməsi və istehsalın çox da kritik olmayan səviyyədə aşağı düşməsi müşahidə olunacaq. Bu da ümummilli məhsulun, həmçinin də Ümum Daxili Məhsulun staqnasiyası ilə xarakterizə olunur. Əsasən bu iqtisadi konyunktura iqtsadi partlayışdan sonra gəlməkdədir və qarşısı alınmazsa, resessiyadan depressiyaya keçəcək. Neftin qiymətinin kəskin düşməsi, həmçinin də virusla əlaqədər müxtəlif sektorlarda xərclərin artmasıyla əlaqədar olaraq ölkə iqtisadiyyatı fiskal şoklara məruz qalıb. Buna gğrə də bizim postpandemiya dönəmi üçün yeni strategiyanı təşkil etməyimizə zərurət yaranır. Bunun nəticəsində biz optimal balans səviyyəsini tapmalıyıq. Azərbaycanın çox mükəmməl inkişaf strategiyası var. İqtisadiyyatın inkişafını təmin etmək üçün ciddi Yol Xəritələri ortaya qoyulub. Bu o anlama gəlir ki, postpandemiya ilə bağlı təkliflər həmin strategiyaların ruhuna uyğunlaşdırılacaq. Köklü bir yeniliyə ehtiyac olmayacaq. Əsasən iqtisadiyyatın daha çox zərər görən sahələrinin dirçəldilməsi prosesinə ehtiyac duyulacaq”.
Məhəmmədəli QƏRİBLİ
